सरकारी सूचीमा परेनन् द्वन्द्वपीडित- गण्डकी - कान्तिपुर समाचार
कान्तिपुर वेबसाईट
AdvertisementAdvertisement

सरकारी सूचीमा परेनन् द्वन्द्वपीडित

प्रकाश बराल

बागलुङ — २०५८ कात्तिक २८ गते पति भविलाल विकलाई सेनाले पक्राउ गर्दा प्रमिलाको काखमा ३ छोरी थिए । त्यसको एक वर्षपछि पतिको शव आइपुग्यो । ज्यालामजदुरीबाट परिवार पाल्दै आएका गलकोट नगरपालिका–५ का भविलाल किन मारिए, प्रमिलालाई थाहा छैन ।

द्वन्द्वमा पति गुमाएकी बागलुङकी प्रमिला विक ।

उनले घटना सार्वजनिक गर्न सकिनन् न त राहतको खोजी गर्न सकिन् । सरकारी राहत नपाएकै कारण तत्कालीन शान्ति समितिले तयार गरेको पीडितको सूचीमा पनि उनी समावेश छैनन् । सूचीमा परेकाहरूले चार लाख रुपैयाँ राहत बुझेका छन् ।

नेपाल सरकारले अहिले लोकतन्त्रका योद्धा अभिलेखीकरण समिति गठन गरेको छ । चैत ५ गतेको मन्त्रिपरिषद् बैठकले गठन गरेको समितिको मस्यौदामा पनि प्रमिलाको नाम छैन ।

‘राहत पाउने काममा त पीडितहरू छुटे, कम्तीमा उनीहरूको पीडा बुझेर सूचीकृत गरौं,’ तत्कालीन शान्ति समितिकी संयोजक तथा अधिकारकर्मी लक्ष्मी बास्कोटाले भनिन्, ‘हिजो केही अप्ठ्यारा थिए होला, अब पीडितलाई पीडित हो भन्न किन डराउने ?’ उनले अभिलेखीकरणमा छुटेका अन्यलाई पनि सूचीकृत गर्नुपर्ने बताइन् ।

प्रमुख जिल्ला अधिकारी अध्यक्ष रहने गरी गठन भएको समितिमा बागलुङ नगरपालिकाका प्रमुख जनकराज पौडेल र कृष्ण केसी सदस्य छन् । समितिले पहिलो चरणमा १ सय ६६ मृतक, २४ जना बेपत्ता पारिएका र १ सय १२ जना अपहरणमा परेकाहरूको सूची सार्वजनिक गरेको छ । उक्त सूची मस्यौदाका रूपमा ल्याइएकाले संख्या थपघट हुन सक्ने प्रमुख जिल्ला अधिकारी शिवकुमार कार्कीले बताए । समितिले अभिभावकविहीन ५ बालबालिका, २ सय ३० जना विस्थापित र १ सय ४० जना घाइतेको नामावली पनि सार्वजनिक गरेको छ ।

नाम दोहोरिएको भए सच्याउने, छुटेका भए प्रमाणसहित थप गर्ने र अन्तिम रूप दिएर गृह मन्त्रालयमा पठाउने योजना कार्कीले सुनाए । कार्कीका अनुसार समितिले २०४६ सालको जनआन्दोलनमा घाइते वा अपांग भएकाको समेत खोजी गर्ने र नामावली सूचीकृत गर्ने अधिकार पाएको छ ।

अधिकारकर्मी राम शर्माका अनुसार निसीखोला–४ र गलकोट नगरपालिका–७ का दुई जना पीडित सूचीकरणमा छुटेका छन् । ‘उनीहरू वास्तविक पीडित हुन्, त्यति बेला सञ्चारमाध्यममा आएका समाचार, मानवअधिकार वर्षपुस्तक र पीडितको पक्षमा काम गर्दा बनाएका कागजात प्रमाण छन्,’ उनले भने, ‘सके उनीहरूलाई राहत दिऔं, नसके पनि योद्धाका रूपमा सूचीकृत गरौं ।’

विककी श्रीमती अहिले पनि ज्याला–मजदुरी गरेर बसेकी छिन् । उनले श्रीमान्लाई किन पक्राउ गरियो भन्नेसमेत जान्न नपाएको बताइन् । २०७२ सालमा तत्कालीन प्रमुख जिल्ला अधिकारी शेषनारायण पौडेलको अध्यक्षतामा बसेको सर्वदलीय बैठकले उनका लागि राहत व्यवस्था गरिदिने निर्णय गरे पनि अझै पाएकी छैनन् । अन्य दुई परिवारको राहत भने तत्कालीन माओवादीकै विरोधका कारण शान्ति समितिबाट पास नहुँदा रोकिएको थियो ।

प्रकाशित : चैत्र १९, २०७७ १५:४८
प्रतिक्रिया
पठाउनुहोस्

आहा ! रारा गोल्डकप शनिबारदेखि, आठ टोलीले उपाधिका लागि स्पर्धा गर्ने

रासस

पोखरा — मोफसलको प्रतिष्ठित ‘राष्ट्रिय तथा अन्तर्राष्ट्रिय अन्तर क्लबस्तरीय आमन्त्रित आहा ! रारा गोल्ड कप फुटबल प्रतियोगिता’ चैत २१ गते शनिबारदेखि सुरु हुने भएको छ । 

