संक्रमण मुक्त भएपछि दुबोको माला लगाएर विदाई- वाग्मती - कान्तिपुर समाचार

संक्रमण मुक्त भएपछि दुबोको माला लगाएर विदाई

राजकुमार कार्की

सिन्धुली — सिन्धुली अस्पतालबाट तीनजना पुरुष कोरोना भाइरसको संक्रमणबाट मुक्त भएपछि सोमबार घर फर्किएका छन् । २२ दिनसम्म आइसोलेसन कक्षमा रहेका उनीहरुको पीसीआर परीक्षण नतिजा निगेटिभ आएपछि सिन्धुली अस्पतालले बिदाइ गरेको अस्पताल व्यवस्थापक विमल श्रेष्ठले बताए ।

आइसोलेसन कक्षमा रहेको १४ दिनसम्म कुनै लक्षण नदेखिएपछि अस्पतालले स्वाब परिक्षण नगरी घर पठाउन खोज्दा स्थानीयको विरोधपछि उनीहरु रोकिएका थिए ।

वाग्मती प्रदेश किटजन्य प्रयोगशालामा गरिएको पीसीआर परिक्षणमा नतिजा निगेटिभ आएपछि उनीहरुलाई सिन्धुली अस्पतालले विदाई गरेको हो । तीनै जनालाई अस्पतालमा कार्यरत नर्स, अनमी, अन्य महिला कर्मचारीले तयार गरेको दुबोको माला लगाएर विदाई गरिएको थियो ।

संक्रमित हुँदाको व्यवहार र अस्पताल कर्मचारीहरुले गरेको हेरचाहले लक्षण नै नदेखिई कोरोना भाइरस मुक्त हुन सफल भएको उनीहरुले प्रतिक्रिया दिएका छन् । तीनैजनालाइ घरसम्म पुग्नका लागि जिल्ला विपद् व्यवस्थापन समितिले यातायातको व्यवस्था समेत गरिदिएको छ ।

प्रजिअ एवं विपद् व्यवस्थापन समितिका अध्यक्ष योगेन्द्र पाण्डेले कोरोना मुक्त भएर घर फर्किएका तीनैजनालाई समाजमा सचेतना फैलाउन र आफ्ना अनुभव सुनाउन सुझाएका छन् । कोरोना भाइरस संक्रमण फैलन नदिन र संक्रमितको मनोबल बढाउन कोरोना संक्रमण मुक्त हुनेहरुको अनुभव सहायक सिद्ध हुने उनको भनाइ थियो ।

तीनजनालाई घर पठाएपछि सिन्धुलीमा कोरोना भाइरस संक्रमित निको हुनेको संख्या चार भएको छ भने कमलामाइ नगरपालिका–१० कै एकजना पुरुष संक्रमित मात्र अस्पतालको आइसोलेसनमा उपचाररत रहेका छन् । उनमा पनि कोरोना भाइरसको कुनै लक्षण नदेखिएकाले चाँडै घर फर्किने अस्पताल व्यवस्थापक श्रेष्ठले विश्वास व्यक्त गरे । यस अघि सिन्धुलीको भिमानकी संक्रमित महिला कोरोना संक्रमण मुक्त भएर घर फर्किसकेकी छिन् ।



प्रकाशित : असार ८, २०७७ १६:०२
प्रतिक्रिया
पठाउनुहोस्

सिन्धुलीको दुधौलीमा सर्पले डस्दा युवकको मृत्यु

राजकुमार कार्की

सिन्धुली — विषालु सर्पले डसेर सिन्धुलीको दुधौली नगरपालिकामा एक युवकको मृत्यु भएको छ । दुधौली नगरपालिका ५ सिर्थौलीका २१ वर्षीय शिवाज गोराइतको विषालु सर्पले टोक्दा मृत्यु भएको हो ।


स्थानीय शिक्षक दाताराम गौतमका अनुसार विषालु सर्पले राति सुतेको ठाउँमा मृतकको दाहिने हातमा टोकेको थियो । प्राथमिक स्वास्थ्य केन्द्रमा सर्पदंश उपचार केन्द्र भएपनि चिकित्सक नहुँदा ज्यान गएको परिवारजनले आरोप लगाएका छन् । सर्पदंश उपचार केन्द्र दुधौलीमा लैजानका लागि साधन नपाएकाले अकालमै ज्यान गुमाएका भन्दै स्थानीय र परिवारजनले विरोध गरेपछि सिर्थौलीमै चिकित्सक राख्ने सहमती भएको वडाध्यक्ष चन्द्रकिशोर थारुले बताए ।

मृतकका बुबा लक्ष्मण गोराइतले सिर्थौलीको प्राथमिक स्वास्थ्य केन्द्रमा करिब एकघण्टा डाक्टरको पर्खाइमा बसेको बिरामीलाई सामान्य पट्टी बाँधिदिने कामसमेत नगरिदिएकाले छोराको अकालमै ज्यान गएको गुनासो गरे । गर्मी बढेसँगै कमलाखोंच क्षेत्रमा सर्पदंशका घटना बढ्ने गरेका छन् । कमलाखोंच क्षेत्रमा विषालु गोमन, करेत, धामन लगायतका सर्पहरु बढी मात्रामा पाइन्छन् ।

प्रकाशित : असार ६, २०७७ १४:२४
पूरा पढ्नुहोस्
प्रतिक्रिया
पठाउनुहोस्
×