निषेधाज्ञा कार्यान्वयन गराउन नुवाकोटमा सेना परिचालन- वाग्मती - कान्तिपुर समाचार

निषेधाज्ञा कार्यान्वयन गराउन नुवाकोटमा सेना परिचालन

कृष्ण थापा

नुवाकोट — स्थानीयस्तरमा जनप्रतिनिधिसमेत कोरोना भाइरसको संक्रमण देखिएपछि जिल्ला संकट व्यवस्थापन केन्द्रले मंगलबारबाट निषेधाज्ञाको दायर बढाउँदै सेना परिचालन गरेको छ ।

दुप्चेश्वर गाउँपालिकाका एक जनप्रतिनिधि, बैंकका सुरक्षाकर्मीसहित ४ जनामा कोरोना संक्रमण भएको पाइएपछि संकट व्यवस्थापन केन्द्रले मंगलबारबाट सेना परिचालित गरेको हो । स्थानीय प्रशासनले मंगलबारबाट दुप्चेश्वर गाउँपालिका, तादी गाउँपालिकाका २, ३, ४ र ५, पञ्‍चकन्या गाउँपालिका–४ र ५, शिवपुरी गाउँपालिका–१ देखि ५ र तारकेश्वर गाउँपालिकाका २, ४, ५ र ६ वडामा ८ दिनका लागि निषेधाज्ञा लगाइएको हो ।

संकट व्यवस्थापन केन्द्रले मंगलबारबाट सदरमुकाम विदुर, दम्की, बट्टार, पुरानोबजार, हावाघर, त्रिशूली, बागटार कोलनी क्षेत्रमा माइकिङ गर्दै सेनाको गस्ती थालिएको जबरजंग गणले जनाएको छ ।

प्रमुख जिल्ला अधिकारी झंकनाथ ढकालको अध्यक्षतामा बसेको केन्द्रको बैठकले सोमबार साँझ निषेधाज्ञा कडा गराउन सेना परिचालन गर्ने उक्त निर्णय गरेको हो ।

नुवाकोटमा मंगलबार विदुर नगरपालिकाभित्र महिला र पुरुष गरी दुई जनामा संक्रमण भएको पाइएको जिल्ला स्वास्थ्य कार्यालयले जनाएको छ ।

नुवाकोटमा संक्रमितको संख्या ६३ जना पुगेको छन् ।

प्रकाशित : श्रावण २७, २०७७ १८:३२
प्रतिक्रिया
पठाउनुहोस्

चर्चित भारतीय शायर राहत इन्दौरीको निधन, कोरोना संक्रमित थिए

कान्तिपुर संवाददाता

काठमाडौँ — चर्चित भारतीय शायर तथा गीतकार राहत इन्दौरीको मंगलबार मृत्यु भएको छ । उनी ७० वर्षका थिए । सोमबार कोरोना संक्रमण देखिएका राहत इन्दौरीको मध्य प्रदेशको अरविन्दो अस्पतालमा उपचारका क्रममा मृत्यु भएको हिन्दुस्तान टाइम्सले जनाएको छ । भारतीय सञ्चारमाध्यमहरुका अनुसार उनको हृदयघातबाट मृत्यु भएको हो ।

मंगलबार बिहान ट्वीट गर्दै इन्दौरीले आफूमा कोरोना देखिएको जानकारी दिएका थिए । उनले लेखेका थिए, ‘कोभिडको सुरुवाती लक्षण देखिएकाले हिजो मेरो परीक्षण गरिएको थियो । जसको रिपोर्ट पोजिटिभ आएको छ । म अरबिन्दो अस्पतालमा भर्ना भएको छु । प्रार्थना गर्नुहोस् कि मैले यस रोगलाई छिट्टै जित्न सकूँ ।’

इन्दौरीले लेखेका थुप्रै शायरी र गीतहरु चर्चित छन् । पछिल्लो समय कोरोना भाइरसको संक्रमण बढिरहेका बेला उनले लेखेको कविता ‘बुलाती है मगर जानेका नहीँ’ निकै लोकप्रिय भएको थियो । ‘सामाजिक दूरी कायम गरौं’ भन्ने सन्देशसहित यो कवितालाई प्रयोग गरी धेरैले यसको मिम बनाएका थिए ।

उर्दू भाषाका प्राध्यापकसमेत रहेका उनले उर्दूमा पीएचडीसमेत गरेका थिए । उनले ‘मुन्ना भाइ एमबीबीएस’, ‘मर्डर’ लगायतका बलिउड चलचित्रका लागि समेत गीत रचना गरेका छन् । राहत इन्दौरीको जन्म सन् १९५० को जनवरी १ मा मध्य प्रदेशको इन्दौरमा भएको थियो । मञ्चमा आफ्नो सायरी प्रस्तुत गर्ने शैलीका कारण पनि उनी चर्चित थिए ।

प्रकाशित : श्रावण २७, २०७७ १८:२१
पूरा पढ्नुहोस्
प्रतिक्रिया
पठाउनुहोस्
×