कान्तिपुर वेबसाईट
AdvertisementAdvertisement

नेपालगन्जको राजस्व कार्यालय नै आइसोलेसन सेन्टर

रुपा गहतराज

नेपालगन्ज — आन्तरिक राजस्व कार्यालयका धेरै कर्मचारीमा कोरोना देखिएपछि कार्यालयलाई आइसोलेसन सेन्टर बनाइएको छ ।


जिल्ला स्वास्थ्य कार्यालयका अधिकृत एवं कोरोनाका फोकलपर्सन नरेश श्रेष्ठले कोरोना देखिएका निजामति कर्मचारीलाई राख्नका लागि आन्तरिक राजस्व कार्यालयलाई आइसोलेसन सेन्टरका रुपमा प्रयोगमा ल्याइएको बताए । उनका अनुसार अहिले सो आइसोलेसनमा १२ जनालाई राखिएको छ ।

आन्तरिक राजस्वका अधिकृतहरुसहित त्यहीँ बस्ने १२ जनामा कोरोना देखिएको छ । कार्यालय बन्द रहेकाले त्यहाँका कर्मचारीहरुलाई त्यहीँ राखिएको हो ।

आन्तरिक राजस्व कार्यालयका ११ जना कर्मचारीमध्येमा चारजना बाँके, सुर्खेतका दुई जना, बर्दिया तथा अर्घाखाँची, कञ्चनपुर, सर्लाही र प्यूठानका एक–एक जना रहेका छन् ।

बाँकेमा आइतबारदेखि तीन दिनसम्म निषेधाज्ञा

यसअघि बन्द गरिएको आइसोलेसन सेन्टर पुनः सञ्चालन उनीहरुलाई राखिएको छ । लायन्स डेन्टल अस्पताल पुनः सञ्चालनमा ल्याइएको छ । आदर्शनगर र खजुराको आइसोलेसन सेन्टर सञ्चालनमै रहेका छन् । बाँकेमा आइसोलेसनमा रहेका संक्रमितको संख्या ५४ पुगेको छ ।

प्रकाशित : श्रावण १६, २०७७ १५:२३
प्रतिक्रिया
पठाउनुहोस्

भदौबाट विद्यालय सञ्चालन कार्यविधि बनाउन छलफल सुरु

गणेश राई

काठमाडौँ — शिक्षा, विज्ञान तथा प्रविधि मन्त्रालयले भदौबाट विद्यालय खोल्नका निम्ति सरोकार निकायसँग छलफल थालेको छ । कोभिड–१९ फैलिन नदिन भएको लकडाउनले वैशाखबाट सुरु हुनुपर्ने शैक्षिक सत्रको हालसम्म सुरु भएको छैन । सरकारले विद्यालयमा रहेका क्वारेन्टाइन र आइसोलेसन सेन्टर हटाउने, भदौ १ गतेबाट विद्यालय खोल्ने लगायत निर्णय गरेपछि मन्त्रालय गृहकार्य थालेको हो ।

मन्त्रालयले गठन गरेको शैक्षिक सत्र २०७७ क्यालेन्डर व्यवस्थापन कार्यदलले शुक्रबार शिक्षक महासंघ, प्याब्सन, नेसनल प्याब्सन, अभिभावक महासंघ, राष्ट्रिय परीक्षा बोर्ड, पाठ्यक्रम विकास केन्द्रका प्रतिनिधिलाई निमन्त्रणा गरी परामर्श लिएको हो । विद्यालय खोल्ने, विद्यार्थी भर्ना गर्ने, पठनपाठन गर्नेबारेमा प्रारम्भिक छलफल भएको जनाइएको छ ।

पहिलो बैठकमा सामान्य छलफलमात्र भएको शिक्षा मन्त्रालयका प्रवक्ता दीपक शर्माले जनाएका छन् । ‘मन्त्रीपरिषदले भदौ १ गतेबाट विद्यालय खोल्ने निर्णय गरेपछि शैक्षिक क्यालेन्डरबारे सरोकार पक्षलाई बोलाएर प्रारम्भिक छलफल गरेका छौं,’ कार्यदलका संयोजकसमेत रहेका शर्माले भने, ‘छलफल सुरु गरेका छौं । उहाँहरुले सांगठनिक छलफल गर्नु हुनेछ ।’

‘भदौ १ गतेबाट शैक्षिक सत्र आरम्भ गरी भर्ना लिने र १५ गतेबाट पठनपाठन सुरु गर्न उपयुक्त हुने सुझाव दिएका छौं,’ प्याब्सनका सहअध्यक्ष डिके ढुंगानाले भने, ‘विद्यार्थी पाठ्यभार जम्मा १ सय ९२ दिन अर्थात् १ हजार २४ घन्टा क्रेडिट आवर हो र ७० प्रतिशत हाजिर हुनुपर्छ ।’ यस निम्ति दसैंमा ८ दिन र तिहारमा २ दिन र अन्य चाडवाडको बिदा कटौती गर्नुपर्ने सुझाव पेस गरेको उनले बताए । शैक्षिक सत्र आगामी २०७८ वैशाख १३ गते सक्ने प्रस्ताव गरेको उनले जनाए । अर्को नयाँ सत्र वैशाख २२ गतेबाट सुरु गर्न उपयुक्त हुनसक्ने सुझाव दिइएको जनाइएको छ ।


प्रकाशित : श्रावण १६, २०७७ १४:४७
पूरा पढ्नुहोस्
प्रतिक्रिया
पठाउनुहोस्
×