पर्यटकले निकुञ्ज भरिभराउ- वाग्मती - कान्तिपुर समाचार
कान्तिपुर वेबसाईट
AdvertisementAdvertisement

पर्यटकले निकुञ्ज भरिभराउ

रमेशकुमार पौडेल

(चितवन) — ६ महिनायता १ लाख ३० हजार पर्यटकले चितवन राष्ट्रिय निकुञ्ज घुमेका छन् । यो पटक विदेशीकै हाराहारीमा स्वदेशी पर्यटकले निकुञ्ज घुमेका छन् । निकुञ्जका सूचना अधिकारी गोपालबहादुर घिमिरेका अनुसार यो आर्थिक वर्षको असारदेखि पुससम्म निकुञ्ज घुम्ने कूल पर्यटक १ लाख ३० हजार ३ सय ९२ पुगेको बताए ।

अघिल्लो आर्थिक वर्षमा यो अवधिमा ८८ हजार १ सय ४८ जनाले निकुञ्ज भ्रमण गरेका थिए । वन सहायक संरक्षण अधिकृतसमेत रहेका घिमिरेले भने, ‘यो वर्ष पर्यटक आवागमनको संख्या उत्साहजनक देखिएको छ ।’ अघिल्लो आर्थिक वर्षको १२ महिनामा कूल १ लाख ८७ हजार १ सय ९ पर्यटकले निकुञ्ज घुमेका थिए । भ्रमण वर्षको औपचारिक घोषणाअघि नै पर्यटक संख्या राम्रो देखिएको हुँदा आउने महिनामा पर्यटक बढ्न सक्ने घिमिरेले बताए ।


तर भ्रमण वर्षले लक्ष्य गरेअनुरुप पर्यटक आउनेमा भने पर्यटन व्यवसायीहरू ढुक्क देखिँदैनन् । निकुञ्जको तथ्यांक हेर्दा गएको ६ महिनामा घुम्न आएका पर्यटकमा नेपाली र स्वदेशी लगभग बराबर छन् । अत्याधिक पर्यटक आएको कात्तिक, मंसिर र पुस महिनामा विदेशीभन्दा स्वदेशी पर्यटकको संख्या बढी छ । बाँकी समयमा पनि नेपाली पर्यटक धेरै नआए भ्रमण वर्षले लक्ष्य गरेको पर्यटकको संख्या पुग्न गाह्रो हुन्छ ।


भ्रमण वर्षका अवसरमा ४ लाख पर्यटकले चितवन घुम्ने अपेक्षा पर्यटन व्यवसायीहरूको हो । ‘६ महिनाको तथ्यांक तुलनात्मक रूपमा राम्रो हो । तर भ्रमण वर्षको जुन लक्ष्य छ त्यसअनुरूप पर्यटक आउन यो संख्या अझ धेरै बढ्नुपर्छ । जुन तरिकाले पर्यटक आएका छन्, त्यसले भ्रमण वर्षमा घुम्ने पर्यटकको संख्या २ लाखभन्दा केही माथि मात्रै रहने अवस्था छ,’ क्षेत्रीय होटल संघ चितवन सौराहाका निवर्तमान अध्यक्ष सुमन घिमिरेले भने ।


तीन महिनामा ९७ हजार पर्यटक

निकुञ्ज कार्यालयबाट प्राप्त विवरणअनुसार कूल पर्यटकमध्ये विदेशी ५९ हजार ४ सय ६७ जना छन् । स्वदेशी पर्यटकको संख्या पनि ५९ हजार १९ रहेको छ । सार्क राष्ट्रबाट निकुञ्ज घुम्न आएका पर्यटकको संख्या ११ हजार ९ सय ६ रहेको सूचना अधिकृत घिमिरेले जानकारी दिए । निकुञ्ज घुम्न कात्तिक, मंसिर र पुस महिनामा अत्याधिक पर्यटक आएका छन् । यी ३ महिनामा ९७ हजारधन्दा बढी पर्यटकले निकुञ्ज घुमेका छन् । चितवन निकुञ्ज विसं २०३० सालमा स्थापना भएको नेपालको पहिलो राष्ट्रिय निकुञ्ज हो । यो निकुञ्ज संयुक्त राष्ट्र संघीय निकाय युनेस्कोको विश्व सम्पदा सूचीमा पनि सूचीकृत छ । निकुञ्जमा विश्वमै दुर्लभ ठूलो एकसिंगे गैंडा, पाटो बाघ, घडियाल गोहीजस्ता जन्तु, जलचर, अनेकौं पक्षी र वनस्पति पाइन्छन् । निकुञ्ज आडमा थारू, दराई, कुमालजस्ता आदिवासी जनजाति समुदायको बाक्लो बसोबास छ । निकुञ्जभित्रको जंगली जनावरहरू हेर्न र निकुञ्ज आसपास बसेका आदिवासीहरूको संस्कार संस्कृति हेर्न देश विदेशबाट पर्यटक यहाँ आउने गर्दछन् ।


