कान्तिपुर वेबसाईट
AdvertisementAdvertisement

बाढीपहिरोमा ज्यान गुमाउने परिवारलाई राहत घोषणा

सुवास विडारी

मकवानपुर — बाढीपहिरोका कारण ज्यान गुमाउनेको परिवार वाग्मती प्रदेश सरकारले राहतस्वरुप प्रतिपरिवार एकलाख रुपैयाँ उपलब्ध गराउने भएको छ ।

आइतबार बसेको वाग्मती प्रदेशको मन्त्रिपरिषद्को बैठकले प्रदेशको १३ जिल्लामा बाढीपहिरोमा परी ज्यान गुमाउनेहरुको परिवारलाई प्रतिपरिवार एकलाख रुपैयाँ उपलब्ध गराउने निर्णय गरेका आर्थिक मामिला तथा योजना मन्त्री कैलशाप्रसाद ढुंगेलले जानकारी दिए । उनका अनुसार अविरल वर्षाका कारण आएको बाढी पहिरोमा परी हालसम्म प्रदेशभर ज्यान गुमाउने २५ जनाको परिवारलाई राहत रकम तत्काल उपलब्ध गराइनेछ ।

त्यसैगरी घाइते भएका व्यक्तिहरुलाई उपचारको व्यवस्था मिलाउने र बेपत्ता भएकाहरुको खोजी कार्य गरी उद्धार गर्न सम्बन्धित जिल्लाका विपद् व्यवस्थापन समन्वय समितिहरुलाई सक्रिय तुल्याइने निर्णय बैठकले गरेको उनले बताए । विपद् व्यवस्थापन समन्वय समितिलाई सक्रिय तुल्याउन प्रदेश सरकारले आवश्यक स्रोत साधनको व्यवस्था गरिने ढुंगेलले जानकारी दिए ।

बैठकले आर्थिक कार्यविधि ऐनको प्रथम संशोधन २०७७ को मस्यौदा र वातावरण संरक्षण गर्न बनेको अध्यादेश २०७७ लाई प्रदेशसभामा दर्ताका लागि स्वीकृत समेत प्रदान गरेको छ । साउन २ गते बस्‍ने प्रदेशसभाको बैठकमा छलफल गर्ने गरी दुईवटा विधेयक दर्ता गराउन लागिएको हो ।

प्रकाशित : असार २८, २०७७ १७:०४
प्रतिक्रिया
पठाउनुहोस्

२७ महिनापछि संसदीय समितिले पाए नेतृत्व

चाँदनी कठायत

वीरेन्द्रनगर — गठन भएको २७ महिनापछि कर्णाली प्रदेशसभाका ४ वटा संसदीय समितिले नेतृत्व पाएका छन् । आइतबार प्रदेशसभा सचिवालयमा बसेका चारवटै समितिको छुट्टाछुट्टै बैठकले सर्वसम्मत रुपमा नेतृत्व चयन गरेका हुन् ।

कर्णाली प्रदेशसभाका संसदीय समितिका अध्यक्षलाई सपथ खुवाउँदै सभामुख राजबहादुर शाही ।

बैठकले सार्वजनिक लेखा समितिको अध्यक्षमा यसअघि नेतृत्व गरिरहेका कांग्रेस सांसद दिनबन्धु श्रेष्ठलाई नै चयन गरेको छ । यस्तै अर्थ तथा प्राकृतिक स्रोत समितिमा नेकपाका गणेशप्रसाद सिंह, विधायन तथा प्रदेश मामिला समितिमा नेकपाकै सांसद दानसिं परियार र सामाजिक विकास समितिमा पनि नेकपाकी देवी ओली सर्वसम्मत चयन भएका हुन् ।

प्रदेशसभाको २०७४ चैत २६ गतेको दसौं बैठकले चारवटा समिति गठन गरेको थियो । तर विभिन्‍न कारण देखाउँदै करिब साढे २ वर्षसम्म समितिले नेतृत्व पाउन सकेको थिएन । यसअघि ज्येष्ठ सदस्यले समितिको नेतृत्व गर्दै आएका थिए । ज्येष्ठ सदस्यताका आधारमा अर्थ तथा प्राकृतिक स्रोत समितिमा अमरबहादुर थापा, विधायन तथा प्रदेश मामिला समितिमा पदमबहादुर रोकाया, सामाजिक विकास समितिमा राजु नेपाली र सार्वजनिक लेखा समितिमा दीनबन्धु श्रेष्ठले अध्यक्षता गरेका थिए ।

समितिका चारैजना अध्यक्षले आइतबार नै पद तथा गोपनीयताको सपथ तथा पदभार पनि ग्रहण गरेका छन् । उनीहरुलाई सभामुख राजबहादुर शाहीले सपथ खुवाए । चयन भएलगत्तै सांसदहरुले जनताका माझमा धेरै विधेयक छलफल गराइ जनपक्षीय कानुन निर्माण गर्ने प्रतिबद्धता जनाएका छन् ।

सामाजिक विकास समितिकी अध्यक्ष ओलीले समितिको कार्ययोजना नै बनाएर अब बाँकी रहेको कार्यकालमा उत्कृष्ट काम गर्ने दाबी गरिन् । सरकारको कामको निगरानी गर्ने भन्दै विधायन तथा प्रदेश मामिला समितिका अध्यक्ष परियारले सरकारलाई लगाम लगाउने काम गर्ने बताए ।

प्राकृतिक स्रोत समितिका अध्यक्ष सिंहले पनि कानुन निर्माण गर्दा जनताका माझमा छलफल गर्ने कामलाई तीव्रता दिइने उल्लेख गरे । सार्वजनिक लेखा समितिका अध्यक्ष श्रेष्ठले आफ्नै नेतृत्वमा अहिलेसम्म प्रभावकारी काम गरेको भन्दै आगामी दिनमा पनि थप निखारताका साथ काम गर्दै सरकारको कामलाई पारदर्शी बनाउन समितिले महत्वपूर्ण भूमिका खेल्ने जनाए ।

प्रकाशित : असार २८, २०७७ १६:५१
पूरा पढ्नुहोस्
प्रतिक्रिया
पठाउनुहोस्
×