आत्महत्या दुरुत्साहनमा ३ वर्ष कैद
हेटौंडा — आत्महत्या दुरुत्साहनमा एक युवकलाई जिल्ला अदालत मकवानपुरले तीन वर्ष कैद सुनाएको छ । न्यायाधीश सीता शर्मा अधिकारीको बिहीबार बसेको इजलासले हेटौंडा उपमहानगरपालिका–१६ का २४ वर्षीय राजकुमार रुम्बालाई कैद फैसला गरेको हो ।
पत्नी रजनीले आत्महत्या गर्नेसम्मको परिस्थिति खडा गरेको ठहर गर्दै उनलाई आत्महत्या दुरुत्साहनमा सजाय तोकिएको हो । रजनीले ०७६ जेठ १५ गते झुन्डेर आत्महत्या गरेकी थिइन् । अभियुक्त भीमफेदी कारागारमा छन् । अदालतमा दर्ता भएका चार वटा आत्महत्या दुरुत्साहन मुद्दामा फैसला भएको यो पहिलो मुद्दा हो ।
यस्तै, बालिकालाई बलात्कार गरेको ठहर गर्दै जिल्ला अदालतले एक युवकलाई १३ वर्ष कैद फैसला गरेको छ । न्यायाधीश अधिकारीकै इजलासले हेटौंडा उपमहानगरपालिका–५ का २८ वर्षीय बालकृष्ण तिमल्सिनालाई उक्त सजाय तोकेको हो । उनले ०७६ जेठ २८ गते १४ वर्षकी बालिकालाई बलात्कार गरेका थिए । अदालतले पीडितलाई राज्यकोषबाट ३५ हजार रुपैयाँ क्षतिपूर्ति उपलब्ध गराउन पनि आदेश गरेको स्रेस्तेदार केशवराज कौशिकले बताए ।
प्रकाशित : पुस १८, २०७६ ०९:२३