बुटवलमा बिहीबारदेखि भदौ ५ गतेसम्म 'लकडाउन'- प्रदेश ५ - कान्तिपुर समाचार

बुटवलमा बिहीबारदेखि भदौ ५ गतेसम्म 'लकडाउन'

सन्जु पौडेल

तिलोत्तमा — समुदायस्तरमा कोरोना भाइरसको संक्रमण तीव्र हुँदै गएपछि बुटवल उपमहानगरपालिकाले लकडाउन गर्ने निर्णय गरेको छ । 

उपमहानगरको बुधबार बसेको आकस्मिक बैठकले कडाइका साथ लकडाउन गर्ने निर्णय गरेको हो । यसअघि लकडाउन खुलेसँगै बजारमा मानिसको भिडभाड र चहलपहल बढेको, सामान्य सतर्कता पनि अपनाउन छाडेपछि उपमहानगरपालिकाले लकडाउन गर्ने निर्णय गरेको बुटवल उपमहानगरपालिकाका उपप्रमुख गुमादेवी आचार्यले बताइन् ।

‘बुटवलमा रहेकालाई बाहिर जान र बुटवल आउनका लागि बिहीबार राति १२ बजेसम्म समय दिएर भदौ ५ गतेसम्मका लागि पूर्ण रूपमा लकडाउन गर्ने निर्णय भएको छ,' आचार्यले भनिन् । लकडाउनका क्रममा अत्यावश्यकबाहेकका सबै सेवा बन्द गरिने बताइएको छ ।

उपमहानगरले गत साताबाटै हाटबजार लगायतका भिडभाड हुने क्षेत्र बन्द गर्ने निर्णय गरेको थियो ।

प्रकाशित : श्रावण २८, २०७७ १८:४०
प्रतिक्रिया
पठाउनुहोस्

वीरगन्जमा मृत भेटिएका युवकमा कोरोना पोजिटिभ

भूषण यादव

वीरगन्ज — वीरगन्जमा मंगलबार मृत अवस्थामा फेला परेका एक युवकमा कोरोना संक्रमण पुष्टि भएको छ । वीरगन्ज महानगरपालिका–१६ नगवाको सामुदायिक प्रहरी चौकी नजिकै मंगलबार दिउँसो बाराको विश्रामपुर गाउँपालिका–५ इटियाही निवासी ३८ वर्षीय एक युवकको शव फेला परेको प्रहरीले जनाएको छ ।

स्वाब संकलन गरी नारायणी अस्पतालको प्रयोगशालामा गरिएको परीक्षण ती युवकमा कोरोना संक्रमण पुष्टि भएको नारायणी अस्पतालका प्रमुख मेडिकल सुपरिटेन्डेन्ट डा.मदन कुमार उपाध्यायले जनाएका छन् ।

जिल्ला प्रहरी कार्यालय पर्साका प्रवक्ता प्रहरी नायव उपरीक्षक मनोजीत कुँवरका अनुसार मृत फेला परेका युवकले अत्यधिक मदिरा सेवन गरेका थिए । कोरोना पोजिटिभको शव व्यवस्थापनमा सावधानी अप्नाउनु पर्ने भन्दै शंका लागेर ती युवकको मंगलबार नै स्वाब संकलन गरिएको थियो ।

प्रकाशित : श्रावण २८, २०७७ १८:२९
पूरा पढ्नुहोस्
प्रतिक्रिया
पठाउनुहोस्
×