दाङ — थारू समुदायका छोरी/चेली शिक्षाबाट वञ्चित भएपछि उनीहरूलाई विद्यालय पठाउने अनेक उपाय गरिएको छ । त्यसमध्ये विद्यालय जाने बालिकालाई साइकल अभियान प्रभावकारी बनेको छ ।

कतिलाई घरका काम भ्याएर मात्र विद्यालय जानुपर्ने बाध्यता छ भने कतिलाई घरका काममा सघाउँदैमा नियमित विद्यालय जान समस्या छ । अनेक कारणले शिक्षाबाट वञ्चित हुने जोखिममा रहेका छोरी/चेलीलाई विद्यालय जान प्रेरित गर्दै देउखुरीमा साइकल उपहार दिने अभियान चलाइएको हो ।

गरिब, विपन्न र कमैया कमलरी समुदायका बालिकालाई लक्षित गरी गत पुस अन्तिम साता ७० जनालाई साइकल वितरण गरिएको थियो । ०६८ सालदेखि थालिएको यो अभियानका क्रममा हालसम्म ४ सय ७८ साइकल उपहार दिइसकेको साइकल वितरणको संयोजन गरिरहेकी क्रियटिङ पोसिबिलिटिज नेपालका निर्देशक दिनेश सापकोटाले बताए । ‘मुक्त कमरीलाई फेरि कमलरी बस्नु नपरोस् भनेर साइकल वितरण थालिएको हो । यसले छोरीलाई विद्यालय पठाउन सहयोग गर्‍यो,’ उनले भने, ‘अहिले कमैया–कमलरी जाने जोखिममा रहेका अन्य बालिकालाई पनि वितरण गरिएको छ ।’

साइकल उपहार पाएपछि पढाइमा सहयोग मिलिरहेको गढवाकी ७ कक्षामा अध्ययनरत अनिता कुमालले बताइन् । ‘साइकल पाएपछि आमाबुबा पनि खुसी हुनुहुन्छ । हामीलाई पनि विद्यालय जान सजिलो हुन्छ,’ उनले भनिन्, ‘साइकल पाएपछि विद्यालय जान घण्टौं हिँड्नुपर्ने र समय अभावका कारण विद्यालय जान नपाउने समस्या हट्छ ।’

साँझ–बिहान घरको काम सकेर विद्यालय नियमित जान सजिलो भएको बालिकाहरूले बताए । साइकल उपहार अभियानले विद्यालयमा छोरी/चेलीको संख्या बढाउन महत्त्वपूर्ण भूमिका खेलेको गढवा गाउँपालिका अध्यक्ष सहजराम यादवले बताए ।