लोडसेडिङले पीडित बनेपछि ध्यानाकर्षण

सन्जु पौडेल

रूपन्देही — अघोषित लोडसेडिङले पीडित बनेपछि सैनामैनाका स्थानीय बासिन्दा, उद्योगी र व्यवसायीले विद्युत् प्राधिकरण बुटवलमा बुधबार ध्यानाकर्षण पत्र बुझाएका छन् ।

हावाहुरी र पानी पर्दा विद्युत् अवरुद्ध हुनु स्वाभाविक भए पनि जथाभावी लाइन काटन थालेपछि समस्या भएको उनीहरूले गुनासो गरे । अघोषित लोडसेडिङले व्यावसायिक प्रयोजनका लागि राखिएकाविद्युतीय सामग्री बिग्रिन थालेको भन्दै उनीहरूले ध्यानाकर्षणगराएको बताए ।

रूपन्देही व्यापार संघका सल्लाहकार रणबहादुर खनालले जानकारीबिना विद्युत् कटौती हुन थालेपछि साना तथा ठूला उद्योगी मर्कामा परेको बताए । ‘छिनछिनमा लाइन जान थालेपछि गर्मी मौसममा बच्चा, वृद्ध सबैलाई समस्या परेको छ,’ उनले भने, ‘गुनासो गर्न खोज्दा कर्मचारीले टेलिफोन उठाएर बाहिर राखिदिन्छन् ।’ कर्मचारी सबै हाकिमसरह भएकाले पनि सर्वसाधारणलाई असह्य पीडा भएको उनले बताए ।

सैनामैना उद्योग वाणिज्य संघका अध्यक्ष राजबहादुर क्षत्रीले विद्युत् प्राधिकरण व्यापारिक प्रतिष्ठान पनि भएकाले ग्राहकको सुविधालाई मध्यनजर गर्न नसक्नु दुःखदायी भएको बताए । ‘लोडसेडिङ मुक्त नेपालको नारा सैनामैनाका जनतालाई पाच्य भएन,’ उनले भने, ‘नारामा सीमित अधिकारले देश विकास हुन सक्दैन ।’ सरकारी विभाग र कर्मचारीको लापरबाहीले जनताले भोग्नुपरेको समस्याको मूल्य नभएको उनले गुनासो गरे ।

कांग्रेस जिल्ला उपसभापति फणिन्द्र शर्माले जनताले बुझाउने महसुलबाट अघि बढ्ने निकायको लापरबाहीले जनता निराश भएको बताए । ‘बिनाजानकारी जथाभावी विद्युत् काटिन्छ,’ उनले भने, ‘घर तथा उद्योगका सामग्री बिग्रिएर नचल्ने अवस्थामा पुगेका छन् ।’

प्राधिकरण वितरक भएकाले जुनसुकै स्थानका नागरिक तथा उद्योगलाई एकैनासले सुविधा प्रवाह गर्नुपर्ने उनले बताए । ‘करोडौं रकम विद्युत् महसुल नतिरेका ठूला प्रतिष्ठानका लाइन नकाटी महिनैपिच्छे महसुल बुझाउने सर्वसाधारणलाई दुःख दिनु आपत्तिजनक छ,’ उपसभापति शर्माले भने ।

ध्यानाकर्षण पत्र बुझै विद्युत् प्राधिकरण कार्यालय बुटवलका प्रमुख सन्जय मिश्रले सैनामैनाको विद्युत् फिडर जितपुरमा ओभरलोडको समस्या भएकाले यस्तो भएको स्वीकारे ।

‘प्रसारणको मुहानमा नै समस्या भएर यस्तो भएको हो,’ उनले भने, ‘बुटवल वितरक भएकाले यहाँबाट वितरण हुने प्रक्रिया र सप्लाइमा समस्या छैन ।’ यो समस्या स्थानीयले महसुस गर्ने गरी चार/पाँच दिनमै समाधान गर्न आफू तत्पर रहेको र मुख्य मुहानमा हुने ओभरलोडले कहिलेकाहीं यस्ता समस्या आउन सक्ने उनले बताए ।

प्रकाशित : श्रावण ३०, २०७६ १०:२८
प्रतिक्रिया
पठाउनुहोस्

हेलिकोप्टरबाटै गाडी

राष्ट्रिय सडक सञ्जालसँग नजोडिएको हुम्लामा ५ दर्जन गाडी गुडिरहेका छन्, हेलिकोप्टरमा एउटा गाडी पुर्‍याउन ११ देखि १७ लाख रुपैयाँसम्म पर्छ
छपाल लामा

हुम्ला — राष्ट्रिय सडक सञ्जालसँग जिल्ला जोडिएको छैन । तर, यहाँ पाँच दर्जन जिप तथा ट्र्याक्टर गुडिरहेका छन् । यी सवारीसाधन हेलिकोप्टरमा महँगो भाडा तिरेर ढुवानी गरिएका हुन् ।

