सांसदका छोराले टेन्डर नपाउँदा व्यवसायीलाई सटर खाली गराउन लगाइएको आरोप

अस्पतालले पाँच वर्षका लागि भाडामा दिन टेन्डर आहृान गरे अनुसार आफूहरुले करार सम्झौता गरेकाले सम्झौता अनुसार पाँच वर्ष व्यवसाय गर्न पाउनुपर्ने माग व्यवसायीहरुले दोहोर्‍याएका छन् । उनीहरुले बुधबार पत्रकार सम्मेलन गरी मुलुकी ऐन २०७४ को धारा ५४१ बमोजिम करार सम्झौता अनुसार पाँच वर्ष व्यवसाय गर्न पाउनुपर्ने माग गरे ।

अस्पतालका ७३ सटर मध्ये ५९ वटा सटरको पाँच वर्षका लागि भाडा सम्झौता भए अनुसार व्यवसायीको करोडौं रुपैयाँ लगानी भएको सटर व्यवसायी संघका उपाध्यक्ष ज्ञानप्रसाद पौडेलले बताए ।

निजी अस्पताल र मेडिकल कलेजमा बिरामी लैजाने उद्देश्य अनुसार र सांसदका छोराले टेन्डर नपाएपछि सटर खाली गराउन खोजिएको उपाध्यक्ष पौडेलले दाबी गरे । उनले प्रदेश सांसद भोजप्रसाद श्रेष्ठका छोरा सुनिल श्रेष्ठको टेन्डर नपरेपछि सटर खाली गराउने खेल सुरु भएको बताए । निजी अस्पताल र मेडिकल कलेजलाई पोस्न प्रदेश सरकारले हचुवाको भरमा व्यवसायीलाई सडकमा ल्याएर बिचल्ली बनाउन खाजेको आरोप लगाए ।

प्रदेश सरकारले अस्पतालको स्तरोन्नतिका लागि डीपीआर तयार गरेको खण्डमा सटर खाली गर्न तयार रहेको व्यावसायीले स्पष्ट पारे । व्यवसायीका समस्या सुनाउँदा मुख्यमन्त्री शंकर पोखरेलले टेन्डरमा जानु गैरकानुनी हो, अब सपिङ कम्प्लेक्समा व्यवसाय गर्नुस् भनेर गैरजिम्मेवार जवाफ दिएको समेत उनले गुनासो गरे ।

यसअघि व्यवसायीले लुम्बिनी प्रादेशिक अस्पताल, मेडिकल सुपरिटेण्डेन्ट डा. कृष्ण खनाल र अस्पताल विकास समितिलाई विपक्षी बनाई जिल्ला अदालत रुपन्देहीमा रिट निवेदन दिएका थिए । रिट निवेदनमाथि मंसिर ६ गते पेशी छ ।

अस्पतालले २०७५ फागुन २८ गते र २०७६ जेठ २८ गतेको सूचना अनुसार व्यवसायीले पाँच वर्षका लागि भाडा सम्झौता गरेका थिए । तर कात्तिक १८ गते मन्त्रिपरिषद बैठक बसेर अस्पतालका सटर मंसिर मसान्तसम्म खाली नगरे डोजर लगाएर खाली गर्ने निर्णय गरेको थियो । सटर हटाएर आकर्षक पर्खाल बनाउने र विशिष्टिकृत सेवासहितको अस्पताल बनाउने उद्देश्य रहेको सरकारको भनाई छ ।