पहिरोले बीपी राजमार्ग अवरुद्ध- वाग्मती - कान्तिपुर समाचार
कान्तिपुर वेबसाईट
AdvertisementAdvertisement

पहिरोले बीपी राजमार्ग अवरुद्ध

रोशी र चदाहाले धान खेत कटान
राजकुमार कार्की

सिन्धुली — अविरल वर्षाका कारण ठाउँ–ठाउँमा आएको पहिरोले बीपी राजमार्ग पनि मंगलबार दिउँसोदेखि अवरुद्ध भएको छ । जिल्ला प्रहरी कार्यालयका अनुसार बीपी राजमार्गको खुर्कोट–नेपालथोक खण्डको कमेरेफाँटमा माथिबाट पहिरो झरेकाले सडक अवरुद्ध बनेको छ । 



अवरुद्ध सडक खुलाउन दुई वटा एस्काभेटरले पहिरो पन्छाउने काम भइरहेको छ । दुम्जा र खुर्कोट नजिकै माथिबाट लेदो माटो खसेर पटकपटक सडक अवरुद्ध भएको छ । पानी परिरहेकाले खहरेमा आएको बाढीले बीपी राजमार्गमा यातायात सञ्चालन हुन सकेको छैन् । महाभारत क्षेत्रको खनियाखर्क नजिक पनि लेदो माटो झरेर सडक अवरुद्ध बनेको छ ।

त्यस्तै मध्यपहाडी लोकमार्गको पाँच/सात ठाउँमा पहिरो जाँदा यातायात सेवा अवरुद्ध भएको प्रहरी नायब उपरीक्षक श्यामबहादुर क्षेत्रीले जानकारी दिए । दुवै राजमार्ग अवरुद्ध हुँदा राजधानी काठमाडौं जाने र फर्कने सयौं सवारी साधन बीच सडकमा अलपत्र परेको स्थानीयले बताएका छन् । मध्येपहाडी लोकमार्गकै फिक्कल गाउँपालिकामा सोखुखोला, बादुरेखोला र खाङ्गसाङ्ग खोलामा आएको बाढीले यातायात अवरुद्ध भएको छ ।

प्रमुख जिल्ला अधिकारी योगेन्द्रप्रसाद पाण्डेले बाढी पहिरोका कारण जिल्लामा मानवीय क्षति नभएको तर ग्रामीण सडकहरुमा पूर्णत यातायात बन्द रहेको बताए । बीपी र मध्य पहाडी लोकमार्गमा सडक माथिबाट जथाभावी खनिएका कच्ची सडकबाट लेदो र माटो खस्ने क्रम चलिरहेकाले सफाइका लागि स्थानीय तह र सुरक्षा निकाय तयारी अवस्थामै रहेको उनले जानकारी दिए ।

उनले भने, ‘पहिरो पन्छाउने काम पनि भइरहेको छ, माथिबाट लेदो माटो बगेर पनि आइरहेको छ । राजमार्ग माथि जथाभावी खनिएका कच्चि सडक समस्याको रुपमा देखा परिरहेका छन् ।’ सुनकोशी गाउँपालिका–१ को दुम्जा फाँटमा रोशी खोला र तीनपाटन गाउँपालिकामा चदाहा खोलाले धान खेत कटान तथा बाढी पसेर पुरेको छ । तीन पाटन गाउँपालिका अध्यक्ष कर्णबहादुर थापाले मंगलबार बिहान वडा नम्बर १ को बेल्घारी फाँटमा चादाहा खोलामा आएको बाढी पसेर खेत पुरेको बताए ।

दुम्जामा माथिल्लो देवीस्थान फाँट र नेपालथोक फाँटमा रोशीले खेत कटान गरिरहेको स्थानीय उपेन्द्र कोइरालाले बताए । आदिलिंग कुशेश्वर महादेव मन्दिरको पश्चिमतर्फको छेउमै रोशी खोला पसेको छ । व्यवस्थित तटबन्धको अभावमा सुनकोशीको ठूलो फाँटमा वर्षेनी बाढीले क्षति पुर्‍याउँदै आएको छ ।

