भरियो आइसोलेसन, संक्रमितलाई कहाँ राख्ने अन्योल
मकवानपुर — कोरोना भाइरस संक्रमितलाई राख्नका लागि तयार गरिएको हेटौंडाको आइसोलेसन वार्ड भरिएको छ । हेटौंडा उपमहानगरपालिकाले हेटौंडा–४ स्थित कर्राको श्रमिक माविको नयाँ भवनमा निर्माण गरिएको ३५ बेड क्षमताको आइसोलेसन कोरोना संक्रमितले भरिएको हो ।
पछिल्लो समय कोरोना संक्रमितको संख्या दैनिक बढ्न थालेपछि हेटौंडाको एकमात्र आइसोलेसनमा संक्रमित राख्न सकिँदैन भनेर स्वास्थ्यसँग सम्बन्धित व्यक्तिहरुले भनिरहे पनि त्यसतर्फ कुनै पनि निकायको ध्यान पुगेको छैन । आइसोलेसन वार्डमा संक्रमित राख्न बेड अपुग भएपछि संक्रमित घरमै बस्न बाध्य भएका छन् ।
बिहीबार ३७ जना कोरोना संक्रमित थपिएपछि उनीहरुलाई कहाँ राख्ने भन्ने विषयमा अन्योल भएको छ । मंगलबार थपिएका १३ जना कोरोना संक्रमितमध्ये ८ जना घरमै बसिरहेका छन् । उनीहरुलाई आइसोलेसनमा राखेर उपचार गर्न सक्ने अवस्था नभएपछि घरमै राखिएको आइसोलेसन वार्डका इन्चार्ज भोला चौलागाईंले बताए ।
उनका अनुसार आइसोलेसनमा हाल ४० जना रहेका छन् । जसमध्ये ३९ जना संक्रमित र एकजना शंकास्पद बिरामी रहेका छन् । जिल्लामा हाल सक्रिय कोरोना संक्रमितको संख्या ८४ जना रहेको छ । ‘अब थपिएका संक्रमितलाई कहाँ राख्ने हामी वैकल्पिक उपाय खोज्दैछौं ।’, चौलागाईंले भने ।
उनका अनुसार हाल हेटौंडा–५ का ४ जना, ४ नम्बर वडाको १ र १० नम्बर वडका ३ जना संक्रमितलाई घरकै आइसोलेसनमा राखिएको छ । ‘आइसोलेसनमा राख्नलाई बेड छैन् । घरमै सुरक्षित साथ आइसोलेसनमा राख्ने व्यवस्था मिलाएका छौं ।’, उनले भने ।
मकवानपुरमा हालसम्म कोरोना संक्रमितको संख्या १३४ पुगेको छ । जसमध्ये ४४ जना संक्रमित निको भएर डिस्चार्ज भइसकेका छन् ।
शौचालय व्यवस्थित नहुँदा समस्या
हेटौंडा–४ कर्रास्थित श्रमिक माविको भवनमा सञ्चालनमा रहेको कोभिड–१९ आइसोलेसन वार्डमा व्यवस्थित शौचालय नहुँदा कोरोना संक्रमित र आइसोलेसनमा भर्ना हुनेले सास्ती खेप्नु परिरहेको छ ।जस्ताले बारेर पर्दा राखिएको खुला आकाशमुनिको शौचालय प्रयोग गर्नु परेकाे आइसोलेसनमा बस्नेहरूकाे गुनासाे छ । ३५ बेड क्षमताको कक्षमा व्यवस्थित शौचालय नहुँदा संक्रमित र बिरामीको स्वास्थ्यमाथि लापरबाही भइरहेको गुनासो त्यहाँ रहेकाहरुको छ ।
‘पानी नपरेको बेला त खासै समस्या हुँदैन तर, पानी परेको बेला शौचालय जानुपर्दा भने भिजेरै जानुपर्ने अवस्था छ । विद्यालयको पक्की शौचालय पनि छन् तर सबैलाई पुगिरहेको छैन ।’ आइसोलेसन वार्डका इन्चार्ज भोला चौलागाईंले भने । पक्की शौचालय थप गर्नेबारे कसैले वास्ता नगरेका र संक्रमितको संख्या अझै थपिने हो भने झनै समस्या उत्पन्न हुने देखिएको उनले बताए । जिल्लाका विभिन्न स्थानमा कोरोना लक्षणका बिरामी देखिएपनि स्वाब संकलनका लागि यस आइसोलेसनमै ल्याउने गरिएको छ ।
प्रकाशित : श्रावण २९, २०७७ ११:५६