एकैदिन बाँकेको नरैनापुरमा २७ संक्रमित थपिए, एउटै पालिकामा ११३ मा कोरोना

ठाकुरसिंह थारु

नेपालगन्ज — बाँकेको नरैनापुर गाउँपालिकामा शनिबार २७ जनामा कोरोना भाइरस (कोभिड १९) संक्रमण भएको पुष्टि भएको छ ।

दाङस्थित राप्ती विज्ञान प्रतिष्ठान अस्पतालको प्रयोगशालामा गरिएको परीक्षणमा एउटै पालिकामा एकैदिन २७ जनामा संक्रमण देखिएको हो । योसँगै नरैनापुर गाउँपालिकामा मात्रै संक्रमितको संख्या १ सय १३ पुगेको छ । नरैनापुरस्थित मदरसाका ६, नरैनापुर ३ राष्ट्रिय प्रावि गेगलीमा क्‍वारेन्टाइनमा बसेका १५ र नरैनापुर १ राष्ट्रिय प्रावि महतेनीयाको क्‍वारेन्टाइनमा रहेका ६ जनामा शनिबार संक्रमण देखिएको जिल्ला स्वास्थ्य कार्यालयले जनाएको छ । व्यवस्थित क्‍वारेन्टाइन नहुँदा संक्रमण बढेको चिकित्सकहरुले जनाएका छन् ।

शुक्रबार संक्रमित १३ जना भागेपछि सुरक्षाकर्मीहरुले खोजी गरी नेपालगन्ज ल्याउने तयारी गरिरहेका छन् । संक्रमितहरुलाई नेपालगन्ज ल्याउने क्रममा स्थानीयले विरोध जनाउँदै आएका छन् । उनीहरुले नरैनापुरमै आइसोलेसन वार्ड बनाउन माग गर्दै आएका छन् ।

प्रकाशित : जेष्ठ १०, २०७७ १७:१४
ADVERTISEMENT
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT

कोभिड अस्पतालमा जडान भएन उपकरण, संक्रमितलाई अन्यत्र पठाइँदै

बीपी प्रतिष्ठानको कोभिड-१९ अस्पतालको उपकरण जडानमा टेन्डर प्रकियाले ढिलाइ भएको छ । हाल संक्रमितलाई यहाँ नराखेर विराटनगर पठाउने गरिएको छ ।
प्रदीप मेन्याङ्बो

सुनसरी — धरानस्थित बीपी कोइराला स्वास्थ्य विज्ञान प्रतिष्ठानको कोभिड–१९ अस्पतालमा अझै पनि महत्वपूर्ण उपकरण जडान हुन सकेका छैनन् । गत वैशाख १३ गते उक्त अस्पतालको अनौपचारिक उद्घाटन गरिएको थियो ।


करिब १२ करोड ५० लाख रुपैयाँ लागतमा स्थापना गरिएको अस्पतालमा भेन्टिलेटरसहितको १३ आइसीयू बेड, अल्ट्रासाउन्ड, अत्याधुनिक एक्स–रे, डेफिब्रिलेटर, संक्रमित बच्चाका लागि पेडियाट्रिक आईसीयू, डायलसिस, अप्रेसन थिएटर, हाई डिपेन्डेन्सी युनिट, प्रयोगशाला, गाइनो वार्ड लगायतका उपकरण राखिने भनिएको थियो । हालसम्म माग गरिएका कुनै उपकरण आएका छैनन् ।

प्रदेश १ का मुख्यमन्त्री शेरधन राईले अनौपचारिक उद्घाटन गरेको अस्पतालका लागि चाहिने उपकरण अझै जडान नभएपछि संक्रमितलाई उपचारका लागि यहाँ नराखेर विराटनगर पठाउने गरिएको छ । कतिपयलाई प्रतिष्ठानले आइसोलेसन वार्ड बनाएको पेइङ वार्डमा राखिएको छ ।

प्रतिष्ठानले संघीय सरकार र प्रदेश सरकारको करिब १२ करोड ५० लाख रुपैयाँको लागतमा कोभिड अस्पताल बनाएको बताए पनि हालसम्म आवश्यक उपकरण जडान नहुँदा संक्रमितको उपचारमा समस्या भएको प्रतिष्ठान स्रोतले जनाएको छ । प्रतिष्ठानका उपकुलपति प्राडा. ज्ञानेन्द्र गिरिले माग गरिएका उपकरणका लागि विधिवत् प्रक्रिया पुर्‍याएर पारदर्शी रुपमा टेन्डर गर्नुपर्ने भएकाले केही ढिलाइ भएको बताए । ‘प्रकिया सकिएको छ, यो साता उपकरण जडान हुन्छ,’ उनले भने, 'सरकारले यो अस्पताललाई संक्रमितका उपचारका लागि पहिलो नम्बरमा राखेको छ ।' उनले कतिपयले कुरा नबुझेर कोरोना संक्रमित बिरामी प्रतिष्ठानबाट अन्यत्र पठाएको गुनासो गरेको सुनेको बताए । ‘संक्रमित भए पनि सामान्य अवस्थाकालाई अन्यत्र पठाएको हो,' उनले भने, 'यहाँ कोरोनाका गम्भीर बिरामीलाई मात्र बढी प्राथमिकता दिएर राखिन्छ भन्ने बुझ्न जरुरी छ ।’

उनका अनुसार अहिले प्रतिष्ठानमा २ सय ६० बेडको कोरोना अस्पतालको क्षमता छ । संक्रमितको संख्या बढ्दै गए र गम्भीर बिरामी थपिए प्रतिष्ठानको एकेडेमिक हलमा ३ सय बेडमा विस्तार गर्न सकिने उनको भनाइ छ ।

सरकारले प्रतिष्ठानमा द्वन्द्वपीडितहरुको नि:शुल्क उपचारका लागि बनाएको पुनर्स्थापना केन्द्रको भवनलाई कोभिड–१९ अस्पताल बनाएको हो । उक्त भवन पहिले हाडजोर्नी विभागमातहत फिजियो थेरापीको इकाइ रहेको थियो ।

प्रकाशित : जेष्ठ १०, २०७७ १७:१०
पूरा पढ्नुहोस्
ADVERTISEMENT
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT
×