'लकडाउन' अवज्ञा गर्ने २ सय सवारी साधन कारबाहीमा

घनश्याम गौतम

(रुपन्देही) — प्रहरीले प्रदेश ५ को अस्थायी राजधानी बुटवलबाट २ सय बढी सवारी साधन र चालकलाई नियन्त्रणमा लिएको छ ।

सरकारले जारी गरेको लकडाउन अवज्ञा गर्दै सडकमा चलेका सवारी सधान मंगलबार बिहानैदेखि नियन्त्रणमा लिएर राखेको हो । तीमध्ये २ जनाले मापसे गरी सवारी चलाएको फेला परेका छन् । उनीहरुलाई बुटवलका विभिन्न ठाउँबाट नियन्त्रणमा लिइएको इलाका प्रहरी कार्यालय बुटवलका प्रहरी नायव उपरीक्षक भिमलाल भट्टराईले बताए ।


नियन्त्रण लिएका सवारी साधन र व्यक्तिलाई ट्राफिक प्रहरी कार्यालय प्रदेश ५, ईलाका प्रहरी कार्यालय, वडा प्रहरी कार्यालय, रामनगर लगायतका स्थानमा राखिएको छ । भट्टराईले सडकमा अनावश्यक रुपमा गुडिरहेका मोटरसाइकल, स्कुटी र कारलाई नियन्त्रणमा राखिएको जनाए ।


पहिलो पटक भएकाले कागज बनाएर साँझमात्र छोडिने प्रदेश ५ ट्राफिक प्रहरी प्रमुख मधुसुदन लुइँटेलले बताए । प्रहरीले मादक पदार्थ सेवन गरेर मोटरसाइकलमा होहल्ला गर्दै हिँडेका बुटवलकै हेमन्त घिमिरे र नवराज श्रेष्ठलाई पनि नियन्त्रणमा राखेको छ ।

प्रकाशित : चैत्र ११, २०७६ १५:१३
प्रतिक्रिया
पठाउनुहोस्

सिरहामा निषेधाज्ञा जारी

भरत जर्घामगर

(सिरहा) — कोरोना (कोभिड–१९) को संक्रमण फैलिन नदिन जिल्ला प्रशासन कार्यालय सिरहाले मंगलबारदेखि एक साताका लागि निषेधाज्ञा जारी गरेको छ ।

सजगता अपनाउन, संक्रमणको विस्तारलाई रोक्न तथा सचेतनात्मक र प्रवर्द्धनात्मक कार्यहरु गरी संभावित संक्रमणले प्रभाव पार्न सक्ने कुनै किसिमका गतिविधि हुन नदिन स्थानीय प्रशासन ऐन, २०२८ को दफा ६(३) बमोजिम निषेधाज्ञा जारी गरिएको जिल्ला प्रशासन कार्यालय सिरहाले जनाएको छ । प्रमुख जिल्ला अधिकारी सरोजप्रसाद गुरागाईंले मंगलबार बिहान ६ बजेदेखि चैत १८ गते बिहान ६ बजेसम्म निषेधाज्ञा जारी गरिएको जानकारी दिए ।

निषेधाज्ञा अवधिभर आपत्‌कालीन र अत्यावश्यक कामबाहेक घरबाहिर हिँडडुल नगर्न, सवारी साधन नचलाउन प्रशानले आग्रह गरिएको छ । स्थानीय प्रशासन ऐन, २०२८ को दफा ६(३)मा कसैले कुनै काम गर्न लाग्दा वा कहीं केही वस्तु रहँदा वा कसैले राख्दा हुलदङ्गा भई शान्ति सुरक्षा भंग हुने वा कसैलाई बाधा विरोध पर्ने वा जनस्वास्थ्यलाई खराब असर पर्ने सम्भावना भएमा प्रमुख जिल्ला अधिकारीले निषेध गर्न आदेश दिनसक्ने व्यवस्था छ ।
प्रशासनले निषेधाज्ञाको उल्लंघन भए नियन्त्रणमा लिएर संक्रामक रोग ऐन, २०२० अनुसार कारबाही गरिने जनाएको छ ।


प्रकाशित : चैत्र ११, २०७६ १५:०५
पूरा पढ्नुहोस्
प्रतिक्रिया
पठाउनुहोस्
×