कृष्णनगरमा आज पनि कर्फ्यू जारी, शव पोस्टमार्टमका लागि तौलिहवा अस्पतालमा
कपिलवस्तु — सीमावर्ती बजार कृष्णनगरमा शुक्रबार पनि कर्फ्यू जारी छ । लक्ष्मी पूजाको मूर्ति बिसर्जनका क्रममा भएको विवादले उग्र रुप लिएपछि स्थानीय प्रशासनले बिहीबार बिहान ११ बजेबाट अनिश्चितकालका लागि कर्फ्यू लगाएको थियो । बिसर्जन हुन नकसेका लक्ष्मी भगवानका १३ मूर्ति बिहीबार राति १ बजेपछि प्रहरी लगाएर विर्सजन गरिएको छ ।
बुधबार प्रहरीले गोली चलाउँदा मृत्यु भएका २२ वर्षे सुरजकुमार पाण्डेको शव पोस्टमार्टमका लागि बिहीबार राति तौलिहवा अस्पताल ल्याइएको जिल्ला प्रहरी प्रमुख उपरीक्षक दीपशम्सेर जबराले बताए । बिहीबार राति उद्योग वाणिज्य संघ कृष्णनगर, प्रदेशसभा सदस्य र मूर्ति विसर्जन समितिका पदाधिकारी तथा स्थानीय प्रशासनबीच सहमति भएपछि मूर्ति विसर्जन गरिएको उपरीक्षक दीपशम्सेर जबराले बताए ।
कृष्णनगर भन्सार कार्यालयदेखि ७ सय मिटर उत्तर, पश्चिमतर्फ ७ सय मिटर र पूर्वतर्फ ३ सय मिटरको क्षेत्रमा अर्को आदेश नभएसम्मका लागि कर्फ्यू लगाइएको प्रमुख जिल्ला अधिकारी गजेन्द्रबहादुर श्रेष्ठले बताए । शुक्रबार सुरक्षा अवस्था हेरेर कर्फ्यूका बारेमा विचार गरिने उनले बताए ।
प्रकाशित : कार्तिक १५, २०७६ ०८:४९