इन्द्रावती नदीमा ३ जना बेपत्ता- वाग्मती - कान्तिपुर समाचार
कान्तिपुर वेबसाईट
AdvertisementAdvertisement

इन्द्रावती नदीमा ३ जना बेपत्ता

नगेन्द्र अधिकारी

काभ्रे — अविरल वर्षापछिको बाढीमा मण्डनदेउपुर–१० का ३ जना हराइरहेका छन् । वडाका १३ वर्षीय अभिषेक नेपाली, ४६ वर्षीय सम्फु माझी र ३० वर्षीय चन्द्रबहादुर तामाङ हराइरहेको जिल्ला प्रहरी कार्यलय काभ्रेले जनाएको छ । सशस्त्र प्रहरी बल (एपिएफ) को गोताखोरसहितको टोलीले खोजी गरेपनि भेटिएका छैनन् । 

वडाअध्यक्ष विष्णुमणि नेपालका अनुसार साथीहरुसँग गएका उनीहरुलाई भंगालो तर्ने क्रममा नदीले बगाएको थियो ।

इन्द्रावती गाउँपालिकास्थित रयालेमा पनि खेती भएका सम्फु काम सकेर घर फर्कने क्रममा खोलाले बगाएको नेपालले जानकारी दिए । हल्देटारका तामाङको खोलापारी होटल भएकोले घर फर्कने क्रममा उनलाई पनि बगाएको नेपालले जानकारी दिए । ‘नजिकै पुल पनि थिएन, बहाव नबुझी खोला तर्न खोज्दा बगाएको हुन सक्छ ।’ वडाअध्यक्ष नेपालले भने ।

प्रकाशित : असार २८, २०७७ ०८:४७
प्रतिक्रिया
पठाउनुहोस्

अस्पतालले गलत रिपोर्ट दिँदा संक्रमित युवती परिवारसँग घुलमिल

नगेन्द्र अधिकारी

काभ्रे — धुलिखेल अस्पतालले झुक्किएर अर्कैको रिपोर्ट दिँदा कोरोना संक्रमित एक युवती परिवारसँग घुलमिल भएकी छन् । अस्पतालकै रिपोर्टका आधारमा क्वारेन्टाइनबाट घर पठाइएकी उनको वास्तविक रिपोर्ट भने पोजिटिभ रहेको खुलेको छ ।

बनेपा–१० की २४ वर्षीया ती युवती जेठ २९ गते कुवेतबाट फर्किएकी हुन् । बुडोलमा बनेपा नगरपालिकाले तयार गरेको क्वारेन्टाइनमा बसेकी उनको पीसीआर परीक्षणका लागि स्वाब संकलन भएको थियो । तर, अस्पतालले एउटै नाम गरेकी अर्कै महिलाको नेगेटिभ आएको रिपोर्ट उनलाई दिएपछि नगरपालिकाले १४ दिनपछि घर पठाएको थियो ।

अस्पतालले आफ्नो गल्ती स्विकारेको छ । ‘नाम र उमेर एउटै रहेछ, ठेगाना यकिन नगरी अर्कैको रिपोर्ट पठाइदिएछन्,’ अस्पतालका सूचना अधिकारी दीपक दाहालले भने, ‘गल्ती नदोहोर्‍याउन ल्याबका कर्मचारीलाई सचेत गराएका छौं ।’

अहिले संक्रमितको परिवारका ६ जनालाई नै क्वारेन्टाइनमा राखेर कन्ट्याक्ट ट्रेसिङ भइरहेको वरिष्ठ स्वास्थ्य प्रशासक डा. नरेन्द्रकुमार झाले जानकारी दिए । कुवेतबाट फर्किएदेखि क्वारेन्टाइनमा रहेकी उनको ११औं दिनमा गरिएको आरडीटी शंकास्पद देखिएपछि पीसीआर गरिएको थियो । बनेपा नगरपालिकाले अस्पतालले दिएको रिपोर्टकै आधारमा घर पठाइएको बताएको छ ।

यसअघि पाँचखाल नगरपालिकाका एक युवकको घर फर्किएको भोलिपल्ट पीसीआर रिपोर्ट पोजिटिभ आएको थियो । तत्काल उनको परिवारलाई पनि क्वारेन्टाइनमा राखिएको थियो । यसअघि संक्रमित भएका ६ जना निको भएर घर फर्किसकेका छन् ।

प्रकाशित : असार १८, २०७७ ०९:०१
पूरा पढ्नुहोस्
प्रतिक्रिया
पठाउनुहोस्
×