कर्मचारी फिर्ता नपठाउन फिक्कल गाउँपालिकालाई मन्त्रालयको निर्देशन- वाग्मती - कान्तिपुर समाचार

कर्मचारी फिर्ता नपठाउन फिक्कल गाउँपालिकालाई मन्त्रालयको निर्देशन

राजकुमार कार्की

सिन्धुली — फिक्कल गाउँपालिकाबाट गत साता मन्त्रालय फर्काइएका इन्जिनियरलाई गाउँपालिकामै फिर्ता गरेर काममा लगाउन संघीय मामिला तथा सामान्य प्रशासन मन्त्रालयले निर्देशन दिएको  छ ।  

लोकसेवाबाट सिफारिस भएर खटिएका कर्मचारी फिर्ता पठाउने निर्णय कानुनविपरीत रहेको भन्दै मन्त्रालयले गाउँपालिकालाई वित्तीय समानीकरणको अनुदान समेत रोक्का गरिदिएको छ ।

फिक्कल गाउँपालिकाले इन्जिनियर विष्णुप्रसाद कँडेललाई अयोग्य ठहर गर्दै साताअघि मन्त्रालयमा फिर्ता पठाएको थियो । मन्त्रालयले मन्त्रिस्तरको निर्णय भन्दै गाउँपालिकालाई पठाएको पत्रमा लोकसेवा आयोगबाट सिफारिस भएका स्थायी कर्मचारीलाई कुन कानुनअन्तर्गत फिर्ता पठाइएको हो भनी प्रश्न सोधिएको छ । आगामी दिनमा कर्मचारी फिर्ता पठाउने र कानुन उल्लंघन हुने घटना नदोहोर्‍याउन पनि चेतावनी दिइएको छ ।

मन्त्रालयको पत्र प्रधानमन्त्री तथा मन्त्रिपरिषद्को कार्यालय, अर्थ मन्त्रालय, राष्ट्रिय प्राकृतिक स्रोत तथा वित्त आयोग, अख्तियार दुरुपयोग अनुसन्धान आयोग, महालेखा परीक्षकको कार्यालयलाई समेत बोधार्थ गरिएको छ । गाउँपालिकाको उक्त निर्णय सहकारीता, समन्वय र सह–अस्तित्वको सिद्धान्तविपरीत रहेको मन्त्रालयले जनाएको छ ।

फिक्कल गाउँपालिकाले इन्जिनियर कँडेलले सन्तोषजनक काम नगरेको भन्दै असार ३१ गते गाउँ कार्यपालिकाबाट निर्णय गराई मन्त्रालयमा फिर्ता पठाएको थियो । गाउँपालिका अध्यक्ष धनबहादुर कार्कीद्वारा हस्ताक्षरित पत्रमा गाउँपालिकामा रहेर पुर्‍याउनुपर्ने सहयोग तथा काममा सन्तोषजनक नदेखिएको, उपभोक्ता र जनप्रतिनिधिमा फरक प्रकृतिको व्यवहार गरेकाले गाउँपालिकामा सोही पदमा रही कामकाज गर्न अयोग्य भएको ठहर गर्दै हाजिर नगराउने र मन्त्रालयमा फिर्ता पठाउने उल्ल्खे गरिएको छ ।

‘कोरोना कहरको समयमा उपभोक्तासँग मिलेर जनतालाई सहयोग पुग्ने गरी काम गर्नुपर्नेमा इन्जिनियर कँडेलले दुःख दिने मात्र नियत राखेकाले बाध्य भएर फिर्ता गर्नुपरेको हो,’ कार्कीले भने ।

प्रकाशित : श्रावण ६, २०७७ १३:३०
प्रतिक्रिया
पठाउनुहोस्

किशोरीलाई बलात्कार गरेको आरोपमा एक पक्राउ

पेट दुखेर अस्पताल लगिएकी किशोरी गर्भवती भएको खुलेपछि पीडित परिवारले प्रहरीमा उजुरी दिएको थियो
राजकुमार कार्की

सिन्धुली — किशोरीलाई बलात्कार गरेको आरोपमा प्रहरीले गोलन्जोर गाउँपालिका–७ खुर्कोटका ४५ वर्षीय विदुरप्रसाद देवकोटालाई पक्राउ गरेको छ । स्वास्थ्य जाँचका क्रममा किशोरी गर्भवती भएको खुलेपछि पीडित परिवारले प्रहरीमा उजुरी दिएको थियो ।

इलाका प्रहरी कार्यालय खुर्कोटका अनुसार १५ वर्षीया किशोरीका आफन्तको उजुरीका आधारमा देवकोटालाई पक्राउ गरी सोमबार जिल्ला प्रहरी कार्यालयमा बुझाइएको छ । देवकोटाले किशोरीलाई गत माघमा बलात्कार गरेको प्रहरी निरीक्षक शान्ता वाइबाले परिवारलाई उद्धृत गर्दै बताइन् । उनका अनुसार बालिकाले पेट दुख्यो भनेपछि आफन्तले शनिबार स्थानीय सुनकोसी मेडिकलमा जाँच गराउन ल्याएका थिए ।

देवकोटाले त्रास देखाएर घटनाबारे कसैलाई नबताउन दबाब दिएको भनी पीडित किशोरीले बयान दिएको प्रहरी निरीक्षक वाइबाले सुनाइन् । किशोरीले घाँस काट्न गएका बेला आफूमाथि बलात्कार भएको प्रहरीलाई बताएकी छन् ।

स्थानीयका अनुसार देवकोटाले सुरुमा घटना गाउँमै गुपचुप गराउन खोजे पनि पीडित पक्ष मानेको थिएन । त्यसपछि फरार भएका उनलाई प्रहरीले गोप्य सूचनाका आधारमा आइतबार राति ग्वालटारबाट पक्राउ गरेको हो । किशोरीलाई अहिले महिला सञ्जालले संरक्षण दिएर राखेको छ । जिल्ला प्रहरी कार्यालयका प्रहरी नायब उपरीक्षक श्यामबहादुर क्षेत्रीले घटनाबारे थप अनुसन्धान भइरहेको बताए ।

प्रकाशित : श्रावण ५, २०७७ १३:३७
पूरा पढ्नुहोस्
प्रतिक्रिया
पठाउनुहोस्
×