विराटनगर फूलैफूलको बजार [तस्बिरहरु]

शब्द/तस्बिर : जितेन्द्र साह

विराटनगर — तिहारमा सजावट, पूजा र भाइटीकामा मालाका लागि फूल नभइ हुन्न । यो बेला फूल किनबेच अधिक हुने गर्छ । मुलुकका अन्य भागजस्तै लक्ष्मीपूजाको पूर्वसन्ध्यादेखि ने विराटनगर महानगरपालिकाको मुख्य सडक र चोकमा फूलको बजार लाग्छ । पूजाको मुख्य दिन बिहानदेखि महानगर फूलैफूलको बजारमा परिणत हुन्छ ।

तिहारको संस्कृति एवं सौन्दर्यसँग जोडिएको सयपत्री, मखमली र कमल फूललगायत किन्न भीड लाग्छ । स्थानीय उत्पादनले मात्र माग धान्न नसक्ने हुनाले भारतको पश्चिम बंगाल र विहारसम्मका फूल आइपुग्छ । सजावटका लागि सस्तो भारतीय फूल किने पनि पूजाका लागि भने स्थानीयले महँगो नेपाली सयपत्री फूलको झुप्पा नै रोज्छन् ।


प्रकाशित : कार्तिक १८, २०७८ १७:०७
प्रतिक्रिया
पठाउनुहोस्

बाढी पसेको बस्तीमा तिहारको तयारी [तस्बिरहरू]

शब्द/तस्बिर : जितेन्द्र साह

(धनपालथान, मोरङ) — स्थानीय लोहन्द्रा खोलाको बाढीले दक्षिणपूर्वी मोरङको धनपालथान गाउँपालिकामा खेतबारी डुबायो  । घरआँगन भत्कायो । लोहन्द्रा खोलाको बाढीले मंगलबार धनपालथान गाउँपालिकाको वडा नम्बर ६ र ७ मा सबैभन्दा बढी असर गरेको थियो । विराटनगर–रंगेली जोड्ने मुख्य हुलाकी मार्गको मध्यमा रहेको यी दुई वडा बीचको सडक भएर खोला बगिरहेको थियो ।

अहिले मौसम खुलेपछि जनजीवन सामान्य हुँदैछ । सबै पीडा बिर्सेर उनीहरु तिहारको तयारीमा जुटेका छन् । खोलाले बगाएर खेत छेउमा थुपारेको माटो बोकेर लगि घर टाल्दैछन् । लिपपोत गर्दैछन् । जस्तो सुकै संकट र दुख आए पनि सामना गर्दै अघि बढ्नै पर्ने स्थानीय बताउँछन् ।

मौसम खुलेर पानी घटे पछि सनपाट धुनेलगायतका कृषि कर्ममा स्थानीय फर्केका छन् । घाम लाग्न थालेको हुनाले एक दिनमा सनपाट सुकेर बेच्न लायकको हुन्छ ।

नगदेबाली सनपाट बेचेर आएको रकमले यसपाली तिहार एवं छठ पर्व मनाउने कृषकहरु बताउँछन् । सनपाट धोएपछि निस्केको सन्ठीको बोझा स्थानीयले घर लगिरहेका छन् । चुल्हो बाल्न, घेराबार गर्न र लक्ष्मी पूजाको राति खेतबारीमा पूजा विधिमा पनि सन्ठीको प्रयोग हुन्छ ।


प्रकाशित : कार्तिक ७, २०७८ १५:३९
पूरा पढ्नुहोस्
प्रतिक्रिया
पठाउनुहोस्
×