डेढवर्षे छोरासहित महिला खोलामा हाम फालिन्, छोराको मृत्यु

चितवन जिल्ला प्रहरी कार्यालयले दिएको जानकारीअनुसार भरतपुर महानगरपालिका–२२ पटिहानी बोटे टोलकी ३५ वर्षीया हेमन्ती बोटे बुधबार दिउँसो साढे दुई बजे छोरा बोकेर राप्ती खोलामा हाम फालेकी थिइन् ।

चितवन जिल्ला प्रहरी कार्यालयका प्रवक्ता डीएसपी सूर्य थापाका अनुसार महिलाले रक्सी खाएर खोलामा हाम फालेको खुलेको छ । घटनापछि इलाका प्रहरी कार्यालय गीतानगरको टोली उद्धारका लागि पुगेको थियो । बालक बगेर तलै गएका कारण मृत्यु भएको प्रहरीले जनाएको छ । तीनवटा डुंगामा खोजी गर्न गएको प्रहरी टोलीले घटनास्थलबाट दुई किलोमिटर तल मेजरघाटमा बच्चाको शव फेला पारेको थियो ।

महिलालाई प्रहरीले नियन्त्रणमा लिएर थप अनुसन्धान सुरु गरेको डीएसपी सूर्य थापाले बताए । कालिका नगरपालिकाको पदमपुर घर भएकी ती महिला १० वर्षयता पटिहानी बोटे टोलमा डेरामा बस्दै आएकी थिइन् । उनी नारायण बोटेको घरमा डेरा लिएर बस्दै आएका राम बोटेकी कान्छी श्रीमती हुन् । ‘रक्सी खाएको थियो, बाटोमै सुतेको थियो । मैले यसरी बाटोमा नसुत घरतिर जाउ भनेको थिएँ । रिसाउँदै कराउँदै घरतिर लागेको थियो’ रामले भने ।

केही बेरपछि छोरो बोकेर उनी खोला तिर लागेकी थिइन् । ‘घर आडैमा खोला किनारमा पार्क जस्तो पनि छ । मैले ठाने त्यही पार्कमा बस्न छोरो लिएर गइन् । तर उता तटबन्ध गरेतिर लागेर एक्कासि हाम फालेकी हुन,’ राम बोटेले भने ।

श्रीमतीसँग यसअघि पनि बेला बेलामा सामान्य विवाद हुने गरे पनि कहिल्यै ठूलो झगडा नभएको उनले बताए । उनले त्यसो किन गरिन् आफूले केही बुझ्नै नसकेको राम बताउँछन् ।

जेठी श्रीमती मिर्गौलामा समस्या भएका कारण बितेकी थिइन् । जेठी श्रीमतीबाट दुईवटी छोरी छन् । ‘यो बेलामा त म पनि बिरामी नै थिएँ । दिसापिसाब रोकिएर उपचार गराउँदै थिए । यही बेलामा यस्तो दु:खद घटना भयो । किन भयो, मैले केही सोच्न सक्दिनँ’ रामले भने । बोटे भए पनि उनको लाइसेन्स नभएका कारण राप्ती खोलामा माछा मार्न पाउँदैनन् । उनी ज्याला मजदुरी गरेर गुजारा चलाउँछन् ।