नेपालगन्ज मेडिकल कलेजमा उपचारका क्रममा मृत्यु भएका पुरुषमा कोरोना पुष्टि- प्रदेश ५ - कान्तिपुर समाचार

नेपालगन्ज मेडिकल कलेजमा उपचारका क्रममा मृत्यु भएका पुरुषमा कोरोना पुष्टि

रुपा गहतराज

नेपालगन्ज — नेपालगन्ज मेडिकल कलेज शिक्षण अस्पताल कोहलपुरमा उपचारका क्रममा आइतबार मृत्यु भएका ५० वर्षीय पुरुषमा कोरोना संक्रमण पुष्टि भएको छ ।


अछाम चौरपाटि– ५ का ती पुरुष दुवै फोक्सोमा निमोनिया भएका कारण साउन २० गतेदेखि अस्पतालमा उपचार गराइरहेका थिए । सोमबार साँझ आएको मृतकको स्वाब परीक्षणको रिपोटमा कोरोना संक्रमण पुष्टि भएको अस्पतालका सहायक निर्देशक डा. दिनेश श्रेष्ठले बताए ।

‘आइतबार साँझ उपचार गर्दागर्दै उहाँको मृत्यु भयो । अहिले रिपोर्ट पाजिटिभ देखियो,’ उनले भने । अस्पतालका कर्मचारीको अभावले काम गर्नसमेत गाह्रो भएको बताए ।

यसअघि बाँकेमै सोमबार मात्र कोहलपुर–२ की महिला, बैजनाथ गाउँपालिकाकी एक महिला र नरैनापुरका एक पुरुषले कोरानाबाट ज्यान गुमाएका थिए । योसँगै बाँकेमा कोरोनाबाट मृत्यु हुनेको संख्या ४ जना पुगेको छ ।

प्रकाशित : श्रावण २६, २०७७ २२:१४
प्रतिक्रिया
पठाउनुहोस्

लामो दूरीका सवारी र हवाई उडान भदौ १५ सम्म बन्द

बिनु सुवेदी

काठमाडौँ — सरकारले लामो दूरीका सवारी र हवाइ उडान भदौ १५ सम्म बन्द गर्ने निर्णय गरेको छ । कोरोनाको संक्रमण झन् फैलन थालेपछि सोमबार बसेको मन्त्रिपरिषद् बैठकले यस्तो निर्णय गरेको हो । सरकारले यसअघि भदौ १ गतेदेखि चल्न दिने निर्णय गरेको थियो ।

बैठकले २ सय भन्दा बढी कोरोना संक्रमित भएका जिल्लामा यातायातका साधान भित्रिने र बाहिर जान नदिने निर्णय गरेको छ । कोरोनाका बिरामीहरूको संख्या २ सयभन्दा बढी भएका जिल्लाहरुमा अत्यावश्यक बाहेकका सवारी साधानहरुलाई भित्रिन र बाहिरिन नदिने निर्णय गरेको हो ।

'अत्यावश्यक परेर पास बनाएका र बिरामी बाहेक अरूको आवागमनमा कडाइ गर्ने निर्णय भएको छ,' स्वास्थ्य तथा जनसंख्या मन्त्री भानुभक्त ढकालले कान्तिपुरलाई भने । २ सयभन्दा बढी संक्रमित रहेका जिल्लाहरु उच्च निगरानीमा रहेको समेत उनले बताएका छन् ।

यस्तै सरकारले भदौ मसान्तसम्म सीमा नाकाहरु बन्द गर्ने निर्णय पनि गरेको छ ।

प्रकाशित : श्रावण २६, २०७७ २१:४२
पूरा पढ्नुहोस्
प्रतिक्रिया
पठाउनुहोस्
×