अहिले लुक्लामा एकै पटक ५/६ वटासम्म हेलिकप्टर ल्यान्ड गर्ने गरेका छन् । पर्यटक पनि गन्तव्यमा पुग्नका लागि लाम लागेर प्रतीक्षा गरिरहेका देखिन्छन् । 

विशेषतः पर्यटकलाई सगरमाथा बेस क्याम्प, नाम्चेबजार, खुम्जुङ, लुबुचे र दिङबुचेलगायत ठाउँमा ल्याउने लैजानका लागि हेलिकप्टरलाई दिनभरि भ्याइनभ्याइ हुने एयर डाइनेस्टीका लुक्ला स्टेसन म्यानेजर राम लामाले बताए । कतिपयले माउन्टेन फ्लाइट गर्ने गरेका छन् । मंगलबार मौसम सफा भएपछि बिहान ७ बजेदेखि १० बजेसम्म २० भन्दा बढी फ्लाइट भएको उनले बताए । 

अहिले सगरमाथा आरोहण गरेर फर्किने आरोहीले गर्दा पनि फ्लाइट ह्वात्तै बढेको छ । कतिपय हेलिकप्टर पर्यटकलाई काठमाडौंसम्म ल्याउने-लैजाने गरेका छन् । मौसम सफा भए दिनभरमा ८० वटासम्म उडान हुने गरेको उनले बताए । मार्च, अप्रिल र मे महिना यहाँको पर्यटकीय मौसम हो । लुक्लाको हेलिप्याड हेलिकप्टरले भरिभराउ बनेको छ ।