चन्दका दाजु अदालत परिसरबाटै पुन: पक्राउ

दुर्गालाल केसी

दाङ — नेत्रविक्रम चन्दका दाजु चन्द्रबहादुर चन्दलाई प्रहरीले सोमबार घोराहीस्थित जिल्ला अदालत परिसरबाटै पुन: पक्राउ गरेको छ । धरौटी बुझाएर अदालतबाट निस्कँदै गर्दा उनलाई प्रहरीले पक्राउ गरेको हो । 

अदालतले गत पुस ७ मा चन्दसहित प्रतिबन्धित नेकपाका २१ नेताहरुलाई प्रतिव्यक्ति १५ हजार धरौटी बुझाएर छोड्न आदेश दिएको थियो । त्यतिबेला अदालतबाहिर व्यापक प्रहरी तैनाथ गरिएकाले फेरि पक्राउ पर्ने आशंकाले उनीहरु धरौटी नबुझाएर कारागार गएका थिए । सोमबार धरौटी बुझाएर अदालतले छोडेपछि उनलाई पुन: पक्राउ गरी अर्को मुद्दा चलाउन काभ्रे जिल्ला लगिएको छ । ५९ वर्षीय चन्दको घर शिवराज नगरपालिका ८ कपिलवस्तु हो ।

प्रहरीले गत असोज ३० मा दाङको राजपुर गाउँपालिका ४ मगराइनास्थित जंगलमा बैठकस्थल नियन्त्रणमा लिई मध्यपश्चिम कमाण्ड इन्चार्ज रहेका चन्दसहित २१ नेताहरुलाई पक्राउ गरेको थियो । स्थानीय ज्ञानेन्द्रविक्रम रानाको घरमा मध्य कमाण्डको बैठक बसेर सुतिरहेको बेला राति १ बजे प्रहरीले घेरा हालेर पक्राउ गरेको थियो । उनीहरुविरुद्ध प्रहरीले संगठित अपराध र राज्यविरुद्धको अपराधमा मुद्दा दर्ता गरेको थियो ।

अदालत परिसरमा पत्रकारहरुसँग संक्षिप्त प्रतिक्रिया दिँदै चन्दले सरकारले आफैले बनाएका नियम कानुन मिचिरहेको बताए । ‘सरकारले अदालतको आदेशको अवज्ञा गरिरहेको छ । अदालतले छोड्दा पनि हामीलाई पक्राउ गरिन्छ । सरकार आफै कानुन मिच्न अघि बढेको छ,’ उनले भने,‘हामीलाई पटक-पटक पक्राउ गरेर अनावश्यक दु:ख दिन खोजिएको छ । यसबाट हामी विचलित भएका छैनौं, थकाउन खोजिए पनि थाक्ने छैनौं ।’

प्रकाशित : असार १५, २०७७ १७:१५
प्रतिक्रिया
पठाउनुहोस्

नेपालमा ३ हजार १३४ कोरोना संक्रमित निको भए

कान्तिपुर संवाददाता

काठमाडौँ — थप १ सय २१ जना कोरोनालाई जितेर घर फर्किएका छन् । पछिल्लो २४ घण्टामा १३ महिला र १०८ पुरुष गरी मुलुकभर १२१ जना संक्रमित निको भएर डिस्चार्ज भएको  स्वास्थ्य तथा जनसंख्या मन्त्रालयले जनाएको छ । योसँगै हालसम्म नेपालमा कोरोनाबा निको हुनेको संख्या ३ हजार १३४ पुगेको छ ।

२४ घन्टामा डिस्चार्ज हुनेहरुमा बीपी कोइराला स्वास्थ्य विज्ञान प्रतिष्ठानबाट झापाका १ , पर्साका २३ , अल्पमाई नर्सिङ इन्स्टिच्युटबाट १३ , कोभिड अस्पताल जनकपुरबाट धनुषाका ३ , महेन्द्र गेनाइ सिरहाबाट १४ , पोखरा स्वास्थ्य विज्ञान प्रतिष्ठानबाट कास्कीका २, म्याग्दी अस्पतालबाट ३ , पर्वत अस्पतालबाट ८ , स्याङजा अस्पतालबाट ३३ , तनहुँ अस्पालबाट ५ , नुवाकोट अस्पतालबाट ८ , सुशील कोइरला प्रखर क्यान्सर अस्पतालबाट २ , आदर्शनगर आइसोलेसन सेन्टर बाँकेबाट ३ र आइसोलेसन सेन्टर खुजरा बाँकेबाट ३ जना डिस्चार्ज भएका हुन् ।

मन्त्रालयका अनुसार सोमबारसम्म नेपालमा आरडीटी विधिबाट २ लाख ९७ हजार ८७१ नमुना परीक्षण भएका छन् । २४ घण्टामा १ हजार ८२२ आरडीटी परीक्षण भएका छन् । पीसीआर विधिबाट भने हालसम्म २ लाख २३ हजार ६३० परीक्षणहरु गरिएका छन् र २४ घण्टामा ७ हजार ७९१ परीक्षण भएका छन् ।

हालसम्म क्वारेन्टाइनमा रहनेको संख्या ५७ हजार ३६८ जना रहेका छन् ।त्यसैगरी आइसोलेसनमा रहनेको संख्या १० हजार ८५ जना रहेको छ ।

प्रकाशित : असार १५, २०७७ १७:०३
पूरा पढ्नुहोस्
प्रतिक्रिया
पठाउनुहोस्
×