उत्तरी क्षेत्र नाम्खा गाउँपालिकाको हिल्सादेखि केर्मीसम्म र सदरमुकाम सिमकोटदेखि खार्पुनाथको हेप्कासम्म जिप र ट्र्याक्टर चलिरहेका छन् । यी सवारी साधनका लागि प्रयोग हुने इन्धन पनि हेलिकोप्टर र खच्चडबाट महँगो भाडा तिरेर ल्याउने गरिएको छ ।

खार्पुनाथ यातायात प्रालिका अध्यक्ष सरोज रावतले सुर्खेतमा २५ लाख परेको एउटा बोलेरो जिप हुम्ला पुर्‍याउँदा थप ११ लाख रुपैयाँ लाग्ने बताए । उनका अनुसार सिमकोट गाउँपालिकामा ६ बोलेरो जिप र १५ ट्र्याक्टर सञ्चालनमा छन् । ‘यी सबै हेलिकोप्टरमा ल्याइएका हुन्, अरु त विकल्पै छैन,’ उनले भने, ‘राष्ट्रिय सडक सञ्जालसँग नजोडिए पनि जिल्लामा धमाधम सडक खुलिरहेकाले हेलिकोप्टरबाटै भए पनि ल्याउनुपरेको हो ।’ ट्र्याक्टर ढुवानी गर्न भने १७ लाख खर्च भएको उनले बताए ।

सर्केगाड गाउँपालिकामा पनि एउटा बोलेरो जिप छ । उक्त जिप सर्केगाडदेखि चंखेली गाउँपालिकाको सीमा सरीसल्लासम्म चल्ने गर्छ । गाडीधनी छवि बुढाले उक्त बोलेरो सुर्खेतदेखि मुगुसम्म स्थलमार्ग बाटा र मुगुदेखि सर्केगाडसम्म हेलिकोप्टरमा ल्याइएको बताए । नाम्खा गाउँपालिकाको हिल्सादेखि केर्मीसम्म ७५ किमि खण्डमा १४ बोलेर जिप र २२ ट्र्याक्टर सञ्चालनमा छन् । ती सवारीसाधन भने तिब्बत हुँदै हिल्सा नाकाबाट भित्र्याइएका नाम्खा गाउँपालिका सदस्य लातार लामाले बताए ।

यी सवारी सञ्चालनका लागि आवश्यक पर्ने इन्धन पनि महँगो भाडा तिरेर ढुवानी गर्ने गरिएको छ । यातायात व्यवसायी चिन लामाका अनुसार हवाइजहाजबाट ढुवानी गर्दा प्रतिलिटर ७ सय रुपैयाँ पर्छ । तर, पछिल्लो समय हेलिकोप्टरबाट ढुवानी नगरी मुगुबाट खच्चडमा ढुवानी गर्ने गरिएको छ । मुगुदेखि खच्चडबाट खार्पुनाथसम्म प्रतिलिटर ३ सय ५० रुपैयाँ र सिमकोटसम्म ५ सय रुपैयाँ पर्ने गरेकोलामाले बताए ।

उनका अनुसार दैनिक प्रतिट्र्याक्टर ३५ लिटर र प्रतिजिप १२ लिटर इन्धन खपत हुने गरेको छ । ‘इन्धन ल्याउन निकै मुस्किल छ, त्यसैले हिउँदका लागि अहिले नै ल्याएर स्टोर गर्छौं,’ उनले भने, ‘नभए हिउँदमा हिउँ पर्ने भएकोले इन्धन ढुवानीमा समस्या भई गाडी चलाउनै सकिँदैन ।’

गाडीको महँगो ढुवानी भाडा र इन्धनसमेत ल्याउन महँगो पर्दा यातायात भाडासमेत महँगो छ । सदरमुकाम सिमकोटदेखि खार्पुनाथ र हेप्काखोलासम्म २ सय ५० रुपैयाँ भाडा रहेको छ । यी दुई ठाउँसम्मको दूरी १३ देखि १५ किमि छ ।

त्यस्तै, सिमकोटदेखि बरगाउँसम्म ९ किमिको भाडा २ सय रुपैयाँसम्म लिने गरिएको सवारीचालक नरबहादुर लामाले । नाम्खा गाउँपालिकाको हिल्सादेखि केर्मीसम्म ७५ किमि दूरीको भाडा हजार रुपैयाँ तोकिएको छ । सर्केगाडदेखि सरिसल्लासम्म १० किमिको भाडा ५ सय रुपैयाँ रहेको जिपधनी छवि बुढाले जानकारी दिए ।

प्रकाशित : श्रावण ३०, २०७६ १०:२६
पूरा पढ्नुहोस्
प्रतिक्रिया
पठाउनुहोस्