विवादास्पद भवनको शिलान्यास

अस्पताल निर्माणस्थलको विवादले उच्च अदालत तुलसीपुर बुटवल इजलासमा परेको मुद्दा विचाराधीन छ । मुद्दा विचाराधीन रहेको जानकारी भए पनि राज्यमन्त्री यादवले शिलान्यास गरेपछि विवाद थप चर्किएको हो ।

शिलान्यास गर्दै उनले मन्त्रालयबाट सुरुवाती चरणमा वडा ८ मा नै निर्माण गर्ने सहमति भएको भन्दै स्थानीय तहको निर्णयले मात्र अस्पतालको निर्माण स्थल नसर्ने बताए । नगरसभाका दुईतिहाइ सदस्यले वडा ५ मा अस्पताल निर्माण गर्ने निर्णय गरेका थिए ।

निर्णयविरुद्ध वडा ८ का तुलाराम पोखरेल र दिलबहादुर खत्रीले अन्तरिम आदेशसमेतको माग राखी उच्च अदालतमा रिट दायर गरेका थिए ।

अदालतले उक्त मुद्दामा अन्तरिम आदेश जारी गर्न नपर्ने आदेश दिएको छ । मुद्दा पेसीमा चढाइएको नगरपालिकाले जनाएको छ । मुद्दा विचाराधीन रहेको र नगरसभाको निर्णयविपरीत काम गर्न लागेको भन्दै सुनवल नगरपालिकाका प्रमुख र उपप्रमुख सहभागी भएनन् ।