४६ करोड घट्यो हेटौंडाको बजेट

राष्ट्रिय अर्थतन्त्रमा देखिएको प्रतिकुलता, संघ र प्रदेशबाट भएको घट्दो बजेट सीमाका कारण आगामी आवमा बजेटको आकार घटाइएको उपमेयर बानियाँले बताए ।

आगामी आर्थिक वर्षका लागि अनुमान गरिएको खर्च व्यहोर्ने स्रोतमध्ये संघीय सरकारको अनुदानबाट १ अर्ब १६ करोड ५३ लाख, आन्तरिक स्रोतबाट ५३ करोड २७ लाख ९५ हजार, राजस्व बाँडफाँडबाट ६१ करोड ६५ लाख तथा प्रदेश सरकारको विभिन्न अनुदानबाट ११ करोड १७ लाख रुपैयाँ उल्लेख गरिएको छ ।

उपमहानगरले पूर्वाधार क्षेत्र विकासमा पर्ने सडक, ऊर्जा, बत्ती, जलस्रोत, पर्यटन, भवन तथा अवासलगायततर्फ ८८ करोड ८६ लाख ९९ हजार, आर्थिक विकासतर्फ ७ करोड ५६ लाख, सामाजिक विकासतर्फ ९३ करोड १९ लाख, वातावरण तथा विपद् व्यवस्थापनतर्फ ३ करोड १२ लाख, कार्यालय सञ्चालन तथा प्रशासनिक खर्च एवम् वित्तिय व्यवस्थापनतर्फ साँवा व्याज भुक्तानीका लागि ४० करोड ६२ लाख, सुशासन तथा संस्थागत विकासतर्फ २ करोड ५१ लाख रुपैयाँ विनियोजन गरेको छ ।

हेटौंडा–१० मा निर्माणाधीन एकीकृत बसपार्क तथा टर्मिनल भवन निर्माण सम्पन्न गरी आगामी वर्षबाट सञ्चालन गर्न ६ करोड तथा सडक मर्मतका लागि १ करोड ७० लाख रुपैयाँ विनियोजन गरेको छ ।

विभिन्न पूर्वाधार आकस्मिक मर्मतका लागि १ करोड ५० लाख रुपैयाँ विनियोजन गरेको उपमहानगरले पदमपोखरी मुख्य सडक विस्तारका लागि ७ करोड रुपैयाँ छुट्याएको जनाएको छ ।

आगामी आर्थिक वर्षमा जिम्मेवारी सर्ने योजनाको भुक्तानीका लागि १७ करोड, खानेपानी वोर्डसँग सहकार्य र खानेपानीको न्यूनतम महसुल भुक्तानीका लागि २ करोड ८ लाख, नागस्वती फुटबल स्टेडियम निर्माणका लागि १ करोड ७२ लाख, हेटौंडा चक्रपथअन्तर्गत् वडा १५, १६ र १७ का लागि २ करोड रुपैयाँ विनियोजन गरिएको छ ।

सभामा नगर प्रमुख मीनाकुमारी लामाले प्रस्तुत गरेको आगामी वर्षको हेटौंडा उपमहानगरको नीति तथा कार्यक्रम सर्वसम्मत रूपमा पारित भएको छ ।