मदन भण्डारी स्वास्थ्य विज्ञान प्रतिष्ठानको उपकुलपतिमा जोशी

प्रताप विष्ट

हेटौडा — वाग्मती प्रदेश सरकारले मदन भण्डारी स्वास्थ्य विज्ञान प्रतिष्ठानको उपकुलपतिमा प्राध्यापक डा. विश्वराज जोशीलाई नियुक्त गरेको छ ।

मुख्यमन्त्री डोरमणि पौडेलको अध्यक्षतामा बुधबार बसेको प्रदेश मन्त्रिपरिषदको बैठकले जोशीलाई ४ वर्षका लागि प्रदेशले स्थापना गरेको प्रतिष्ठानको उपकुलपति नियुक्त गर्ने निर्णय गरेको हो ।

जोशी यसअघि वीर अस्पतालमा नेसनल एकेडेमी अफ मेडिकल साइन्सको रजिस्ट्रार र युरोलोजी विभागका प्रमुख थिए । उपकुलपति नियुक्तीसँगै प्रतिष्ठान सञ्चालनका कार्यहरु अगाडि बढ्ने सरकारका प्रवक्ता आर्थिक मामिला तथा योजनामन्त्री कैलाश ढुंगेलले बताए ।

यसैगरी बैठकले प्रदेश बाल अधिकार समितिमा झबिन्द्र ज्ञवाली, शान्ता बराल, शान्ति श्रेष्ठ, मिनाथापा र लक्ष्मी ढकाललाई मनोनित गर्ने निर्णय गरेको छ ।

बैठकले प्रदेश युवा परिषद् नियमावली २०७७ स्वीकृत गर्ने निर्णय गरेको आर्थिक मामिला तथा योजनामन्त्री कैलाश ढुंगेलले जानकारी दिए । यसैगरी वैदेशिक सहयोग प्राप्ति र कर छुटका लागि संघीय सरकारलाई सिफारिस गर्ने निर्णय पनि भएको मन्त्री ढुंगेलले बताए ।

प्रकाशित : श्रावण १४, २०७७ १७:४४
प्रतिक्रिया
पठाउनुहोस्

फुल्पिङकट्टी पहिरो : बेपत्ता सबैको शव फेला

अनिश तिवारी

सिन्धुपाल्चोक — अविरल वर्षात्‌का कारण खकुण्डोलमा पहिरोले पुरिएर बेपत्ता भएका भोटेकोसी गाउँपालिका ४ फुल्पिङकट्टीका ५ जनाकै शव फेला परेको छ । असार ३१ गते राति करिब साढे १ बजे झरेको पहिरोले फुल्पिङकट्टीकै दुई घर बगाउँदा स्थानीय गेन्जेन शेर्पाका आमा ८५ वर्षीया सुमबुट्टी, श्रीमती ४० वर्षीया सेमसङ्ग, बहिनी ३५ वर्षीया साङ्मुसहित छोरी १४ वर्षीया छिरिङवाङ्गु र १६ वर्षीया याङ्जी बेपत्ता भएका थिए । 

उनीहरुमध्ये बुधबार दिउँसो सुमबुट्टी र सेमसङ्गको शव भेटिएको जिल्ला प्रहरी नायब उपरीक्षक माधवप्रसाद काफ्लेले बताए ।

‘गएको बिहीबार र पहिरो झरेको दिन गरी ३ जनाको शव फेला परिसकेको थियो, अहिले बाँकी दुईको पनि शव पुरिएको अवस्थामा फेला परेको छ,’ उनले भने । सशस्त्र, नेपाली सेनासहित अन्य सुरक्षाकर्मी जनप्रतिनिधि, स्थानीयसँग मिलेर बेपत्ताको खोजी जारी थियो ।

पहिरोले स्थानीय पञ्चकन्या आधारभूत विद्यालयमा क्षति पुगेको छ भने ६० परिवार विस्थापित भएका छन् । स्थानीय नोर्साङ शेर्पाले भने- ‘तल भोटेकोसी बाढीको कटान, माथि पहिरो हामी कहाँ जाने ?,’

प्रकाशित : श्रावण १४, २०७७ १७:४३
पूरा पढ्नुहोस्
प्रतिक्रिया
पठाउनुहोस्
×