हात्तीले पल्टायो सीमा स्तम्भ

कान्तिपुर संवाददाता

(बर्दिया) — राजापुरसँग जोडिएको नेपाल–भारत सीमामा रहेको सीमा स्तम्भ हात्तीले पल्टाइदिएको छ । नेपाल–भारत छुट्याउने राजापुर नगरपालिका ७, दीपनगरस्थित घना जंगल क्षेत्रको सीमा स्तम्भ नम्बर ९७ लाई हात्तीले लात्तीले हानेर पल्टाइदिएको हो । 

अनुगमनका क्रममा राजापुर ९, शंकरपुरको ९३ नम्बर सीमा स्तम्भ पनि भत्केको अवस्थामा भेटिएको छ । स्तम्भको माथिल्लो भाग चोइटिएको छ ।

सशस्त्र प्रहरी उपरीक्षक यादव विकले सीमा स्तम्भ हात्तीले भत्काएको अनुगमनका क्रममा देखिएको बताए । भारतबाट आउने हात्ती राजापुर क्षेत्रमा बर्सेनि ठूलो संख्यामा प्रवेश गर्छन् । हात्तीले अन्नबाली खानुका साथै स्थानीयको कच्ची घरसमेत भत्काउने गरेको राजापुर ४ का वडाध्यक्ष रमण रेग्मीले बताए ।

८ वर्षअघि साबिक ढोढरी गाविसको धनौरामा रहेको ८४ नम्बर सीमा स्तम्भ पनि हात्तीले भत्काएको थियो । भारतीय जंगलबाट भित्रिएका हात्ती निकै बलिया र आक्रामक हुने भएका कारण सहजै सीमा स्तम्भ भत्काउनेगरेको प्रहरी उपरीक्षक विकले जनाए । बर्दियासँग जोडिएको करिब ८७ किमि नेपाल–भारत सीमाको ९० प्रतिशत भू–भाग घना जंगल भएका कारण वन्यजन्तु त्यही बाटो भएर अन्नबाली खान सीमावर्ती राजापुर, मधुवनलगायत गाउँमा पुग्छन् ।

सशस्त्र प्रहरी बलले नेपाल–भारत सीमा छुट्याउने २ सय ४५ मध्ये मुख्यसहित ९४ सीमा स्तम्भ खोजी गर्दा नभेटिएको बताएको छ । पछिल्लोपटकको अनुगमनमा त्यति संख्यामा फेला नपरेको सशस्त्र प्रहरी बल बर्दियाले जनाएको हो ।

सीमा स्तम्भ कहिले हराए भन्ने यकिन तथ्यांक सशस्त्र प्रहरी बलसँग छैन । उपरीक्षक विकले एक दशकयता ३२ सीमा स्तम्भ खोलाले बगाएको बताए । ‘ठूला र साना गरी ७३ सीमा स्तम्भ मर्मत गर्नुपर्ने र ४६ पुनर्निर्माण गर्नुपर्ने छन्,’ उनले भने, ‘केही सीमा स्तम्भ खोलाले बगाएको छ ।’

प्रकाशित : मंसिर ५, २०७६ १३:१४
ADVERTISEMENT
ADVERTISEMENT
प्रतिक्रिया
पठाउनुहोस्
ADVERTISEMENT

पर्यटक कुर्दै बाघ र गैंडा

कान्तिपुर संवाददाता

(बर्दिया) — नेपाल भ्रमण वर्ष नजिकिंदै गर्दा यहाँ धमाधम आवासीय संरचना बन्न थालेका छन् । पर्यटक बढ्ने आशामा व्यवसायीले आवास बनाउन लागेका हुन् । यहाँका पर्यटकीय क्षेत्रमा अब बाघ र गैंडा हेर्न पर्यटक भित्रिने आशा गरिएको छ ।

