लागूऔषध काराेबारी पक्राउ- प्रदेश १ - कान्तिपुर समाचार

लागूऔषध काराेबारी पक्राउ

प्रदीप मेन्याङ्बो

सुनसरी — लागूपदार्थ ओसारपोसार र बिक्री वितरणमा सक्रिय एक युवा धरान–१७ स्थित धरान चतरा सडकखण्डको सर्दुको नयाँ पुलबाट लागूऔषधसहित पक्राउ परेका छन् । पक्राउ पर्नेमा कोसी गाउँपालिकाका–६ श्रीपुर जबदीका १९ वर्षीय देवराम यादव रहेका छन् ।

धरानस्थित इलाका प्रहरी कार्यालयका प्रहरी नायब उपरीक्षक ज्ञानेन्द्र बस्नेतका अनुसार सर्दु खोलाको नयाँ पुल चेक प्वाइन्टमा ड्युटीमा खटिएका प्रहरी जवान कृष्णकुमार तामाङलाई मोटरसाइलले ठक्कर दिएर भाग्न खोज्दा मोटरसाइकल अनियन्त्रित भएर लडेपछि पक्राउ गरिएको थियो । थप खानतलासी गर्दा मोटरसाइकलको लेग गार्डमा झुण्डाएको प्लास्टिकको झोलामा लागूऔषधसहित यादव पक्राउ परेका हुन् ।

शुक्रबार बेलुका करिब ८ बजे पक्राउ परेका यादवको साथबाट १९ बोतल डाइलेक्स डिसि, स्पास्मो प्रोक्सिभन प्लस १ हजार ४ सय ४० क्याप्सुल र नगद १ हजार ३ सय रुपैयाँ बरामद गरिएको प्रहरीले जनाएको छ । साथै उनीबाट लु ६० प २३४२ नम्बरको मोटरसाइकल पनि बरामद गरिएको छ ।

प्रहरी नायब उपरीक्षक बस्नेतले भने, ‘यादव लागूऔषध कारोबारमा पटकपटक पक्राउ परी जेल सजायसमेत भोगेका युवा हुन् । भर्खरै मात्र जेलबाट छुटेपछि पनि फेरि लागूऔषधकै कारोबारमा सक्रिय भएको प्रारम्भिक अनुसन्धानबाट खुलेको छ । उनी पेसेवर कारोबरी भएको देखिन्छ ।’ भारतीय सिमावर्ती बजारबाट खरिद गरेर ल्याएको ती लागूऔषधलाई बढी व्यस्त र प्रहरीको स्थायी चेकपोस्टहरु भएका कोसी हाइवेबाट आउँदा धरान प्रवेश गर्ने तीनकुने चेकपोस्टमा पक्राउ पर्ने सम्भावना बढी भएकाले प्राय प्रहरील जाँच नगर्ने सुनसरीको भित्री गाउँको बाटो भएर आएको बेला यादव पक्राउ परेका हुन् ।

प्रकाशित : कार्तिक ८, २०७७ १२:२८
प्रतिक्रिया
पठाउनुहोस्

म्याग्दीमा होटल व्यवसाय बन्द हुँदा एक हजारभन्दा बढीले रोजगारी गुमाए

घनश्याम खड्का

म्याग्दी — लामो समयको लकडाउनले व्यवसाय बन्द भएर घरभाडा तिर्न नसकेपछि व्यवसायी पेसाबाट पलायन हुन थालेका छन् । जिल्लामा साना–ठूला होटल तथा रेस्टुरेन्टमा कार्यरत एक हजारभन्दा बढी मजदुरले रोजगारी गुमाएको होटल व्यवसायी संघले जनाएको छ । 


संघका अनुसार म्याग्दीका ३ सय ५० भन्दा बढी रेस्टुरेन्ट, होटल तथा लजमा १ अर्बभन्दा बढी लगानीे छ । अहिले खुलेका सबै होटल, रेस्टुरेन्ट स्वरोजगारमूलक शैलीमा चलेका छन् ।

‘लामो समयदेखिको लकडाउनका कारण होटल तथा रेस्टुरेन्ट बन्द हुँदा घरभाडा तिर्न नसकेर बेनीका मात्र १५ भन्दा बढी व्यवसायी पलायन भए । आफ्नै घरमा होटल चलाएका बाहेक अरुलाई व्यवसायमा टिक्न समस्या भएको छ,’ संघ अध्यक्ष बाबुराम आचार्यले भने, ‘व्यवसाय नै बन्द गरी व्यवसायी पलायन भएपछि कार्यरत मजदुरले रोजगारी गुमाएका छन् ।’

लकडाउन खुकुलो भइसक्दा पनि कोरोना संक्रमण समुदायमै फैलिएपछि बजारमा मानिसको चहलपहल छैन । होटल–रेस्टुरेन्टमा खाजा, खाना खान पहिलेजस्तो ग्राहक आउँदैनन् । बाह्य पर्यटकमा निर्भर रहेका घोडेपानी, महरे, चित्रे, तातोपानीलगायत स्थानका होटल तथा लज अझै खुलेका छैनन् । घोडेपानी/पुनहिल क्षेत्रमा तिहारअघि पर्यटकलाई प्रवेशमा रोक लगाइएको छ ।

महँगो भाडा तिरिरहेका होटल व्यवसायी घरबेटीले कम्तीमा एक महिनाको घरभाडा छुट दिँदा पनि थेग्न नसकेपछि व्यवसायबाटै पलायन भइरहेको होटल व्यवसायी संघले जनाएको छ । केही व्यवसायी होटलका सामान नै घरबेटीलाई बुझाएर हिँडेका छन् ।

संघका अनुसार कम्तीमा १२ होटल व्यवसायी घरभाडा बुझाउने विकल्प नभएको भन्दै पेसाबाट पलायन भएका छन् ।

संघले गत सोमबार होटल तथा रेस्टुरेन्टलाई धितो मानेर बैंक/वित्तीय संस्थाबाट कर्जा व्यवस्था, पानी, बिजुली, इन्टरनेटमा लकडाउन अवधिको छुट, घरधनीको कर्जाको ब्याजमा छुट र बैंकको ब्याज तथा साँवा गाभेर कम्तीमा २ वर्ष भाका बढाउने व्यवस्था मिलाइदिन’ जिल्ला प्रशासन कार्यालयलाई ज्ञापनपत्र बुझाएको छ ।

प्रकाशित : कार्तिक ८, २०७७ १२:०८
पूरा पढ्नुहोस्
प्रतिक्रिया
पठाउनुहोस्
×