आयोजक सहारा क्लब पोखराले बिहीबार पत्रकार सम्मेलन आयोजना गरी प्रतियोगिताको सम्पूर्ण तयारी पूरा भएको जनाएको छ । ‘खेलकूदको विकासमा सहकार्य गरौँ, पोखरालाई खेलकूद पर्यटन शहरका रूपमा स्थापित गरौँ’ भन्ने उद्देश्यसहित आयोजना गरिएको प्रतितयोगितामा एक विदेशीसहित आठ टोलीले उपाधिका लागि प्रतिस्पर्धा गर्ने क्लबका अध्यक्ष केशवबहादुर थापाले बताए ।

उनका अनुसार प्रतियोगिताको उद्घाटन खेल शनिबार आयोजक सहारा क्लब पोखरा र सशस्त्र प्रहरीको एपिएफ क्लबका बीचमा हुनेछ । प्रतियोगितामा सहारा र एपिएफसहित नेपालका ‘ए’ डिभिजनका क्लबहरु मनाङ मस्र्याङदी, नेपाल पुलिस क्लब, रुस्लान थ्रीस्टार, सङ्कटा क्लब र मच्छिन्द्र क्लबले उपाधिका लागि प्रतिस्पर्धा गर्नेछन् । विदेशी टोली अफ्रिकन रुट एशोएशन, डउला क्यामरुन सहभागी हुनेछ । प्रतियोगिताको विजेता टोलीले रु १० लाख एक हजार तथा उपविजेताले रु पाँच लाख एक हजारसहित ट्रफी पुरस्कार प्राप्त गर्नेछन् ।

यसैगरी यस वर्षदेखि राजनीतिज्ञ एवं उद्योगपति सूर्यबहादुर केसीको स्मृतिमा प्रतियोगिताका उत्कृष्ट गोलकिपर, डिफेण्डर, मिडफिल्डर, स्ट्राइकर र प्रशिक्षकलाई जनही रु २५ हजार नगदसहित पुरस्कृत गरिने क्लबका महासचिव रामजीप्रसाद अधिकारीले जानकारी दिनुभयो ।

सर्वोत्कृष्ट राष्ट्रिय फुटबल खेलाडी सम्मान अभिषेकलाई

यस वर्षको ‘सर्वोत्कृष्ट राष्ट्रिय फुटबल खेलाडी २०७७’ सम्मानबाट राष्ट्रिय टोलीका महत्वपूर्ण सदस्य अभिषेक रिजाललाई पुरस्कृत गरिने भएको छ । राष्ट्रिय टोलीमा रहेर राष्ट्रिय तथा अन्तर्राष्ट्रिय फुटबल प्रतियोगितका माध्यमबाट देशको नाम चिनाउन सफल भएकामा उनलाई नगद ३५ हजार रुपैयाँ, प्रमाणपत्र र दोसल्लाबाट सम्मान गरिने आयोजकले जनाएको छ । प्रतियोगिताको उद्घाटनका अवसरमा रिजाललाई सो सम्मान गरिने क्लबले जनाएको छ ।

प्रतियोगिताको आकर्षकका रूपमा रहेको निर्णायक ट्रफी (रेफ्री), वेष्ट अफ फाइभ ट्रफी, मेन अफ दि म्याच ट्रफी, सर्वोत्कृष्ट खेलाडी ट्रफी, फेयर प्ले ट्रफी एवं खेलाडी मेडललगायत म्यान अफ दि म्याच नगद पुरस्कार सहारा युकेले उपलब्ध गराएको छ । पर्यटकीय शहर पोखरालाई ‘स्पोर्टस हब सिटी’का रूपमा परिचित गराउँदै, नवप्रतिभावान फुटबल खेलाडीलाई आफ्नो खेल कौशल प्रदर्शन गर्ने उचित अवसर प्रदान गर्ने लक्ष्यसहित प्रतियोगितालाई निरन्तरता दिइएको क्लबले जनाएको छ ।

क्लबले कोरोना न्यूनीकरणका लागि सरकारबाट निर्देशित मापदण्डको पूर्ण पालना गरिने र गण्डकी प्रदेश खेलकूद परिषद्को सहयोगमा प्रत्येक दिन दर्शकहरुलाई निःशुल्क मास्कको व्यवस्था गरिएको बताइन्छ । सहाराले प्रतियोगिताबाट बचत रकम क्लबबाट सञ्चालित सहारा फुटबल एकेडेमीमा खर्च गर्दै आएको छ । हाल तेस्रो ब्याचको एकेडेमीमा १४ जिल्लाका २४ बालक आश्रित छन् । एकेडेमीमा उनीहरुले निःशुल्क शिक्षा, दिक्षालगायत फुटबल प्रशिक्षण गर्दै आएका छन् ।

प्रकाशित : चैत्र १९, २०७७ १५:४४
पूरा पढ्नुहोस्
प्रतिक्रिया
पठाउनुहोस्
×