बीपी प्रतिष्ठानमा थप एक कोरोना संक्रमितको मृत्यु- प्रदेश १ - कान्तिपुर समाचार
कान्तिपुर वेबसाईट
AdvertisementAdvertisement

बीपी प्रतिष्ठानमा थप एक कोरोना संक्रमितको मृत्यु

प्रदीप मेन्याङ्बो

सुनसरी — धरानस्थित बीपी कोइराला स्वास्थ्य विज्ञान प्रतिष्ठानको कोभिड अस्पतालमा उपचाररत थप एक कोरोना संक्रमितको मृत्यु भएको छ । मोरङको बेलबारी नगरपालिकाका ७६ वर्षीय पुरुषको बिहीबार बेलुकी मृत्यु भएको हो ।

प्रतिष्ठानको सूचना केन्द्रका अनुसार मधुमेह र उच्च रक्तचापको समस्या रहेका ती व्यक्ति मंसिर २ गते अस्पताल भर्ना भएका थिए । पीसीआर जाँच गर्दा मंसिर ३ गते कोरोना पुष्टि भएका उनको बिहीबार बेलुकी साढे ९ बजे मृत्यु भएको हो ।

यसै गरी दुई दिनअघि कोभिड अस्पतालमा राजविराज–४ सप्तरीका ५० वर्षीय पुरुषको पनि मृत्यु भएको प्रतिष्ठानको सूचना केन्द्रले जनाएको छ । कलेजोको दीर्घरोगी रहेका उनलाई मंसिर १ गते कोरोना पुष्टि भएपछि सोही दिन कोभिड अस्पताल भर्ना गरिएको थियो । यससँगै बीपी प्रतिष्ठानको कोभिड अस्पतालमा उपचारका क्रममा मृत्यु भएका संक्रमितको संख्या १ सय १३ पुगेको छ ।

प्रकाशित : मंसिर १२, २०७७ १२:५१
प्रतिक्रिया
पठाउनुहोस्

म कोरोना खोप लगाउँदिनँ : ब्राजिली राष्ट्रपति बोल्सोनारो

रोयटर्स

ब्रासिलिया — ब्राजिलका राष्ट्रपति जायर बोल्सोनारोले कोरोना खोप नलगाउने बताएका छन् । बिहीबार साँझ दिएको वक्तव्यमा उनले कोरोना भाइरसविरुद्धको खोप नलगाउने बताएका हुन् । उनले पटक पटक कोरोनाविरुद्धको खोपको प्रभावकारिताबारे प्रश्न उठाउँदै आएका छन् ।

उनले ब्राजिली नागरिकहरुले कोरोना खोप लगाउन नपर्ने पनि बताएका छन् । कोरोना भाइरसको संक्रमणबाट अमेरिकापछि सबैभन्दा बढी मृत्यु हुने देश हो ब्राजिल । ब्राजिलमा अहिलेसम्म ६२ लाखभन्दा बढीमा कोरोना पुष्टि भइसकेको छ भने १ लाख ७१ हजारभन्दा बढीको मृत्यु भइसकेको छ ।

ब्राजिली राष्ट्रपतिले लामो समयसम्म कोरोना भाइरसलाई गम्भीरतापूर्वक लिँदै लिएनन्, पछिल्लो समय पनि लिएको देखिँदैन । उनले बिहीबारको वक्तव्यमा भनेका छन्, ‘म तपाईंहरुलाई भन्न चाहन्छु, म कोरोना खोप लगाउँदिनँ । यो मेरो अधिकारको कुरा हो ।’

यसअघि बोल्सोनारोले मास्कको प्रभावकारिताबारे पनि शंका व्यक्त गरेका थिए । उनले आफूले मास्क नलगाउने बताएका थिए ।

पटक–पटक कोरोना भाइरसबाट डराउनु नपर्ने बताउँदै आएका उनलाई गत जुलाईमा कोरोना संक्रमण पुष्टि भएको थियो ।

बोल्सोनाराले कोरोनाविरुद्धको खोप सहज रुपमा उपलब्ध भए पनि ब्राजिली नागरिकले लगाउन नपर्ने बताएका छन् । अक्टोबरमा उनले मजाक गर्दै भनेका थिए, ‘खोप त कुकुरलाई मात्र लगाउनुपर्छ ।’

प्रकाशित : मंसिर १२, २०७७ १२:३१
पूरा पढ्नुहोस्
प्रतिक्रिया
पठाउनुहोस्
x
×