प्रकाशित : श्रावण ६, २०७७ १४:०२
प्रतिक्रिया
पठाउनुहोस्

कर्मचारी फिर्ता नपठाउन फिक्कल गाउँपालिकालाई मन्त्रालयको निर्देशन

राजकुमार कार्की

सिन्धुली — फिक्कल गाउँपालिकाबाट गत साता मन्त्रालय फर्काइएका इन्जिनियरलाई गाउँपालिकामै फिर्ता गरेर काममा लगाउन संघीय मामिला तथा सामान्य प्रशासन मन्त्रालयले निर्देशन दिएको  छ ।  

लोकसेवाबाट सिफारिस भएर खटिएका कर्मचारी फिर्ता पठाउने निर्णय कानुनविपरीत रहेको भन्दै मन्त्रालयले गाउँपालिकालाई वित्तीय समानीकरणको अनुदान समेत रोक्का गरिदिएको छ ।

फिक्कल गाउँपालिकाले इन्जिनियर विष्णुप्रसाद कँडेललाई अयोग्य ठहर गर्दै साताअघि मन्त्रालयमा फिर्ता पठाएको थियो । मन्त्रालयले मन्त्रिस्तरको निर्णय भन्दै गाउँपालिकालाई पठाएको पत्रमा लोकसेवा आयोगबाट सिफारिस भएका स्थायी कर्मचारीलाई कुन कानुनअन्तर्गत फिर्ता पठाइएको हो भनी प्रश्न सोधिएको छ । आगामी दिनमा कर्मचारी फिर्ता पठाउने र कानुन उल्लंघन हुने घटना नदोहोर्‍याउन पनि चेतावनी दिइएको छ ।

मन्त्रालयको पत्र प्रधानमन्त्री तथा मन्त्रिपरिषद्को कार्यालय, अर्थ मन्त्रालय, राष्ट्रिय प्राकृतिक स्रोत तथा वित्त आयोग, अख्तियार दुरुपयोग अनुसन्धान आयोग, महालेखा परीक्षकको कार्यालयलाई समेत बोधार्थ गरिएको छ । गाउँपालिकाको उक्त निर्णय सहकारीता, समन्वय र सह–अस्तित्वको सिद्धान्तविपरीत रहेको मन्त्रालयले जनाएको छ ।

फिक्कल गाउँपालिकाले इन्जिनियर कँडेलले सन्तोषजनक काम नगरेको भन्दै असार ३१ गते गाउँ कार्यपालिकाबाट निर्णय गराई मन्त्रालयमा फिर्ता पठाएको थियो । गाउँपालिका अध्यक्ष धनबहादुर कार्कीद्वारा हस्ताक्षरित पत्रमा गाउँपालिकामा रहेर पुर्‍याउनुपर्ने सहयोग तथा काममा सन्तोषजनक नदेखिएको, उपभोक्ता र जनप्रतिनिधिमा फरक प्रकृतिको व्यवहार गरेकाले गाउँपालिकामा सोही पदमा रही कामकाज गर्न अयोग्य भएको ठहर गर्दै हाजिर नगराउने र मन्त्रालयमा फिर्ता पठाउने उल्ल्खे गरिएको छ ।

‘कोरोना कहरको समयमा उपभोक्तासँग मिलेर जनतालाई सहयोग पुग्ने गरी काम गर्नुपर्नेमा इन्जिनियर कँडेलले दुःख दिने मात्र नियत राखेकाले बाध्य भएर फिर्ता गर्नुपरेको हो,’ कार्कीले भने ।

प्रकाशित : श्रावण ६, २०७७ १३:३०
पूरा पढ्नुहोस्
प्रतिक्रिया
पठाउनुहोस्
×