नेपालगन्ज उपमहानगरका एक वडाध्यक्ष र कार्यकारी अधिकृतलाई कोरोना संक्रमण

उपमहानगरपालिकाका जनप्रतिनिधिसहित ५४ जनाको स्वाब संकलन गरेर परीक्षण गर्दा एक वडाध्यक्षसहित २ जनामा कोरोना संक्रमण पुष्टि भएको जनस्वास्थ्य कार्यालयका कोरोना फोकल पर्स नरेश श्रेष्ठले बताए ।

भेरी अस्पताल नेपालगन्जमा गरिएको परीक्षणमा उनीहरुलाई सोमबार कोभिड-१९ पोजिटिभ देखिएको पुष्टि भएको हो । दुवैजनालाई खजुरास्थित क्यान्सर अस्पतालको आइसोलेसनमा लगिएको छ ।

यस्तै बाँके जिल्ला अदालतका ५ जनामा पनि कोरोना पुष्टि भएको छ । भेरी अस्पतालमा आइतबार गरिएको परीक्षणमा १२ जनामा थप संक्रमण पुष्टि भएको थियो । ती मध्ये अदालतका मात्रै पाँच जना छन् । भेरी अस्पतालका अनुसार नयाँ संक्रमितहरुमध्ये आर्मी अस्पताल राँझाका एक चिकित्सकसहित ३ जना, अदालतका ५ जना, खजुराका १ जना लगायत छन् ।

कारोना भाइरसको संक्रमण समुदायस्तरमा फैलिएको आशंका गर्दै भिड नियन्त्रणका लागि बाँकेमा आइतबारबाट निषेधित क्षेत्र जारी गरिएको छ । बाँकेका प्रमुख जिल्ला अधिकारी रामबहादुर कुरुम्वाङ्गले संक्रमण समुदायस्तरमा फैलिएको अवस्था देखिएको औल्याउँदै निषेधाज्ञाको पालना गर्न अपिल गरेका छन् ।

स्थानीय प्रशासनले हटस्पट पहिचान गरि सिल गर्ने योजना बनाइएको छ । त्यसका लागि सम्बद्धहरुसँग छलफल भइरहेको छ । उनले भने ,‘एक हप्ता उपमहानगरलाई निषेधित क्षेत्र घोषणा गर्ने तयारी भइरहेको छ ।’

कोरोना संक्रमण बढेपछि जिल्ला प्रशासन कार्यालय बाँकेले जिल्लाभरि तेस्रो पटक आइतबारदेखि तीन दिनसम्म पुनः निषेधाज्ञा लगाएको छ ।

बाँकेमा हालसम्म ४ सय ४६ जनामा कोरोना देखिएको छ । ती मध्ये ३ सय ८८ जना निको भएर घर फर्किएका छन् ।