इन्द्रावतीको माझीबेतीमा सात वर्षपछि रोपाइँ- वाग्मती - कान्तिपुर समाचार
कान्तिपुर वेबसाईट
AdvertisementAdvertisement

इन्द्रावतीको माझीबेतीमा सात वर्षपछि रोपाइँ

सात वर्षअघि बाढीले बगर बनेको खेतलाई फेरि उर्वर बनाउँदै ३ सय ७० परिवार सामूहिक रोपाइँमा जुटेका छन्
अनिश तिवारी

सिन्धुपाल्चोक — रोपाहार महिला धानको बीउ छुपुछुपु पार्दै ‘असारे भाका’ हाल्न व्यस्त देखिन्थे । कोदाली, फ्याउला बोकेर बाउसे गरिरहेका पुरुषहरू पनि गीतमा मस्त थिए । छेउछाउतिर खेतमा हाते ट्याक्टर र पानी मिलाइरहेकाहरू रैथाने भाकामा सुर हाल्दै थिए । 


इन्द्रावती गाउँपालिका–११ को बोडेगाउँस्थित माझीबेतीमा पछिल्ला वर्ष यो दृश्य दुर्लभ भएको थियो । इन्द्रावतीले उर्वर खेत बढारेर बगर बनाइदिएको थियो । स्थानीयले मेहनत गरेर फेरि बगरलाई खेतमा बदलेका छन् । त्यसैले सात वर्षपछि खेतीमा रमाएका माझी समुदायले प्रकृतिलाई धन्यवाद दिए । अनि गीतमै भने, ‘बल्ल भयो सपना पूरा, बागदेवीले सुनिन् माझीका दुःख ।’

बेती खेतभर झन्डै ३ सय ७० परिवार सामूहिक रूपमा यसरी नै धान रोपाइँमा कस्सिरहेका भेटिए । ‘वर्षौंपछि हाम्रो सपना फर्किएको छ, बगर बनेको खेतलाई योग्य बनाएर एक भएर धान रोप्न पाएका छौं, हर्षको सीमा छैन,’ अभियन्तासमेत रहेका रामजी माझीले भने ।

२०७० सालको बाढीले यहाँको दुई हजार रोपनी खेत बनाएको थियो । प्रदेश र स्थानीय सरकारको सहयोगमा ७ वर्षपछि सामूहिक रूपमा सय रोपनी खेतमा रोपाइँ थालिएको इन्द्रावती गाउँपालिकाका अध्यक्ष वंशलाल तामाङले जानकारी दिए ।

प्रदेश कृषि मन्त्रालयका सल्लाहकार लालकुमार केसी, मेलम्ची नगरकी उपमेयर भगवती नेपाल, जिल्ला समन्वय समितिकी उपप्रमुख बालकुमारी सापकोटा पनि रोपाइँमा सहभागी भए । रोपाइँ गर्न सामूहिक खेती प्रवर्द्धन समिति बनाइएको छ । कोरोना संक्रमणबाट जोगिन स्वास्थ्य परीक्षण गरी सामाजिक दूरी कायम राखेर रोपाइँ थालिएको समितिले जनाएको छ ।

प्रकाशित : श्रावण १२, २०७७ १०:४८
प्रतिक्रिया
पठाउनुहोस्

केरूङ च्छो तालको सतह एक मिटर घट्यो

'तत्कालका लागि जोखिम टर्‍यो'
अनिश तिवारी

सिन्धुपाल्चोक — केरुङ च्छो तालको एक मिटर सतह घटेको जिल्ला प्रशासन कार्यालय सिन्धुपाल्चोकले बताएको छ । तालमा पानी भरिएपछि चिनियाँ अधिकारीले फुट्न सक्‍ने चेतावनी दिएका थिए ।

चीनको न्यालम र खासाक्षेत्रका वैदेशिक विभाग प्रमुख र प्रतिनिधिले वर्षात रोकिएपछि तालको सतह एक मिटर घटेको जानकारी आफूलाई दिएको सिन्धुपाल्चोकका प्रमुख जिल्ला अधिकारी उमेशकुमार ढकालले बताए ।

चिनियाँ विशेषज्ञसहित भूगर्भविद्को ७ जनाको टोलीले उक्त तालको सतह घटबढले जोखिम बढाउन सक्ने या नसक्ने भन्नेबारेमा अध्ययन गरिरहेको उनले बताए । ‘विषयविज्ञको टिम तालमा पुगेर अध्ययन गर्दैछ, त्यसपछि जोखिम हुने या नहुने भन्नेबारेमा निर्क्यौल आउनेछ, तत्कालका लागि जोखिम भने टरेको देखिन्छ,’ प्रजिअ ढकालले कान्तिपुरलाई भने ।

सीमावर्ती तातोपानी क्षेत्रबाट झण्डै ५० किलोमिटरको दुरीमा रहेको तिब्बतको कुती बजारको माख्लो भेगस्थित च्छो ताल फुट्ने आशंकामा चीन पक्षले मंगलबार जानकारी दिएको थियो ।

बेलुकीपख प्रशासन र सुरक्षाकर्मीले हुनसक्ने जोखिमको बारेमा सुचना फुकेपछि नदीको तटीय भेगमा रहेका सीमावर्ती क्षेत्र तातोपानी ,हिन्दी,चाकुदेखि बाह्रबिसे, खाडीचौर, बलेफी ,सुकुटेजस्ता दुई दर्जन बजारका स्थानीयमा दौडादौडी चलेको थियो । उनीहरुले रातारात सामाग्री ओसारेका थिए ।

प्रकाशित : श्रावण ६, २०७७ १६:०४
पूरा पढ्नुहोस्
प्रतिक्रिया
पठाउनुहोस्
×