प्युठानका क्वारेन्टाइन भरिए- प्रदेश ५ - कान्तिपुर समाचार

प्युठानका क्वारेन्टाइन भरिए

पालिकाहरूले तयार पारेको प्रारम्भिक तथ्यांकअनुसार भारतलगायत अन्य मुलुकबाट एक साताभित्र पन्ध्र हजारभन्दा बढी भित्रिँदै छन्   
गिरुप्रसाद भण्डारी

प्युठान — भारतबाट आउनेहरूको दिनहुँजसो लर्के लागेपछि जिल्लाका पालिकाहरूलाई तिनको व्यवस्थापन गर्न हम्मे परेको छ । विद्यालय, सामुदायिक भवनमा बनाइएका क्वारेन्टाइनस्थल भरिभराउ भएका छन् । 

भारतबाट आएर कपिलवस्तुको कृष्णनगर, बाँकेका नेपालगन्ज, रुपैडिहालगायत सीमाक्षेत्रमा अलपत्र परेका जिल्लावासीलाई उद्धार गर्न थालिएसँगै क्वारेन्टाइन भरिएका हुन् ।

उनीहरूलाई जिल्ला समन्वय समिति, जिल्ला प्रशासन कार्यालय तथा स्थानीय तहको समन्वयमा उद्धार गर्न थालिएको हो । भारतबाट आएकालाई क्वारेन्टाइनमा व्यवस्थापन गर्न समस्या पर्न थालेको प्युठान नगरपालिकाका मेयर अर्जुनकुमार कक्षपतिले बताए । उनका अनुसार नगरपालिकाका क्वारेन्टाइनमै झन्डै एक हजार जना बसेका छन् ।

प्रहरीका अनुसार आइतबारदेखि बुधबारसम्म झन्डै ४ हजार जना जिल्ला भित्रिएका छन् । उनीहरूलाई स्थानीय तहका क्वारेन्टाइनमा राखिएको जिल्ला प्रहरी कार्यालयका प्रमुख डीएसपी नरेन्द्रकुमार कार्कीले बताए । क्वारेन्टाइनमा बसेकालाई सुरक्षा दिन प्रहरीलाई समेत समस्या पर्न थालेको छ । पालिकाहरूले बनाएको प्रारम्भिक तथ्यांकअनुसार भारतलगायत अन्य मुलुकबाट एक साताभित्र पन्ध्र हजारभन्दा बढी भित्रिनेछन् ।

क्वारेन्टाइनमा बसेकाको आरडीटी गर्ने किट र पीसीआरका लागि भीटीएम अभाव रहेको जिल्ला स्वास्थ्य कार्यालयका प्रमुख विशाल सुवेदीले बताए । हालसम्म जिल्लाबाट पठाइएकामध्ये १२१ जनाको पीसीआर परीक्षण भएको छ । सबैको रिपोर्ट नेगेटिभ आएको छ । १५ जनाको रिपोर्ट आउनै बाँकी छ ।

जिल्लामा ९ सय १८ जनाको आरडीटी गरिएको सुवेदीले बताए । प्युठानमा अहिलेसम्म कसैमा कोरोना नदेखिए पनि भारतबाट आउनेहरू बढेको र छिमेकी गुल्मी, अर्घाखाँची, बागलुङ र दाङमा संक्रमितहरू भेटिएकाले जोखिम कायमै छ ।

प्रकाशित : जेष्ठ १४, २०७७ १४:०७
प्रतिक्रिया
पठाउनुहोस्

झापाका थप १७ जनामा संक्रमण पुष्टि

प्रदेश १ मा संक्रमितको संख्या १०४ पुग्यो
माधव घिमिरे

विराटनगर — झापाका थप १७ जना व्यक्तिमा कोरोना भाइरसको संक्रमण पुष्टि भएको छ। यीसहित प्रदेश १ मा संक्रमितको संख्या १ सय ४ पुगेको छ।

बुधबार संक्रमण पुष्टि भएकाहरु झापाको कचनाकवल र गौरादहका व्यक्ति भएको प्रदेश १ मुख्यमन्त्री तथा मन्त्रिपरिषद कार्यालयमा रहेको कोरोना सूचना डेस्कले जनाएको छ। यसअघि देखिएका संक्रमितहरुको सम्पर्कमा आएका र भारतबाट आएकाहरुको स्वाब नमुना संकलन गरी विराटनगरस्थित कोसी अस्पतालको प्रयोगशालामा परीक्षण गर्दा संक्रमण पुष्टि भएको हो ।

प्रदेश १ का १४ मध्ये सात जिल्लामा संक्रमण पुष्टि भइसकेको छ । झापा, उदयपुर, मोरङ, सुनसरी, भोजपुर, खोटाङ र धनकुटामा संक्रमित भेटिएका हुन् ।

झापामा संक्रमितको संख्या ५४ पुगेको छ । यो प्रदेश १ मा संक्रमित भेटिएका जिल्लामध्ये सबैभन्दा बढी हो ।

अधिकांश संक्रमित भारतबाट आएकाहरु छन् । संक्रमितहरुको विराटनगरस्थित कोभिड–१९ उपचार केन्द्रमा राखेर हेरचार गर्ने गरिएको छ । त्यहाँ राखिएकामध्ये २६ जना डिस्चार्ज गरिएका छन् ।

प्रकाशित : जेष्ठ १४, २०७७ १४:०५
पूरा पढ्नुहोस्
प्रतिक्रिया
पठाउनुहोस्
×