काठमाडौं महानगर : जता हेर्‍यो, त्यतै बेहाल

जता हेर्‍यो उतै फोहरको डङ्गुर । दुर्घन्दित भएको छ महानगर । यो मात्र हैन यस्ता थुप्रै कारणहरु छन जसले महानगरलाई कुरुप बनाएको छ। बल्लतल्ल मेलम्ची खानेपानी आयोजनाले खानेको पाइपलाइन पुरेर कालोपत्रे के सकिएको थियो फेरि सुरु भएको छ विद्युत्‌को तार भूमिगत गर्ने काम ।

सडक खन्ने, खोतल्ने आफ्नो काम सकेपछि त्यसलाई बेवास्ता गर्ने पुरानै चलन हो । अझ पानी परेपछि सुरु हुन्छ महानगरवासीको सास्ती । पानी परे हिलो, घाम लागे धुलो । अनि खाल्डाखुल्डी त छँदैछन् ।

बिजुलीको खम्बामा देखिन्छ महानगरको अर्को कुरुपता । पोलपोलमा गुज्मुजिएका छन् तार । अव्यवस्थित तारले आगलागीका दुर्घटना भएका छन् । जनधनको क्षति भएको छ ।

अहिले महानगरले फुटपाथलाई केही व्यवस्थित गर्न खोजेको देखिन्छ । त्यसमा पनि समन्वयको कमी देखिन्छ । फुटपाथको बीचबीचमा बिजुलीका खम्बा गाडिएका छन् । फुटपाथ मिचिएका छन् । फुटपाथ कहाँ गएर अलप हुन्छन् थाहै हुन्न ।

त्यतिमात्रै हो र फुटपाथ, सडकछेउ, कतै खाली ठाउँ जहाँ पायो त्यही अव्यवस्थित पार्किङ बनाइन्छ । बेलुकी भएपछि सडक व्यापारीले कब्जा जमाउन भ्याउँछन् ।