आचारसंहिताविपरीत प्रचार- मधेस - कान्तिपुर समाचार

आचारसंहिताविपरीत प्रचार

प्रमुख राजनीतिक दलले नै चुनावी प्रचारप्रसारमा बालबालिका, डिजे, पर्चा र भारतीय नम्बरका सवारीसाधनको प्रयोग गरेका छन्
सुनिता बराल, ओमप्रकाश ठाकुर

महोत्तरी,सर्लाही — महोत्तरीमा उम्मेदवारहरूले प्रचारप्रसारमा निर्वाचन आचारसंहिता उल्लंघन गरेको पाइएको छ । उनीहरूले प्रचारको क्रममा बालबालिका, डिजे, पर्चा पोसाक र भारतीय नम्बरका सवारी प्रयोग गरेका हुन् ।

मटिहानीमा कार्यरत केही कर्मचारी निर्वाचन आचारसंहिताविपरीत प्रमुख पदका उम्मेदवारको लागि भोट माग्दै हिँडेका छन् । आचारसंहिता अनुसार सरकारी कर्मचारीले कुनै पनि उम्मेदवारको पक्षमा भोट माग्न पाउँदैनन् । मटिहानीका कर्मचारीले लोकतान्त्रिक समाजवादी पार्टी (लोसपा) बाट प्रमुख पदका उम्मेदवार हरिप्रसाद मण्डलको पक्षमा भोट माग्दै गरेको तस्बिर सार्वजनिक भएको हो ।

वडा ७ का सहायक कम्प्युटर अपरेटर मनोहर कापरले आफू भोट माग्न नहिँडेको दाबी गरे । आफू बाहिर उभिएर चुनावी माहोल हेरेको बेला कसैले फोटो खिचिदिएको उनको भनाइ छ । उनीसँगै निर्वाचनमा हिँडेका अन्य कर्मचारी आफू कार्यालय समयमा नभएर अन्य समयमा हिँडेको स्वीकार गर्छन् । कतिपय कर्मचारीले भने नाम नभन्ने सर्तमा डर र धम्कीका कारण प्रचारप्रसारमा हिँडेको बताए । प्रमुख जिल्ला अधिकारी वासुदेव दाहालले भोट माग्न हिँडेका कर्मचारीलाई कारबाही माग गर्दै लिखित रूपमै निवेदन परेको र यस विषयमा बुझ्ने काम भइरहेको बताए । छड्के चेक गर्दा अहिलेसम्म फेला नपारिएकाले कोही कारबाहीमा नपरेको उनको भनाइ छ ।

राजनीतिक दलहरूले बालबालिकालाई पनि निर्वाचनको प्रचारमा प्रयोग गरेका छन् । एमाले नेता गुन्ज खड्काले बच्चालाई आफ्नो पार्टीले लिएर नहिँडेको दाबी गर्दै पार्टीका पोसाक भने प्रयोग गरेको स्विकारे । अन्य पार्टीले प्रचार पोसाक बनाएर हिँडेपछि आफ्नो भोट नघटोस् भनेर पोसाक बनाउनुपरेको खड्का बताउँछन् । निर्वाचन कार्यालयले कडाइका साथ पोसाक लाउनेलाई कारबाही नगरेर पनि पोसाकको सिको बढ्दै गएको उनको भनाइ छ । गाउँबस्तीलाई रंगीचंगी बनाउने, पार्टीका झन्डा, ध्वजापता टाँग्ने कार्यलाई महोत्तरीमा निकै कम गरिसकेको प्रमुख निर्वाचन अधिकृतको कार्यालय महोत्तरीले जनाएको छ । जताततै टाँगिएका झन्डा भने आफूहरूले निकालिसकेको प्रमुख निर्वाचन अधिकृत दीपक खरेलले जानकारी दिए ।

महोत्तरीमा निर्वाचनको मुखमा भारतीय नम्बरका ७ हजार सवारी जिल्लामा भित्रिएको जिल्ला भन्सार कार्यालयका प्रमुख डिल्लीरमण सुवेदीले बताए । यी गाडी यतिबेला निर्वाचनको प्रचारप्रसारमा दलहरूले प्रयोग गरिरहेका छन् । २ दिनदेखि १ सातासम्मको भन्सार लिँदै ती गाडी ल्याइएको हो ।

