काठमाडौंबाट अर्घाखाँची आएकालाई क्वारेन्टाइनमा राखिएन

ठूलो संख्यामा भित्रिएकालाई कसरी व्यवस्थापन गर्ने भनेर जिल्ला प्रशासन कार्यालयमा जनप्रतिनिधिसहित बसेको बैठकले १४ दिन अनिवार्य क्वारेन्टाइनमा राख्नुपर्ने निर्णय गरेको थियो । ‘हामीले सबैलाई क्वारेन्टाइनमा राख्न भनेर पालिकालाई जिम्मा दियौं तर जनप्रतिनिधिले राखेनन्,’ सहायक प्रजिअ विष्णुराज बेल्वासेले भने ।

भारतलगायत तेस्रो मुलुकबाट नभई काठमाडौंबाट आएकालार्ई सुरक्षित ठानेर क्वारेन्टाइनमा नराखिएको पाणिनी गाउँपालिकाका अध्यक्ष अच्युत गौतमले बताए । ‘केही बिरामी हुन थाले क्वारेन्टाइनमा राख्छौं, अहिले सबै घरपरिवारसँग गए,’ उनले भने ।

मालारानी गाउँपालिकाले नयाँ आएकालाई तापक्रम नापेर घर पठायो । ‘काठमाडौंबाट आएका भएकाले स्वास्थ्य चेक गरेर घर पठायौं, क्वारेन्टाइनमा बस्न भनेको मानेनन्,’ अध्यक्ष बालकृष्ण आचार्यले भने ।

भूमिकास्थान नगरमा भने सबैलाई क्वारेन्टाइन अनिवार्य गरिएको छ । ‘नगरप्रमुख रेशम थापा र उपप्रमुख खडानन्द बेल्वासेले काठमाडौंबाट आएकाहरू क्वारेन्टाइनमा नबस्ने भए फर्किनू भनेर अडान लिएपछि सबै बस्न तयार भए,’ प्रमुख प्रशासकीय अधिकृत नारायणप्रसाद भण्डारीले भने ।