६ वर्षमा पनि बनेन पुल

कान्तिपुर संवाददाता

रुकुम पूर्व — सिस्ने गाउँपालिकाको केन्द्र रुकुमकोटदेखि भुमे गाउँपालिकाको केन्द्र खाबाङबगर हुँदै बागलुङ जिल्लाको सीमासम्मको मध्यपहाडी लोकमार्गको अधिकांश खण्ड कालोपत्रे भइसकेको छ  । कालोपत्रेको काम बाँकी रहेको खण्डमा पनि धमाधम काम भइरहेको छ  ।

तर, अहिले पनि रुकुमकोटदेखि खाबाङबगरसम्म सरर गाडी गुड्दैनन् । समयमै पुल नबनेका कारण सर्वसाधारणले दुःख पाइरहेका हुन् । सिस्ने र भुमे गाउँपालिकाको सीमाका रूपमा रहेको रुकुमगाडमा बन्ने पुल निर्माणमा ढिलाइ हुँदा हरेक वर्षामा सर्वसाधारणले दुःख पाइरहेका छन् ।

यस वर्षको वर्षा सुरु भएपछि पनि सर्वसाधारणले उही नियति बेहोर्नुपरेको छ । सिस्ने र भुमे गाउँपालिका जोड्ने रुकुमगाडमाथि बन्नुपर्ने रेलीखोलाको मोटरेबल पुल २ वर्षअघि नै निर्माण सम्पन्न हुनुपर्ने सम्झौता छ । तर, हालसम्म पनि उक्त पुल नबन्दा सडक राम्रो बन्दा पनि यात्रुका वर्षे दुःख भने उस्तै छन् ।


६ वर्षअघि उक्त पुल निर्माणका लागि सहिद मार्ग आयोजनासँग सम्झौता भएको थियो । ३ करोड ७९ लाख २१ हजार ७ सय रुपैयाँमा याकथुम्हाङ/बीबी जेभी निर्माण सेवाले ठेक्का सम्झौताअनुसार ०७४ असोज २० गतेभित्रै यो पुल हस्तान्तरण गरिसक्नुपर्ने थियो । निर्माण कम्पनीका प्रतिनिधि टीका तामाङले अबको एक महिनामा पुल पूरा हुने बताए ।


२ वटा स्ल्याप ढलान गरिसकेको र एउटा मात्रै बाँकी रहेको उनले बताए । डिजाइन परिवर्तन गर्न खोज्दा पुल निर्माणमा ढिलाइ भएको निर्माण कम्पनीको दाबी छ । पुल नबनेकै कारण दैनिक सयौं यात्रुको यात्रा प्रभावित भएको छ ।

प्रकाशित : असार २९, २०७६ १५:३६
प्रतिक्रिया
पठाउनुहोस्
ADVERTISEMENT
ADVERTISEMENT

सिद्देश्वरको झाडापखाला नियन्त्रणमा

कान्तिपुर संवाददाता

पाल्पा — जिल्लाको रैनादेवी छहरा–१, सिद्देश्वरको विभिन्न स्थानमा फैलिएको झाडापखाला शनिबार नियन्त्रणमा आएको छ  । गाउँमै चिकित्सकको टोलीले अस्थायी क्याम्प बनाएर उपचार सुरु गरेपछि झाडापखाला नियन्त्रणमा आएको हो  ।

झाडापखालाबाट गाउँका ६० बढी बिरामी परेका थिए । सिद्देश्वरको मगरानमा २९, अर्चलेमा २७ जना बढी बिरामी परेको वडाध्यक्ष सोमबहादुर दर्लामीले बताए । उनका अनुसार ४ जनाको मिसन अस्पताल, १ जनाको लुम्बिनी प्रदेश अस्पताल बुटवलमा उपचार भएको छ ।


३ दिनदेखि गाउँमा झाडापखाला फैलिएको थियो । केही बिरामी गुल्मीको अगाहा र रिडीमा पनि उपचारका लागि गएका थिए । वडाध्यक्ष दर्लामीका अनुसार बुधबार अर्चलेमा केही व्यक्तिलाई झाडापखाला देखिएको थियो । रैनादेवी छहरा स्वास्थ्य शाखामा बुधबार बेलुकी नै झाडापखालाका विषयमा जानकारी गराएको उनले बताए । सामान्य उपचार गर्दा नभएपछि कतिपय बिरामी तानसेनको मिसन अस्पतालका साथै गुल्मीको रिडी र अगाहामा उपचार गर्न जानुपरेको हो ।


गाउँपालिकाका स्वास्थ्य शाखा प्रमुख जीवन रानाले धेरै जना बिरामी भएको थाहा पाएपछि जिल्ला अस्पतालका डा. गगन अधिकारीसहितको टोलीले अस्थायी क्याम्प बनाएर गाउँमै उपचार गरेको बताए । उनका अनुसार गम्भीर भएका बिरामीलाई तानसेन पठाएको उनले बताए ।

३ दिनदेखि परेको झरी र दूषित पानी टयांकीमा मिसिएको हुन सक्ने स्थानीयले बताए । डा. अधिकारीले पनि पानीकै कारण यस्तो अवस्था आएको हुन सक्ने प्रारम्भिक अनुमान गरिएको बताए । मगरान र अर्चलेका प्रायः सबै बिरामी परेको प्रभावित क्षेत्रमा पुगेका गाउँपालिका स्वास्थ्य शाखा प्रमुख जीवन रानाले बताए ।

गाउँमै उपचार गरेकी २० वर्षीया गीता कुमालको अवस्था गम्भीर छ । स्वास्थ्य शाखा प्रमुख रानाका अनुसार ९ जनाको टोलीले वेद वेदाङग संस्कृति माविमा अस्थायी क्याम्प राखी रातभर बिरामीको उपचार गरेको थियो ।

प्रकाशित : असार २९, २०७६ १५:३५
पूरा पढ्नुहोस्
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT
ADVERTISEMENT
ADVERTISEMENT
×