मतदातालाई थरीथरी आश्वासन

चुनावको मिति नजिकिँदा उम्मेदवार र दलका नेता–कार्यकर्ता थरीथरी आश्वासन बोकेर मतदाताको घरदैलो धाइरहेका छन् । उनीहरूले कतिपय ठाउँमा पुरानै आश्वासन दिँदै आएका छन् भने कतै पूरा गर्न सक्ने सम्भावना कम भएका प्रतिबद्धता पनि जनाइरहेका छन् । महोत्तरीको जलेश्वरमा नेपाली कांग्रेसबाट प्रमुखका उम्मेदवार शम्भु पाठक र उपप्रमुखका अनिता शर्माले घोषणा पत्र सार्वजनिक गर्दै जलेश्वरलाई सुन्दर र सफा सहर बनाउने वाचासँगै कर कटौती गर्ने उल्लेख गरेका छन् । जनतालाई खुसी पार्न मात्रै नभएर वास्तविक मारमा परेका जनताको पक्षमा आफ्नो घोषणापत्र भएको कांग्रेस नेता बजरंग नेपालीले बताए । नेकपा एमालेले पनि जग्गाधनी पुर्जा दिने, स्मार्ट सिटी, सहरलाई सफा र स्वच्छ बनाउने, दलित र विपन्नलाई आवासको व्यवस्था गर्ने आफ्नो घोषणा पत्रमा राखेको छ । जलेश्वरमा प्रमुखका उम्मेदवार रामआधार कापरले घोषणापत्रमा जलेश्वरको समग्र विकास गर्ने प्रतिबद्धता जनाएका छन् ।

माओवादी केन्द्रले पनि गरिब र विपन्नलाई व्यवस्थित भूमि नीतिबाट लालपुर्जा वितरण गरिने, एक वडा एक योग ध्यान केन्द्र स्थापना गरिनेलगायत उल्लेख गरेको छ । बर्दिवास नगरपालिकाको प्रमुखका उम्मेदवार राजु खड्काले सार्वजनिक गरेको घोषणापत्रमा बर्दिवासलाई शैक्षिक सहर र सफा स्वच्छ सहर बनाउने जनाएका छन् । गरिब तथा विपन्नलाई जग्गा दिने र आवास बनाइदिने सबै पार्टीले आफ्नो घोषणापत्रमा मुख्य योजना बनाएका छन् ।

सर्लाहीका स्थानीय तहका उम्मेदवारहरू शिक्षा, स्वास्थ्य र सडक जस्ता विकासे योजना लिएर मतदाता समक्ष पुगिरहेका छन् । उम्मेदवारहरूले गरिबी हटाउने र युवालाई रोजगारी दिनेसम्मको प्रतिबद्धता जनाइरहेका छन् । उम्मेदवारहरूका यी योजना र प्रतिबद्धता नयाँ भने होइनन् । ०७४ मा पनि उम्मेदवारहरूले यही नारा लगाएर चुनावमा होमिएका थिए ।

जिल्लामा ११ नगरपालिका र ९ गाउँपालिका गरी २० स्थानीय तह छन् । मतदाताले भने चुनाव आएपछि विभिन्न आश्वासन बाँड्ने र जनताको घरदैलोमा पुग्ने नेताहरू जितेपछि एक पटक पनि फर्केर नआउने गरेको गुनासो पोखिरहेका छन् । हरिपुर नगरपालिका–९ का मुकेश माझीले गत निर्वाचनमा आनो टोल बस्तीमा मत माग्न आएका प्रमुख तथा उपप्रमुखको उम्मेदवार दोस्रो चुनावमा मात्र देखापरेको बताए । ‘गत निर्वाचन पछि हाम्रो टोलमा वडाध्यक्ष बाहेक निर्वाचित मेयर तथा उपमेयर देखै परेनन्, हाम्रो दुःखमा उनीहरूले मलम समेत लगाउन आउँदैनन्,’ उनले भने, ‘चुनाव आएपछि बल्ल उनीहरू हाम्रो गाउँ टोलमा धाउन थालेका छन् ।’

गत चुनावमा कांग्रेसले सदरमुकाम मलंगवा, हरिपुर्वा नगरपालिकासहित धनकौल, रामनगर, विष्णु र बसबरिया गाउँपालिकामा जित निकाल्न सफल भएको थिय । तत्कालीन राजपा अहिलेको लोसपाले बलरा, गोडैता, कविलासी नगरपालिकासहित चन्द्रनगर, ब्रह्मपुरी र कौडेना गाउँपालिकामा जितेको थियो । यस्तै गत निर्वाचनमा एमालेले ईश्वरपुर, लालबन्दी, हरिपुर र हरिवन नगरपालिकामा जित हासिल गरेको थियो । माओवादीले बरहथवा, वाग्मती र चक्रघट्टामा जितेको थियो ।

प्रकाशित : वैशाख २७, २०७९ ०९:११
प्रतिक्रिया
पठाउनुहोस्

दुर्गमका केन्द्रमा मौसम चुनौती

घनश्याम खड्का

म्याग्दी — आसन्न स्थानीय तह निर्वाचन गराउन खटिएका कर्मचारी मतदानस्थलतर्फ जाने तर्खरमा छन् । सबैभन्दा दुर्गम धवलागिरि गाउँपालिका–१ गुर्जा र ४ खिवाङस्थित मतदान स्थलमा खटिएका कर्मचारी भने कार्यस्थलतर्फ हिँडेका छन् ।