अहिलेसम्म धेरै पर्यटक आउँदा अघिल्लो वर्ष कात्तिक महिनामा २६ हजार १६४ पर्यटकले निकुञ्ज घुमेका थिए । यो वर्ष कात्तिकमा ३६ हजार ७ सय ३९, मंसिरमा ३० हजार २ सय ५७ र पुसमा ३० हजार ८ सय ४४ पर्यटकले निकुञ्ज घुमेका छन् । जुन संख्या निकुञ्जको इतिहासमै नयाँ रेकर्ड हो ।


यी तीनवटै महिनामा निकुञ्ज घुम्ने पर्यटकमा स्वदेशीको संख्या धरै छन् । स्वदेशी, विदेशी र सार्कसमेत गरेर ३ महिनामा कुल ९७ हजार ८ सय ४० पर्यटकले चितवन निकुञ्ज घुम्दा स्वदेशी पर्यटकको संख्या आधाभन्दा धेरै ५३ हजार २ सय २६ रहेको छ ।


सौराहामै चाप

चैत–वैशाख पनि पर्यटक धेरै आउने महिना हुन् । सहायक संरक्षण अधिकृत घिमिरे यो वर्ष स्वदेशी पर्यटकको संख्या बढेको र आएकामध्ये धेरै पर्यटक सौराहा जाने क्रम यथावत् रहेको बताउँछन् । निकुञ्जले चितवनसहित मकवानपुर, पर्साको केही भाग र नवलपुरलाई पनि छोएको छ । निकुञ्ज छिर्ने १० वटा प्रवेशद्वार छन् । जसमध्ये सौराहा एक हो । तर निकुञ्ज घुम्नेमध्ये ८० देखि ९० प्रतिशत पर्यटक सौराहा जान्छन् ।


सौराहामा वन्यजन्तु हेर्न र घुम्न मात्रै नभएर पछिल्लो समय बिहेका लागिसमेत आउने क्रम बढेको छ । भारतीयहरू बिहेका लागि सौराहा आउने गरेको क्षेत्रीय होटल संघ चितवन सौराहाका कोषाध्यक्ष माधव दुवाडीले बताए । ‘अघिल्लो वर्ष मात्रै उनको होटलबाट १२ वटा बिहे सम्पन्न भए । यो वर्ष पनि बुकिङ छ,’ उनले भने ।


सौराहाभन्दा अन्यत्र पर्यटनको राम्रो विस्तार भईनसकेको पर्यटन व्यवसायीहरू बताउँछन् । ‘भ्रमण वर्षको माहोलमा पनि हाम्रोतिर अवस्था सामान्यझैं छ । उही हो, पहिला जे जति पर्यटक आउँथे, अहिले पनि त्यति नै छ,’ पश्चिम चितवन मेघौलीमा रहेको पर्यटकीय होटल साराङ वाइल्ड लाइफ रिसोर्टका सञ्चालक सुबोध प्रधानले भने । पर्यटकहरू जिप वा हात्ती चढेर जंगल घुम्छन् । राप्ती नदीमा परम्परागत ढुंगा चढेर रमाउने गर्दछन् ।


‘सौराहा र निकुञ्ज घुम्नेहरू बढेका छन् । सौराहामा वन, वन्यजन्तुका अलवा अन्य पर्यटकीय गतिविधिहरू थप्न पाए झनै राम्रो हुन्थ्यो,’ क्षेत्रीय होटल संघ चितवन सौराहाका कोषाध्यक्ष माधव दुवाडीले भने ।

प्रकाशित : माघ ८, २०७६ ०९:५७
प्रतिक्रिया
पठाउनुहोस्

जाम घटाउन लेन थपिँदै

कान्तिपुर संवाददाता

काठमाडौँ — कोटेश्वर–जडिबुटीको सवारी जाम घटाउन दुवैतर्फ सडक फराकिलो गर्ने भएको छ । कोटेश्वरबाट जडिबुटी चोकतर्फ जाँदा टंकप्रसाद आचार्यको सालिक छेउ ढुंगेधाराबाट पेप्सीकोला जाने मोडसम्म दुई लेन र जडिबुटीबाट कोटेश्वर आउँदा कामख्य पेट्रोल पम्पबाट ट्राफिक प्रहरी वृत्तसम्म थप तीन लेन विस्तार गर्न लागिएको हो । 

