निर्माण सकिने बेला पुल अलपत्र

मोटरसाइकलसहित नदीपार गर्न जोखिम हुने भएपछि वर्षातमा उनलाई भारतीय बाटो हुँदै आउजाउ गर्नुपर्ने बाध्यता आइलागेको हो ।

‘उर्लिएको नारायणी भेलमा ओभरलोड हुने डुंगामा नदी तर्न डर लाग्छ,’ उनले भने, ‘सुस्ताको नागरिक भनेपछि भारतीय सुरक्षाकर्मीले बढी निगरानी र जाँच गर्छन् । के गर्नु, भारतीय बाटो हुँदै ओहोरदोहोर गर्नुपर्ने बाध्यता छ ।’ हरिजनमात्र होइन, सुस्ताका बासिन्दाको पीडा एउटै हो । आर्थिक अवस्था मजबुत भएकाहरू नारायणी वारि बजारमा कोठा भाडामा लिएर बस्छन् ।

निम्न आर्थिक अवस्था भएका यहाँका स्थानीय भने नारायणी नदीमा पुल नहुँदा भारतीय बाटो प्रयोग गर्न बाध्य छन् । हिउँदमा भने डुंगामार्फत ओहोरदोहोर गर्छन् । तीनतर्फ नारायणी नदी र एकातर्फ भारतीय भूभाग छ । साउन महिनामा नारायणी नदी उर्लिएर समतल भएको थियो । करिब १६ किलोमिटर भारतीय भूमि हुँदै त्रिवेणी आएर अस्पताल तथा अन्य कामका लागि जान घण्टौं लाग्छ । यस्तो बाध्यता पश्चिम नवलपरासीको सुस्ताका बासिन्दाले वर्षौंदेखि भोग्दै आएका छन् ।

सुस्ताबासीको यो दुःख नारायणी नदीमा पुल निर्माण भएमा समाधान हुने थियो । तर, चार वर्षअगाडि निर्माण सुरु भएको झोलुंगे पुलको ठेकेदार नै सम्पर्कमा नआएपछि सुस्ताबासीको पुल सपना अझै पूरा भएको छैन । सुस्तामा उत्पादित बाली बेचबिखन र मजदुरीका लागि यहाँका बासिन्दा डुंगाबाटै आवतजावत गर्छन् ।

नारायणीमा पुल निर्माणको जिम्मा पाएको कम्पनीले स्थानीय मनोहर अहिरको जग्गा भाडामा लिएर उपकरण राखेको छ । जग्गा भाडा १ लाख १० हजार र रेखदेखबापत मासिक १० हजार रुपैयाँ दिने सर्त थियो । अहिरले तीन वर्षदेखि रकम पाएका छैनन् । पारि श्रमिक उपलब्ध गराउन जिल्ला प्रशासनमा उनले उजुरी दिएका छन् । झोलुंगे पुल निर्माण हुने भयो भन्दा यहाँका बासिन्दामा खुसीको सीमा थिएन ।

काम छाडेर ठेकेदार सम्पर्कविहीन भएपछि स्थानीय निराश छन् । ठेकेदारलाई कारबाही गर्न उनीहरूले माग गरेका छन् । सम्झौता अनुसार ०७३ पुसमा सुरु गरेर डेढ वर्षमा काम सक्नुपर्ने थियो । अहिलेसम्म १० प्रतिशत काम भएको छैन । भारतसँग जोडिएको सुस्ता र गाउँपालिका केन्द्र जोड्नका लागि पुल निर्माण गर्न लागिएको हो ।

१ किलोमिटर ५ सय ७१ मिटर लम्बाइ र १ दशमलव ६ मिटर फराकिलो पुल निर्माणका लागि त्रिशूली आश्रय जेभी कन्स्ट्रक्सन कम्पनीले २७ करोड रुपैयाँमा ठेक्का लिएको थियो । सुस्ता गाउँपालिकाका अध्यक्ष रामप्रसाद पाण्डेका अनुसार ठेकेदार कम्पनीलाई पटक–पटक ताकेता गरेपछि सम्पर्कमा आएको र वर्षा सकिएपछि काम सुरु गर्ने आश्वासन दिएको बताए ।

‘काममा कहींबाट केही अवरोध नहुँदा समेत निर्माणको जिम्मा पाएको ठेकेदार कम्पनीले काम अगाडि बढाएको छैन । अहिले सम्पर्कमा आएर नारायणी नदीको बहाव घटेपछि काम सुरु गर्ने बताएको छ,’ उनले भने, ‘करोडौंको आयोजना त्यसै अलपत्र पारेकाले मन्त्रालयमा खबर गरेपछि अब काम सुरु हुने आशा जागेको हो ।’