ओझेलमा परेका क्षेत्रलाई भ्रमण वर्षले चिनाउने धेरैको विश्वास छ । अहिलेसम्म ठाकुरद्वारालाई मात्र पर्यटकीय क्षेत्रका रूपमा चिन्ने गरिन्छ । तर, जिल्लामा थुप्रै पर्यटकीय क्षेत्र छन् । बर्दिया राष्ट्रिय निकुञ्जभित्र रहेको दनुवा ताल प्रचारमै छैन । यो ताल बर्दिया र थारू समुदायको इतिहाससँग जोडिएको छ । बार बर्दिया नगरपालिकाको कतर्निया जंगलमा कर्णे राजाको दरबार छ । जसको अध्ययनै हुन सकेको छैन । तर, दरबारको अवशेष अझै रहेको स्थानीय बताउँछन् । ‘दरबारका इँटा अझै भेटिन्छन् । दरबारका विभिन्न सामग्री पनि देखिन्छ,’ स्थानीय रामबहादुर चौधरीले भने, ‘ऐतिहासिक दरबारको अनुसन्धानका लागि कसैले चासो दिएको छैन । जसका कारण धार्मिक महत्त्वको पर्यटकीय क्षेत्र ओझेलमा छ ।’

ठाकुरद्वारासँगै जोडिएको गेरुवा गाउँपालिका अझै पनि पर्यटकीय क्षेत्रका लागि नौलो क्षेत्र हो । प्राकृतिक रूपमा सुन्दर रहेको यहाँका धेरै क्षेत्रको प्रचार हुन सकेको छैन । पर्यटक रमाउन सक्ने प्राकृतिक सुन्दरता धेरै छन् । पालिकालाई मध्यवर्ती वनले घेरेका कारण वन्यजन्तु सहजै देख्न सकिन्छ । पालिकाले सबैजसो वडामा होमस्टे सञ्चालनमा ल्याउँदै छ । गेरुवा गाउँपालिका प्रमुख जमानसिंह केसीले पालिकालाई पर्यटकीय क्षेत्र बनाउने प्रयास भइरहेको बताए । ‘नयाँ स्थानको प्रचार पनि गर्दै छौं,’ उनले भने, ‘संरचना निर्माणको काम पनि हुँदै छ ।’

भ्रमण वर्षका लागि बाँके र बर्दियाका अधिकांश पर्यटकीय र धार्मिक स्थलमा चहलपहल देखिन थालेको छ । राष्ट्रिय निकञ्जबाहेकका स्थानलाई पर्यटक गन्तव्यमा राखिएको छैन । बर्दिया राष्ट्रिय निकुञ्जबाहेक सामुदायिक वन, होमस्टे, धार्मिक स्थल, विभिन्न समुदायका परम्परागत संस्कृति जिल्लामा छन् । त्यस्तै, बाघ र गैंडा हेर्न पाइने बर्दिया राष्ट्रिय निकुञ्ज मुलुककै लामो गेरुवा नदी पुल, डल्फिन, ११० बिघाको बढैयाताल, एसियाकै नमुना कर्णाली चिसापानी पुल, ठाकुरद्वारास्थित डल्ला होमस्टे, गुलरिया नगरपालिका खैरापुरमा संरक्षण गरिएका कृष्णसार, बाँसगढीको केदारेश्वर धाम, सुन्दर चेपाङ गाउँलगायत पर्यटकीय क्षेत्रलाई नयाँ गन्तव्य बनाइन लागिएको छ ।

पर्यापर्यटन विकास समिति ठाकुरद्वाराका अध्यक्ष तथा होटल व्यवसायी मोहन चौधरीले सरकारको नजरमा नपरेका थुप्रै पर्यटकीय क्षेत्रलाई समेट्नुपर्ने बताए । स्थानीय सरकारले पनि छुटेका क्षेत्रलाई लक्षित गरी प्रचार गर्नुपर्ने छ ।

प्रकाशित : मंसिर ५, २०७६ १३:१२
पूरा पढ्नुहोस्
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT
ADVERTISEMENT