प्रदेश ५ को 'नाम' र 'राजधानी' हिउँदे अधिवेशनमै टुंगो लगाउने तयारी

सन्जु पौडेल

रुपन्देही — माघ ५ गतेबाट सुरु हुने प्रदेशसभाको हिउँदे अधिवेशनले प्रदेशको नाम र राजधानी टुंगो लगाउने सत्तरुढ दलका नेताले दाबी गरेका छन् । नेकपा प्रदेश ५ का प्रमुख सचेतक भूमिश्वर ढकालले आगामी हिउँदे अधिवेशनले राजधानी र प्रदेशको नाम तय गर्ने दाबी गरे । 

प्रदेश ५ को प्रदेशसभा भवन । तस्बिर : घनश्याम/कान्तिपुर

‘सरकारले प्रदेशको नामाकरण र केन्द्र निर्धारणका लागि गठन गरेको विशेष समितिले प्रतिवेदन बुझाएको छ,’ उनले भने, ‘सोही अधिवेशनबाट प्रतिवेदन अनुरुप नै स्थायी केन्द्र तोकिने छ ।’ उक्त समितिले १२ जिल्लामा पुगेर स्थानीय तह, राजनीतिक दल, संघसंस्था, बुद्धिजिवी र नागरिकबाट संकलन गरेको निष्कर्षका आधारमा छलफल गरेर टुंगो लगाइने उनले बताए । ‘प्रतिवेदन सार्वजनिक भएपछि राम्रा र नराम्रा पक्षको विषयमा अध्ययन गरेर सबै जनतालाई अपनत्व महसुस गर्ने कुरालाई ध्यान दिइने छ,’ रिपोर्टस क्लब प्रदेशले मंगलबार आयोजना गरेको साक्षात्कारमा उनले भने, ‘यसै विषयमा छलफल गर्न माघ ४ गते नेकपाको संसदीय दलको बैठक आयोजना गरिएको छ । ’


सुझाव संकलन समितिकी सदस्य तथा कांग्रेस सचेतक निर्मला क्षेत्रीले प्रतिवेदन बुझाइसकेको अवस्थमा छिट्टै राजधानी र नामको टुंगो लाग्ने बताइन् । यहाँका १२ जिल्ला बाहेक छिमेकी राष्ट्र भारतको हरियाणा प्रदेशको समेत अध्ययन भ्रमण गरेर समितिले प्रतिवेदन तयार गरेको उनले बताइन ।


‘स्थायी संरचना भत्काउने गरी राजधानी तोकिँदैन,’ उनले भनिन, ‘प्रदेशका लागि आवश्यक संरचना निर्माण भइसकेको स्थान नबिग्रने गरी राजधानी तोक्न फेरि पनि मेरो सुझाव छ ।’ राजधानी तोक्ने विषय दलभन्दा माथिको भएकाले सोही अनुरुप समितीका सदस्यले तथ्यांक संकलन गरी प्रतिवेदन बुझाएको उनले जनाइन् ।


समितिको प्रतिवेदनमा विश्वास नगरी पुनःअर्को समिति गठन गरेर पठाएकोप्रति चिन्ता व्यक्त गर्दै उनले यसरी समय लम्ब्याउन नहुने बताइन् । कांग्रेस प्रदेशको आर्थिक बचततर्फ केन्द्रीत रहेकाले भएको संरचना नोक्सान गरी अन्यत्र राजधानी बनाउने विषयमा नरहेको उनले बताइन् ।


समाजवादी पार्टीका सचेतक सन्तोष पाण्डेले बुद्ध जन्मस्थल लुम्बिनी नै प्रदेशको नाम हुने बताए । लुम्बिनी नाम राख्न अन्य प्रदेश पनि लालायित हुने अवस्थामा आफ्नै प्रदेश त्यसबाट चुक्न नहुने बताए । ‘अस्थायी राजधानी नै स्थायी राजधानीका लागि उपयुक्त छ,’ उनले भने, ‘यसको निर्णय कुनै पार्टीले नभई प्रदेश सभामा निर्वाचित सदस्यले गर्नेछन् ।’ सहज ढंगले तोक्न सकिने केन्द्र र प्रदेशको नाममा विवाद र अन्य दलगत छलफल आवश्यक नरहेको उनले जिकिर गरे ।


जनताले विश्वास गरेर पठाएकाले राजधानीको विषय टुंगो लगाउनेतर्फ पाइला अल्झिरहन नहुने बताए । भौतिक पूर्वाधार र अथाह आर्थिक विकासको सम्भावना बोकेको रुपन्देही नै राजधानी हुने उनले दोहोर्याए । राजधानीको विषय स्थानको आलोपाले गर्ने सवाल नभएकाले स्थायी सदरमुकाम तोक्न प्रदेशसभाले ढिलाई गर्न नहुने उनले बताए ।

प्रकाशित : पुस २९, २०७६ १५:५८
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT

एक हप्ताभित्र प्रदेश लोकसेवा आयोग गठन : मुख्यमन्त्री राई

देवनारायण साह

मोरङ — प्रदेश–१ का मुख्यमन्त्री शेरधन राईले एक हप्ताभित्र प्रदेश लोकसेवा आयोग गठन गर्ने बताएका छन् । प्रदेश समन्वय परिषद्को तेस्रो बैठकको समापनमा मंगलबार उनले जनशक्ति अभावले जनभावना अनुसार काम अघि बढ्न नसकेकोले कर्मचारी भर्ना प्रक्रिया सुरु गर्न एक हप्ताभित्र लोकसेवा आयोग गठन गर्ने बताएका हुन् । संघीय सरकारले निजामती ऐन निर्माण नगरेकोले कर्मचारी भर्ना प्रक्रिया तत्काल सुरु गर्न कठिनाई भएको राईको भनाई थियो।

बैठकमा स्थानीय तहका जनप्रतिनिधिहरुले प्रदेश लोकसेवा आयोग गठन गरी जनशक्ति व्यवस्थापनको माग गरेका थिए ।

अख्तियार दुरुपयोग अनुसन्धान आयोगले सोमबार प्रदेश प्रमुख सोमनाथ अधिकारीलाई बुझाएको २९ औं वार्षिक प्रतिवेदनमा पनि प्रदेश लोकसेवा आयोग गठन तथा योग्यता प्रणालीका आधारमा कर्मचारी नियुक्ती गर्न सुझाव दिएको थियो ।

प्रदेश–१ को मन्त्रीपरिषदले प्रदेश लोकसेवा आयोगको कार्यालय विराटनगरमा राख्ने मंसिर २४ गते निर्णय गरिसकेको छ ।

प्रकाशित : पुस २९, २०७६ १५:५१
पूरा पढ्नुहोस्
प्रतिक्रिया
पठाउनुहोस्
ADVERTISEMENT
×