मतदानस्थलमा खटिएका अधिकृत, सहायक अधिकृत, कर्मचारी, प्रहरीसमेत सुरक्षाकर्मीको टोलीले मुख्य निर्वाचन कार्यालयबाट आवश्यक निर्वाचन सामग्री बुझ्न थालेका छन् । अधिकांश मंगलबार हिँड्ने छन् । बेनी नगरपालिकाभित्रका मतदान अधिकृतसमेतका टोली भने बुधबार बिहानै हिँड्ने भएका छन् ।

मौसम तथा जलवायु विभागले वैशाख २९–३० सम्म वर्षाको जोखिम देखाएकोले यसपल्ट मतदान स्थलमा बुथ निर्माण, मतदाताको लाइन व्यवस्थापन र टाढाका मतदातालाई मतदान स्थलमा पुग्न समस्या हुने आकलन गरिएको छ । अन्नपूर्ण गाउँपालिका–३ दाना स्थित ज्ञानप्रकाश माध्यमिक विद्यालय मतदान केन्द्रका अधिकृत दलबहादुर थापाले मतदान स्थलमा लैजाने सबै निर्वाचन सामग्री बुझेको बताए । ‘मतपत्र भने मंगलबार विहानै बुझेर कार्यस्थल हिँड्ने तयारीमा छौं,’ उनले भने, ‘योपल्ट मौसमका कारण मतदान स्थलको व्यवस्थापनमा चुनौती देखेका छौं । बाँकी शान्तिपूर्ण हुने विश्वास छ ।’

निश्चित दूरी र संवेदनशीलताका आधारमा निर्वाचन केन्द्रमा म्यादी प्रहरी, नेपाल प्रहरी, सशस्त्र प्रहरी र सेना तथा सादा पोसाकका सुरक्षाकर्मी परिचालन गरेको सुरक्षा समितिले जनाएको छ । प्रमुख जिल्ला अधिकारी चिरञ्जीवी रानाले मौसम प्रतिकूलता हुने पूर्वानुमानले गर्दा सबै कर्मचारीलाई २७ गतेभित्र मतदान स्थल पुग्न भनिएको बताए । आसन्न स्थानीय तह निर्वाचनमा म्याग्दीमा एक जना तेस्रोलिङ्गीसहित ८५ हजार ३ सय ७५ मतदाताले भोट हाल्दै छन् । निर्वाचन कार्यालयका अनुसार म्याग्दीमा ७४ मतदान स्थलमा १ सय १४ मतदान केन्द्र तोकिएका छन् ।

मुस्ताङका मतदान अधिकृत हिँडे

मुस्ताङमा पनि निर्वाचन तयारी पूरा भएको मुख्य निर्वाचन अधिकृतको कार्यालयले जनाएको छ । निर्वाचनमा खटिने कर्मचारी, सुरक्षाकर्मी निर्वाचन सामग्रीसहित कार्यक्षेत्र हिँडेका छन् । सम्जोङ, घिलिङ, यारा, साङ्तालगायत अति दुर्गम मतदान स्थलका कर्मचारी आइतबार नै हिँडेका हुन् । ‘मतदान अधिकृतसमेत कर्मचारी, सुरक्षाकर्मीको टोलीले आवश्यक मतपत्र, स्वस्तिक, बुथ बनाउने सामग्री र अनुसूचीसहित सामग्री बुझेर केही हिजो केही आज हिँडे,’ मुस्ताङका मुख्य निर्वाचन अधिकृत रुमाकान्त ज्ञवालीले भने, ‘मुस्ताङका ४० प्रतिशत मतदाता सहरमा भएकोले ल्याउने चुनौती छ ।

दललाई २८ वैशाख भित्र ल्याउन भनेका छौं ।’ जिल्ला निर्वाचन कार्यालयका अनुसार मुस्ताङमा १४ सय ८५ जना मतदाताले ३८ वटा केन्द्रमा पुगेर मतदान गर्दैछन् । सबैभन्दा कम मतदाता वारागुङ मुक्तिक्षेत्र गाउँपालिकाअन्तर्गत समर आधारभूत विद्यालय केन्द्रमा ३४ जना छन् । बढी थासाङको जनआदर्श मावि कोवाङ केन्द्रमा ६ सय ३४ मतदाता रहेका छन् । मुस्ताङका सबैभन्दा दुर्गमका लोमान्थाङ गाउँपालिकाको सम्जोङ मतदान केन्द्रमा ६१ जना र वारागुङ मुक्तिक्षेत्र गाउँपालिका–५ साङ्ताको हिमाली आधारभूत मतदान केन्द्रमा ३५ जना मात्र मतदाता छन् ।

प्रकाशित : वैशाख २७, २०७९ ०९:०७
पूरा पढ्नुहोस्
प्रतिक्रिया
पठाउनुहोस्
×