आयुर्वेदिक औषधि बोकेर बुटवलका मेयरसहितको टोली संक्रमितको दैलोमा- प्रदेश ५ - कान्तिपुर समाचार

आयुर्वेदिक औषधि बोकेर बुटवलका मेयरसहितको टोली संक्रमितको दैलोमा

अमृता अनमोल

बुटवल — होम आइसोलेसनमा बसेका कोरोना संक्रमितलाई सरकारले बेवास्ता गरेको गुनासो बढेपछि बुटवल उपमहानगरपालिकाले उनीहरुको अवस्था बुझ्न घरदैलो  अभियान सुरु गरेको छ ।

होम आइसोलेसनमा राखिएका संक्रमित र तिनका परिवारलाई भेट्न बुटवल उपमहानगरपालिकाका मेयर शिवराज सुवेदी, प्रमुख प्रशासकीय अधिकृत चक्रपाणी शर्मा, सम्बन्धित वडाका वडाध्यक्ष, स्वास्थ्य महाशाखा प्रमुखसहितको स्वास्थ्यकर्मीको टोली होम आइसोलेसनमा पुगेको हो ।

टोलीले साथमा स्वास्थ्य सावधानीका उपायको जानकारी, स्वास्थ्य लाभको पत्र र वैकल्पिक उपचार पद्धतिका लागि आयुर्वेदिक औषधि बोकेर जाने गरेको छ । संक्रमितको स्वास्थ्य अवस्था बुझ्न, सजगताका उपाय सिकाउन र उनीहरुको मनोबल बढाउन घरदैलो अभियान सुरु गरिएको मेयर सुवेदीले बताए ।

बुटवलमा बुधबारबाट यो अभियान सुरु भएको हो । पहिलो दिन मात्रै विभिन्न २६ स्थानमा रहेका होम आइसोलेनका संक्रमितलाई भेटेर स्वास्थ्य लाभको कामना गरेको मेयर सुवेदीले बताए । ‘यो हप्ता होम आइसोलेसनमा बसेका सबैलाई भेटेर आत्मबल बढाउने र स्वास्थ्य सजगता सिकाउने काम गरिनेछ,’ उनले भने ।

बुटवलमा पछिल्लो समय कोरोना भाइरसको संक्रमण ह्वात्तै बढेको छ । उपमहानगरमा कोरोना विशेष अस्पताल र आइसोलेसन भए पनि लक्षण नदेखिएका संक्रमित र कन्ट्याक्ट ट्रेसिङमा परेकालाई होम आइसोलेसनमै राखिएको छ । बुटवलमा अहिलेसम्म १२७ जनामा संक्रमण पुष्टि भएको छ ।

प्रकाशित : भाद्र ४, २०७७ ०८:५३
प्रतिक्रिया
पठाउनुहोस्

रुपन्देहीमा एकै परिवारका ८ जनामा कोरोना संक्रमण

अमृता अनमोल

बुटवल — रुपन्देहीको सिद्धार्थनगर नगरपालिकामा एकै परिवारका ८ जनामा कोरोना भाइरसको संक्रमण भएको छ । प्रदेश ५ को सामाजिक विकास मन्त्रालयमा कार्यरत एक जना वरिष्ठ कर्मचारीको परिवारका ८ जनालाई मंगलबार कोरोना संक्रमण पुष्टि भएको हो ।

कर्मचारीमा कोरोना भाइरसको संक्रमण देखिएपछि परिवारको समेत स्वाब संकलन गरिएको थियो । त्यसमा ७ जनामा कोरोना देखिएको हो । राति ९ बजेको नतिजामा संक्रमण पुष्टि भएपछि उनीहरुलाई तत्काल खबर गरिएको थियो । उनीहरु सिद्धार्थनगर ८ स्थित आफ्नै घरमा छन् । उनीहरु सबैको स्वास्थ्य अवस्था सामान्य रहेको स्वास्थ्य कार्यालय रुपन्देहीले जनाएको छ ।

पछिल्लो समय रुपन्देहीमा कोरोना संक्रमितको संख्या ह्वात्तै बढेको छ । बुधबार बिहानसम्म ५ सय ५७ जनामा संक्रमण देखिएको जिल्ला स्वास्थ्य कार्यालयका भेक्टर कन्ट्रोलर केदारनाथ साहले बताए । त्यसमध्ये २ सय ३ जना अहिले उपचाररत छन् । त्यसमध्ये १४ जना लक्षणसहितका बिरामी हुन् । सबैभन्दा बढी संक्रमण बुटवलमा देखिएको छ । रुपन्देहीमा अहिलेसम्म कोरोनाका कारण एक जनाको मृत्यु भएको छ ।

प्रकाशित : भाद्र ३, २०७७ १२:५४
पूरा पढ्नुहोस्
प्रतिक्रिया
पठाउनुहोस्
×