मुस्ताङमा कोराेना देखिएपछि तिब्बती शरणार्थी क्याम्प सिल

घनश्याम खड्का

म्याग्दी — हिमालपारीको जिल्ला मुस्ताङमा शनिबार एक वृद्धमा कोराेना संक्रमण पुष्टि भएपछि कन्ट्याक ट्रेसिङ गर्न घरपझोङ गाउँपालिका–१ छैरो तिब्बती शरणार्थी क्याम्प सील गरिएको छ ।

हिउँदमा जाडो छल्न झरेका ८३ वर्षिय वृद्धसमेत छैरो क्याम्पका २० जना शरणार्थीको टोली लकडाउनले काठमाडौं रोकिएकोमा खुकुलो भएपछि जेठ ३१ गते मुस्ताङ प्रवेश गरेका थिए । मुस्ताङ प्रवेश गर्ने क्रममा आरडीटी परीक्षण गर्दा वृद्धमा कोरोना पोजेटिभ देखिएपछि जोमसोमस्थित आइसोलेसनमा राखिएको थियो ।

सुगर तथा प्रेसरका बिरामीसमेत रहेका उनलाई क्वारेन्टाइनमा नराखी आइसोलेसनमा राखिएको कोरना भाइरस संक्रमण प्रकोप कन्ट्रोल कमान्ड पोस्ट मुस्ताङले जनाएको छ । पोस्टका अनुसार वृद्ध र उनका सुसारे बसेका ज्वाइँसमेतको गरेर दुई जनाको २ गते स्वाब संकलन गरी पठाइएको र पोखरामा पीसीआर गर्दा वृद्धमा कोरना संक्रमण पुष्टि भएको हो । उनका सुसारे बसेका ज्वाइँको पीसीआर रिपोर्ट भने नेगेटिभ छ ।

जिल्ला प्रशासन कार्यालय मुस्ताङका अनुसार घरपझोङ गाउँपालिका–१ छैरो तिब्बती शरणार्थी क्याम्पमा १ सय ६० जना बस्दै आएकोमा लकडाउनले केही पोखरा, काठमाडौंमै अड्केकाले हाल क्याम्पमा ९० जना रहेका छन् । यीमध्ये कोरना संक्रमित वृद्ध, उनकी छोरी, ज्वाइँसमेत २० जना जेठ ३१ गते मात्र मुस्ताङ आएर क्याम्प बसेका हुन् ।

‘तिब्बती शरणार्थी क्याम्प सिल गरी कन्ट्याक ट्रेसिङ सुरु गरेका छौं । कन्ट्याक ट्रेसिङपछि उनीहरुको स्वाब संकलन गरी पीसीआर टेस्ट गर्ने तयारीमा छौं,’ प्रमुख जिल्ला अधिकारी वेदप्रसाद अर्यालले भने, ‘संक्रमितको स्वास्थ्य अवस्था सामान्य छ ।’

प्रकाशित : असार ७, २०७७ ११:१६
प्रतिक्रिया
पठाउनुहोस्

भारत-चीन आमनेसामने भएका छन्, अमेरिका सहयोग गर्न तयार छ : ट्रम्प

एजेन्सी

वासिङ्टन — अमेरिकी राष्ट्रपति डोनाल्ड ट्रम्पले भारत र चीनबीच देखिएको सीमा विवाद समाधानका लागि सहयोग गर्न तयार रहेको बताएका छन् । ट्रम्पले पछिल्लो समय दुईदेशबीच देखिएको सीमा विवादबारे भारत–र चीनसँग कुरा गरिहेको पनि बताएका छन् ।

राष्ट्रपति भवन ह्वाइटहाउसमा पत्रकारहरुसँग कुरा गर्दै ट्रम्पले भने, ‘यो निकै कठिन परिस्थिति हो । हामीले भारतसँग कुराकानी गरिरहेका छौं । हामीले चीनसँग पनि कुराकानी गरिरहेका छौं ।’ लद्दाखको गलवान उपत्यकामा भएको भारत–चीन झडपलाई संकेत गर्दै भने, ‘त्यहाँ उनीहरुबीच निकै ठूलो समस्या छ । दुवै आमनेसामने आए । अब अगाडि कसरी बढ्छ हामी हेर्छौं । हामी भारत र चीनबीचको समस्या सुल्झाउनका लागि सहयोग गर्न चाहन्छौं ।’

गत सोमबार राति लद्दाखको गलवान सीमामा भएको झडपमा एक अधिकृतसहित २० भारतीय सैनिकको मृत्यु भएको छ । चीनतर्फ पनि हताहतीको कुरा आए पनि उसले आधिकारिक तथ्यांक सार्वजनिक गरेको छैन ।

ट्रम्पले यसअघि पनि भारत र चीनबीचको पछिल्लो तनावलाई कम गर्नका लागि अमेरिका मध्यस्थता गर्न तयार रहेको बताएका थिए । उनले भारत र चीनलाई सीमा विवाद सुल्झाउनका लागि अमेरिकाले मध्यस्थताको भूमिका निर्वाह गर्न चाहेको र सक्षम रहेको बताएका थिए । उनले चीनसँगको तनावलाई लिएर भारतीय प्रधानमन्त्री नरेन्द्र मोदीको ‘मूड खराब’ भएको पनि बताएका थिए । तर ट्रम्पको प्रस्ताव भारत र चीन दुवै देशका विदेशमन्त्रीले अस्वपस्कार गरेका थिए ।

लद्दाख सीमामा भएको हिंसात्मक क्षडपपछि उत्पन्न तनाव कम गर्न भारत र चीनबीच लगातार सैन्य र कूटनीतिक स्तरबाट वार्ता भइरहेको छ । दुवै देशले मेजर जर्नेल तहको सैन्य वार्ता र विदेशमन्त्रीस्तरको वार्ताबाट सीमामा देखिएको तनाव कम गर्न सहमत भएको बताएका छन् । बुधबार भारतीय विदेशमन्त्री एस जयशंकरले चिनियाँ समकक्षी वाङ यीसँग टेलिफोन कुराकानी गरेका थिए ।

प्रकाशित : असार ७, २०७७ १०:३०
पूरा पढ्नुहोस्
प्रतिक्रिया
पठाउनुहोस्
×