अगैया पुलबाट ट्याक्टर खस्दा २ को मृत्यु
नेपालगन्ज — सोमबार बाँकेको अगैयास्थित सिक्टा सिचाइंको मुख्य बाँधबाट ट्याक्टर नदीमा खसेर बेपत्ता भएका थप एकको शव भेटिएको छ ।
राप्तीसोनारी गाउँपालिकास्थित सिक्टा सिचाइं आयोजनाको ब्यारेजबाट नदीमा ट्याक्टर खस्दा बेपत्ता भएका राप्तीसोनारी गाउँपालिका–३ भगवतीपुरका ट्याक्टर चालक सुनिल चौधरीको शव भेटिएको हो ।
राप्ती नदीमा हराइरहेका ना ७ त ५१८ नम्बरको ट्याक्टरका चालक चौधरीलाई मंगलबार मृत अवस्थामा फेला पारिएको अस्थायी प्रहरी चौकी अगैयाका प्रहरी सहायक निरक्षक राजेन्द्र बस्नेतले बताए ।
अनियन्त्रित ट्याक्टरसहित तीन जना नदीमा खसेका थिए । दुर्घटना लगत्तै बेपत्ता एकजनाको जिवितै उद्धार गरिएको थियो भने सोमबार बेलुका एक जनाको शव भेटिएको थियो ।
कुसुमस्थित सशस्त्र प्रहरीको गोताखोरले राप्तीसोनारी गाउँपालिका –३ भगवतीपुरका २६ वर्षीय चुर्णबहादुर थारुको सोमबार बेलुका नै शव फेला परेको थियो ।
प्रकाशित : असार २, २०७७ १६:५२
