काठ तस्करीको अभियोगमा ११ जना पक्राउ- प्रदेश ५ - कान्तिपुर समाचार

काठ तस्करीको अभियोगमा ११ जना पक्राउ

दुर्गालाल केसी

दाङ — काठ तस्करीको अभियोगमा देउखुरीमा ११ जना पक्राउ परेका छन् । राप्ती गाउँपालिका–४ देविकोटस्थित राष्ट्रिय वनबाट आइतबार राति १२ बजेतिर सालको काठ ल्याउँदै गरेको अवस्थामा उनीहरुलाई पक्राउ गरिएको डिभिजन वन कार्यालय लमहीका प्रमुख प्रविण विडारीले बताए । उनीहरुको साथबाट १५ थान काठ बरामद भएको उनले जानकारी दिए ।



पक्राउ पर्नेमा राप्ती गाउँपालिका–४ का २५ वर्षीय विरबहादुर वली, १८ वर्षीय शिशिर शाही, १९ वर्षीय शेखर थापा, ३६ वर्षीय तिलक नेपाली, २७ वर्षीय विष्णु गिरी, १८ वर्षीय राहुल भुसाल र २१ वर्षीय मनोज श्रेष्ठ छन् । यसैगरी राप्ती गाउँपालिका–८ का २४ वर्षीय दुर्गे थापा, १९ वर्षीय हेम थापा, २५ वर्षीय प्रकाश कुमाल र २० वर्षीय सञ्जिव विक पक्राउ परेको विडारीले बताए । उनीहरुलाई नियन्त्रणमा राखेर थप अनुसन्धान गरिरहेको उनले बताए । अन्य १० जना फरार रहेको र उनीहरुको खोजी भइरहेको विडारीले जानकारी दिए ।

प्रकाशित : श्रावण १२, २०७७ १९:२१
प्रतिक्रिया
पठाउनुहोस्

जीपले ठक्कर दिँदा दाङमा २ जना पैदल यात्रीको मृत्यु

दुर्गालाल केसी

दाङ — पूर्व–पश्चिम राजमार्ग अन्तर्गत दाङको पिपरीमा भएको सवारी दुर्घटनामा दुईजनाको मृत्यु भएको छ । पूर्वबाट पश्चिमतर्फ गइरहेको बा २० च ५७४४ नम्बरको जीपले ठक्कर दिँदा राप्ती गाउँपालिका–८ पिपरीका ५० वर्षीय राजकुमार चौधरी र ८ वर्षीय निशान चौधरीको मृत्यु भएको हो ।

शनिबार बेलुका जीपको ठक्करबाट घाइते भएका पाँचजना पैदल यात्रीमध्ये राति राजकुमारको उपचारका क्रममा कोहलपुर र निशानको बुटवलमा मृत्यु भएको हो ।

जीपको ठक्करबाट घाइते भएका पिपरीका २२ वर्षीया गौरी चौधरी, उनकी २ वर्षीया छोरी लक्ष्मी चौधरी र ७ वर्षीया सृष्टि गुरुङको बुटवलमा उपचार भइरहेको जिल्ला प्रहरी प्रवक्ता डीएसपी सुमित खड्काले बताए । चालक र गाडी नियन्त्रणमा रहेको र घटनाबारे थप अनुसन्धान भइरहेको उनले जानकारी दिए ।

प्रकाशित : श्रावण ११, २०७७ १२:१०
पूरा पढ्नुहोस्
प्रतिक्रिया
पठाउनुहोस्
×