डिभिजन सडक कार्यालय काठमाडौंका प्रमुख कुवेर नेपालीका अनुसार जडिबुटी चोकको पेप्सीकोला जाने मोडमा कान्छी गुरुङको ६ आना १ पैसामा बनेको कच्ची घरलाई मुअब्जा दिएर बाटो बढाउन लागिएको छ । मन्त्रिपरिषद्को पुस २८ मा बसेको बैठकले काटेश्वर जडिबुटीको ६ आना १ पैसामा बनेको यो घर र जग्गा अधिग्रहण गर्न स्वीकृति दिने निर्णय गरिसकेको छ । ‘यो निर्णयले काम गर्न थप सहज भएको छ,’ नेपालीले भने, ‘सडक कति फराकिलो बनाउने भन्ने सर्भे भइरहेको छ ।’ कार्यालयले सोमबार काठमाडौं महानगरको ३२ नम्बर वडा अध्यक्ष नवराज पराजुलीलाई समेत विस्तार हुन लागेको सडकको फिल्डमै लगेर जानकारी गराए । ‘सडक विस्तार भएपछि दैनिक हजारौं सर्वसाधारणले सहज यात्रा गर्न सक्छन्,’वडा अध्यक्ष पराजुलीले भने, ‘जुन काम हुन लागिरहेको छ । यसमा वडाको सहयोग हुनेछ ।’

कोटेश्वरबाट आउँदा अहिले भइरहेको दुई लेनसँगै थप तीन लेन बनाउन लागिएको नेपालीले बताए । यसबाहेक छेउमा फुटपाथ पनि हुनेछ । दुवैतर्फ सडक विस्तार गर्दा नागरिक उड्यन प्राधिकरणले ७ रोपनी १३ आना १ पैसा ३ दाम जग्गा सडक बनाउन दिने सहमतिसमेत दिइसकेको छ । सडक विस्तार हुँदा सेनाको पोस्ट, महानगरले बनाएको सार्वजनिक शौचालय, रेस्टुरेन्टसमेत भत्काइनेछ । सडक विस्तार गर्दा जडिबुटी चोकमा कान्छी गुरुङको बाहेक व्यक्तिको घर र जग्गा कतै पनि क्षति नहुने हुने कार्यालयले जनाएको छ । कार्यालयले तयार गरेको प्रारम्भिक योजनाअनुसार पेप्सीकोलातर्फ जाने सवारीलाई ढुगेधाराबाट एयरपार्टको छेउ हुँदै सोझै ३२ नम्बर वडा कायर्नलय निस्कने गरी खुलेको सडकको स्तरोन्नति गर्नेछ । चोकको एउटा घर भत्काएपछि आकाशे पुल पछाडिबाटै पनि जान मिल्ने दुई लेन बनाउन लागिएको कार्यालयले जनाएको छ । पेप्सीकोला जाने सवारी छुट्टै लेनबाट गएपछि अहिले भएको दुई लेनबाट भक्तपुर जाने सवारीले मात्रै प्रयोग गर्छ पाउनेछ । यसले पनि भक्तपुर जाने सवारीको जाम जडिबुटीमा कम हुनेछ । कोटेश्वर आउँदा हुने जाम कम गर्न भने पेट्रोल पम्पबाट कोटेश्वर चोकसम्म लेन थप गर्न लागिएको नेपालीले बताए ।

काठमाडौंबाट सवारीसाधन बाहिरिने र भित्रिने नाकामा सबैभन्दा व्यस्त कोटेश्वर पर्छ । महानगरीय ट्राफिक प्रहरी महाशाखाका अनुसार भक्तपुर नाकाबाट मात्रै दैनिक सरदर २४ हजार सवारीसाधन ओहोरदोहोर गर्छन् । काठमाडौं उपत्यकामा दैनिक सरदर ३२ हजार सवारी आउजाउ हुने भक्तपुर नाका सबैभन्दा बढी व्यस्त हो । बीपी राजमार्ग हुँदै पूर्वका सवारीसाधन सञ्चालन भएपछि काटेश्वरको जाम बढेको हो । स्थानीय सरकारले मात्रै होइन, संघीय सरकारले नै कोटेश्वरको जाम हटाउन पहल गरेको हो ।

सरकारले कोटेश्वरको जाम हटाउन लेन विस्तारदेखि अकाशे पुल निर्माणसम्मको कार्ययोजना अघि सारेको छ । कोटेश्वरमा आकाशे पुल निर्माणको ठेक्का भइसकेको छ । पुस १५ को मन्त्रिपरिषद् बैठकले ‘काठमाडौं उपत्यकाको ट्राफिक व्यवस्थापनसम्बन्धी अल्पकालीन कार्ययोजना २०७६’ पारित गरेको थियो । यसमा कोटेश्वरको सवारी जाम हटाउने पाँचवटा विकल्प अघि सारेको थियो । पहिलो विकल्पमा कोटेश्वर चोकबाट बायाँतिरको खाली ठाउँमा सर्भिस लेन विस्तार गर्ने, मनोहरा खोलामा निर्माणाधीन मनोहरा पुलसम्म जानका लागि दुवैतर्फ सर्भिस लेन विस्तार गर्ने योजना पनि सरकारले अघि सारेको छ । यी सबै काम असारसम्म सक्ने कार्ययोजना सरकारले गरेको छ ।

प्रकाशित : माघ ८, २०७६ ०९:५५
पूरा पढ्नुहोस्
प्रतिक्रिया
पठाउनुहोस्
×