परासी — नेत्रविक्रम चन्द नेतृत्वको नेकपा पश्चिम नवलपरासीका इन्चार्ज पक्राउ परेका छन् । प्रहरीले गंगा ज्ञवाली(सुमन)लाई सोमबार राति बर्दघाट नगरपालिका-४ स्थित आफ्नै निवासबाट पक्राउ गरेको जिल्ला प्रहरी कार्यालय बर्दघाट सुस्ता पश्चिमका डिएसपी वीरेन्द्र थापाले बताए ।
चन्द नेतृत्वको नेकपाका गतिविधि रोक्न नवलपरासीमा प्रहरीले सक्रियता बढाएको छ । ज्ञवालीलाई फागुन २९ गतेको बन्दमा नवलपरासीको सरावलमा दुई वटा ट्रकमा आगजनी गरेको अभियोगमा मुद्दा चलाई कारबाही अगाडि बढाएको प्रहरीले जनाएको छ ।
यसैगरी पूर्वी नवलपरासीमा पनि दुई जना नेकपाका नेता पक्राउ परेका छन् । प्रहरीले मंगलबार नवलपुरका जिल्ला सदस्य धनबहादुर मर्दनिया र जनपरिषद् प्रमुख दानबहादुर आचार्यलाई पक्राउ गरेको छ ।
प्रकाशित : चैत्र १२, २०७५ १५:३८प्रतिक्रिया