तौलिहवामा बैंकका थप ८ कर्मचारी संक्रमित- प्रदेश ५ - कान्तिपुर समाचार
कान्तिपुर वेबसाईट
AdvertisementAdvertisement

तौलिहवामा बैंकका थप ८ कर्मचारी संक्रमित

मनोज पौडेल

कपिलवस्तु — तौलिहवामा थप तीन बैंक तथा वित्तीय संस्थाका आठ कर्मचारीमा कोरोना देखिएको छ । ग्लोबल आईएमई बैंकका तीन, गुह्येश्वरी मर्चेन्ट बैकिङ एन्ड फाइनान्स लिमिटेडका चार र मेगा बैंकका थप एक जनामा बिहीबार संक्रमण पुष्टि भएको हो ।

यी बैंकका शाखा सिल गरिएको छ । मेगामा बुधबार पनि एक कर्मचारीमा संक्रमण देखिएको थियो ।

बैंकका सीमित कर्मचारीको स्वाब नमुना परीक्षण गर्दा संक्रमण देखिएको प्रजिअ दीर्घनारायण पौडेलले बताए । ‘हेलमेलमा रहेका कर्मचारीलाई क्वारेन्टाइनमा बस्न भनेका छौं,’ उनले भने ‘उनीहरूको आइतबार स्वाब संकलन गरिनेछ । संक्रमित सबै होम आइसोलेसनमा बसेका छन् ।’

यसअघि बुधबार तौलिहवाका ३ र कृष्णनगरका २ बैंकका शाखा सिल गरिएका थिए । तौलिहवामा मेगाका एक, लक्ष्मीका एक र तिनाउ मिसन बैंकका २ कर्मचारीमा संक्रमण देखिएको थियो । त्यस्तै कृष्णनगरको एभरेष्ट बैंकका एक र नेपाल बैंकका २ कर्मचारीमा संक्रमण पुष्टि भएको थियो ।

संक्रमण देखिएपछि शाखा सिल गरिएको मैंगा बैंक तौलिहवा शाखाका प्रबन्धक राजेन्द्र शर्माले बताए । ‘लोन, क्यास र ऋण शाखामा काम गर्ने कर्मचारी संक्रमित भएका छन्,’ उनले भने, ‘सेवाग्राहीको सुरक्षाका लागि सबै सेवा बन्द गरेका हौं ।’ बैंकका सबै कर्मचारीको पीसीआर परीक्षण गराएर अवस्था सामान्य नभएसम्म सेवा नियमित नगरिने उनले बताए ।

प्रकाशित : श्रावण २२, २०७७ १३:३२
प्रतिक्रिया
पठाउनुहोस्

सरकारले उपलब्ध गराएको सूचीमा जनस्वास्थ्य प्रयोगशाला नभएकाले पीसीआर रिपोर्ट अस्वीकार : चिनियाँ दूतावास

कान्तिपुर संवाददाता

काठमाडौँ — नेपाल सरकारले उपलब्ध गराएको प्रयोगशालाको सूचीमा राष्ट्रिय जनस्वास्थ्य प्रयोगशाला नरहेकाले आफ्ना नागरिकको पीसीआर रिपोर्ट अस्वीकृत गरिएको चिनियाँ दूतावासले जनाएको छ ।

सरकारले वीर अस्पताल, त्रिवि शिक्षण अस्पताल, पाटन स्वास्थ्य विज्ञान प्रतिष्ठान, स्टार अस्पताल र काठमाडौं मेडिकल कलेज तथा शिक्षण अस्पतालको सूची पठाएकाले त्यहाँको रिपोर्ट मात्रैलाई मान्यता दिने निर्णय भएको दूतावासले स्पष्टीकरण दिएको छ । नेपाल सरकारले उपलब्ध गराएको सूची आफूहरुले चीनको अध्यागमन कार्यालयमा जानकारी पठाइएकाले त्यहीअनुसारको रिपोर्ट मात्रै आफूहरुले मान्नुपरेको काठमाडौंस्थित चिनियाँ दूतावासका प्रवक्ताले बताए ।

स्वदेश फर्किन लागेका चिनियाँ नागरिकको पीसीआर गरिदिन भन्दै काठमाडौं महानगरपालिकाको वडा नं. २६ को कार्यालयले सिफारिस गरेपछि शुक्रबार इपिडिमियोलोजी तथा रोग नियन्त्रण महाशाखाको टोलीले ५९ जनाको स्वाब संकलन गरेको थियो। ईडीसीडीका मेडिकल टेक्नोलोजिस्ट धनप्रसाद पौडेलको टोली स्वाब संकलन गर्न ठमेलको ज्याठास्थित एक होटलमा गएका थिए ।

प्रयोगशालाले बुधबार दिएको रिपोर्ट दूतावासमा पेस गर्दा अस्वीकार भएको वडाध्यक्ष ख्यामराज तिवारीले बताए । ‘ठमेलका होटल व्यवसायीहरूले चिनियाँ नागरिकको पीसीआरका लागि सिफारिस गरिदिन भनेपछि मैले टेकुमा पत्र लेखिदिएको थिएँ । सबैको रिपोर्ट नेगेटिभ आएछ,’ उनले भने, ‘त्यही रिपोर्ट लिएर चिनियाँहरू दूतावास जाँदा अस्वीकार भयो । त्यसपछि स्टार अस्पतालले उनीहरूको स्वाब संकलन गरेको छ ।’

चिनियाँ दूतावासले राष्ट्रिय प्रयोगशालाबाहेक वीर, टिचिङ, पाटन, केएमसी र स्टार अस्पताल जहाँ पीसीआर गराएर रिपोर्ट ल्याए पनि मान्ने भनेपछि होटल व्यवसायीले छिटो रिपोर्ट लिन स्टार अस्पतालको प्रयोगशालामा पीसीआर गराएको वडाध्यक्ष तिवारीले बताए । चिनियाँहरू शुक्रबार चीन फर्कने तयारीमा छन् ।

प्रकाशित : श्रावण २२, २०७७ १३:२७
पूरा पढ्नुहोस्
प्रतिक्रिया
पठाउनुहोस्
×