कोरोनाबारे भ्रम फैलाएको आरोपमा महिला पक्राउ

कान्तिपुर संवाददाता

चितवन — कोरोना भाइरस (कोभिड–१९) बारे भ्रम फैलाएको भन्दै चितवन प्रहरीले एक महिलालाई पक्राउ गरेको छ । माडी नगरपालिका–७ जगन्नाथपुरी बस्ने ३८ वर्षीया जानकी ढुंगानालाई प्रहरीले पक्राउ गरेको हो ।

ढुंगानाले ‘यशुलाई विश्वास गर्नुहोस तपाईंहरूलाई केही हुँदैन, कोरोना भाइरसले पनि छुँदैन,’ भन्दै हिँडेको अवस्थामा पक्राउ गरिएको प्रहरीले जानकारी दिएको छ ।

विश्वव्यापी महामारीको रूपमा रहेको कोरोनाको विषयमा धर्मको आधारमा गलत कुरा फैलाएको भनेर स्थानीयले उजुरी गरेपछि हामीले उनलाई पक्राउ गरेको हो,’ चितवन जिल्ला प्रहरी कार्यालयका प्रवक्ता डीएसपी एकनारायण कोइरालाले भने ।

ती महिलालाई मुलुकी अपराध संहिता अन्तर्गतको अभद्र व्यवहारमा मुद्दा लगाउन अनुसन्धान प्रक्रिया अगाडि बढाएको कोइरालाले बताए ।

प्रकाशित : चैत्र १७, २०७६ ०९:२७
ADVERTISEMENT
ADVERTISEMENT
प्रतिक्रिया
पठाउनुहोस्

क्‍वारेन्टाइनको दैनिकी– खायो, सुत्यो

हरि गौतम

रुकुम पूर्व — आवश्यक खानेकुरा प्लास्टिकको पोकोमा आउँछ । झोलिलो पदार्थदेखि दाल, भात प्लाष्टिकमै आउँछ । खाजादेखि खाना खाने तालिका बनाइएको छ । बिहान उठेर झोलिलो पदार्थ खान्छन् । त्यसपछि ११ बजे दाल, भात आउँछ । त्यो खाएर सुतेपछि अपराह्‍न झोलिलो पदार्थ खुवाइन्छ । बेलुका दाल, भात र तरकारी खाएर सुत्छन् ।

सिस्‍ने गाउँपालिका–५, स्थित रुक्मिणी माविको क्वारेन्टाइनमा बसेका ३२ जनाको दैनिकी हो यो । भारत तथा तेस्रो मुलुकबाट आएका उनीहरूलाई यहाँ राखिएको छ । गाउँपालिकाले कोरोना भाइरस (कोभिड–१९) को संक्रमण हुन सक्‍ने भन्दै उनीहरूलाई क्वारेन्टाइनमा राखेको हो ।

‘भारतबाट फर्केपछि पहिले घर पुगेर यहाँ आएको हुँ, ’क्वारेन्टाइनमा रहेका एक जनाले भने, ‘असजिलो छैन, ज्वरो आउने, खोकी लाग्‍ने केही भएको छैन, क्वारेन्टाइनमा बस्‍नुपर्छ भनेपछि यहाँ आएको हुँ ।’ उनका अनुसार अन्य ३२ जनाको स्वास्थ्य अवस्था सामान्य छ । क्वारेन्टाइनको बसाइ पट्यार लाग्दो भएको उनले बताए ।

‘खानेकुरा कुर्ने भन्दा विकल्प छैन,’ उनले भने, ‘नियमित स्वास्थ्य परीक्षण पनि भएको छैन ।’ स्वास्थ्यकर्मीले ढोका बाहिरैबाट क्वारेन्टाइन हेर्छन् । व्यक्तिगत सुरक्षा सामग्री अभावमा उनीहरू क्वारेन्टाइनमा बसेका व्यक्तिको नजिक जान सकेका छैनन् । ‘हामी त्यस्तो खास समस्या नभएर पनि होला,’ उनले भने, ‘सुरुको दिन बाहेक स्वास्थ्य जाँच भएको छैन ।’ खोकी लागेका एक जनालाई एक्लै राखिएको छ । प्रत्येक कोठामा ४ जना र एउटा खाटमा २ जना सुत्ने गरेका छन् ।

गाउँपालिकाले सबैलाई थाल र झोलिलो पदार्थ खान कटौरा दिएको छ । नाम लेखिएको प्लाष्टिकमा भात र अरु खानेकुरा क्वारेन्टाइन स्थल बाहिरको बेन्चमा आएको थाहा पाएपछि आफ्नो नामको पोका खोलेर खान्छन् । भाँडा आफै माझ्छन् । दिउँसो घाम ताप्दै गफ गरेर उनीहरूले दिन बिताइरहेका छन् ।

स्वास्थ्यकर्मीकालागि आवश्यक व्यक्तिगत सुरक्षा सामग्री (पीपीई) अभाव भएकाले समस्या भइरहेको जिल्ला अस्पतालका चिकित्सक पूर्णबहादुर पुनले बताए । केही दिनअघि एक सेट पीपीई मात्र आएको उनले बताए । संक्रमण हुनसक्‍ने आशंकाले चाहेर पनि नियमित स्वास्थ्य जाँच गर्न नसकिएको उनले बताए ।

प्रकाशित : चैत्र १७, २०७६ ०९:२५
पूरा पढ्नुहोस्
प्रतिक्रिया
पठाउनुहोस्
ADVERTISEMENT
ADVERTISEMENT
ADVERTISEMENT
×