टुँडिखेलमा फूलपाती बढाइँ [तस्बिरहरू]

तस्बिर : इलिट जोशी, तस्बिर : सन्जोग मानन्धर

काठमाडौँ — नवरात्रिको सातौँ दिन सैनिक मञ्च टुँडिखेलमा शुक्रबार फूलपाती बढाइँ कार्यक्रम सम्पन्न भएकाे छ । तर अघिल्ला वर्षहरूमाझैं तामझामसहित नभएर सामान्य रूपमा फूलपातीकाे बढाइँ गरिएकाे छ । फूलपाती बढाइँ समारोहमा नेपाली सेनाको सलामी ग्रहण गर्न राष्ट्रपति विद्यादेवी भण्डारी, उपराष्ट्रपति नन्दबहादुर पुुन, प्रधानमन्त्री केपी शर्मा ओलीलगायत उपस्थित भएका थिए । कोभिड–१९ को सङ्क्रमणबाट सिर्जित परिस्थितिका कारण हर्षोल्लासका साथ नभई धर्म, संस्कृति र परम्परालाई जीवन्तता दिन प्रतीकात्मक रूपमा मात्र बढाइँ गरिएकाे हाे ।

बढाइँ कार्यक्रममा नेपाली सेनाले राइफल र तोपका साथ मार्चपास गरेको थियो । अघिल्ला वर्षका बढाइँमा पूर्व,पश्चिम र दक्षिणपाटाबाट ८४/८४ जनाको गुल्मले बढाइँ गर्थ्याे भने यस पटक सामाजिक दूरी कायम गरी २५/२५ जनामा सीमिति गरिएको छ । विगतमा सेनाबाहेक १ हजार २ सयको सङ्ख्यामा विभिन्न क्षेत्रका मानिसलाई आमन्त्रण गर्ने गरिएकामा यस पटक सेनासहित पाहुनाको सङ्ख्या सय जनामा सीमित गरिएकाे थियाे ।

आश्विन शुक्ल सप्तमीका दिन आज अपराह्न घरघरमा स्थापना गरिएको नवदुर्गा एवं दसैंघरमा फूलपाती भित्र्याइँदैछ । प्रत्येक वर्ष दुर्गा पक्षअन्तर्गत आश्विन शुक्ल सप्तमीका दिनमा मनाइने फूलपाती पर्व आज शास्त्रीय विधिअनुसार शुभ साइतको प्रतीक फूलपाती भित्र्याएर मनाइँदैछ ।


प्रकाशित : कार्तिक ७, २०७७ १७:१३
प्रतिक्रिया
पठाउनुहोस्

चितवन मेडिकल कलेजमा दुई कोरोना संक्रमितको मृत्यु

रमेशकुमार पौडेल

चितवन — कोरोना भाइरसको संक्रमण पुष्टि भएर चितवन मेडिकल कलेजको भरतपुरमा रहेको शिक्षण अस्पतालमा उपचार गराइ रहेका दुई जनाको शुक्रबार बिहान मृत्यु भएको छ ।

अस्पतालका निर्देशक प्रा.डा.दयाराम लम्सालले जारी गरेको प्रेस विज्ञप्तीमा उल्लेख भए अनुसार मृत्यु हुनेमा भरतपुर महानगरपालिका–७ का ७० वर्षीय पुरुष र राप्ती नगरपालिका–५ की ८४ वर्षीया महिला रहेका छन् ।

भरतपुरका ७० वर्षीय पुरुष मृगौला रोग र श्वासप्रश्वासको समस्या भएका कारण कात्तिक २ गते अस्पताल भर्ना भएका थिए । उनमा सोही दिन कोरोना संक्रमण पुष्टि भएको थियो । उच्च रक्तचापको पनि समस्या देखिएका उनको आज शुक्रबार बिहान ८ बजेर ४४ मिनेट जाँदा मृत्यु भएको अस्पतालले जनाएको छ । राप्ती–५ की महिला उच्च ज्वरो र स्वासप्रस्वासको समस्याका कारण कात्तिक ५ गते अस्पताल आएकी थिइन् ।

उनमा कोरोना संक्रमण भएको कात्तिक ६ गते बिहीबार पुष्टि भएको थियो । शुक्रबार बिहान सबेरै ४ बजेर १९ मिनेट जाँदा उनको मृत्यु भएको अस्पतालले जानकारी गराएको छ । उनमा रक्तचापका साथै बाथ र निमोनियाको पनि समस्या थियो । योसँगै कोरोना भाइरसको संक्रमण पुष्टि भएकामध्ये चितवनका ४९ जनाको मृत्यु भएको छ । चितवन स्वास्थ्य कार्यालयले दिएको विवरण अनुसार शुक्रबार दिउँसोसम्म कुल संक्रमितको संख्या ३ हजार ६९० पुगेको छ । निको हुन बाँकी संक्रमित १ हजार ५ सय ४६ छन् ।

प्रकाशित : कार्तिक ७, २०७७ १७:०१
पूरा पढ्नुहोस्
प्रतिक्रिया
पठाउनुहोस्
×