६ वर्षपछि मनाङमा हवाइजहाज

मन्त्री लम्सालले नियमित उडानकालागि शुक्रबार परीक्षण गरिएको बताए । अन्तराष्ट्रिय पर्यटन दिवसको दिन असोज १० बाट नियमित उडानको तयारी गरिएको उनले जानकारी दिए । हवाई उडानसँगै पर्यटनसँगको सहकार्यमा मनै छुने मनाङ प्याकेज पनि बनाउन लागिएको उनको भनाइ थियो ।

२०७० देखि बन्द विमानस्थल सञ्चालनमा सफल भएको छ । ‘यसको निरन्तरताको लागि प्रदेश सरकार योजना बनाएको छ,’ उनले भने, ‘एक वर्षअघिको योजना आज सफल भएको छ । विमानस्थल सञ्चालनसँगै आवश्यक अन्य पूर्वाधार पनि बनाउने सरकारको योजना छ ।’ उनले गण्डकी प्रदेशको राजधानी पोखराबाट सातै प्रदेशमा सिधा हवाइ सम्पर्क गर्ने योजना रहेको सुनाए ।

नागरिक उड्डयन प्राधिकरणले आर्थिक वर्ष ०६९/७० मा ९ करोड रुपैयाँ खर्च गरेर यसअघिको ६ सय मिटरको धुले धावनमार्गलाई विस्तार गरी ९ सय मिटर ल्यापटप (कालोपत्रे) गरेको थियो । त्यतिबेला तत्कालीन मन्त्री तथा प्राधिकरणका अधिकारीहरु चढेर मंसिरमा धावनमार्गमा हवाइजहाज परीक्षण गरिएको थियो । त्यसयता कुनै पनि जहाज मनाङ आएको छैन । कालोपत्रे भएको २ बर्षपछि तारा एयरको डोर्नियर जहाजले परीक्षण उडान गरेपनि निरन्तरता दिन सकेन । १ वर्षअघि एउटा ट्वीनअटर जहाजले चार्डर उडान भरेको थियो । पछिल्लो समय असार २० गते र त्यसअघि पुस २४ गते जहाज उडाउने तयारी गरिएको थियो । तर, सफल हुन सकेको थिएन ।

धावनमार्ग विस्तार र कालोपत्रे हुनुअघि साताको २ पटक उडान हुन्थ्यो । त्यतिनै समय मनाङसम्म सडकको ट्रयाक खुलेपछि हवाईजहाजले उडान नगरेको स्थानीयको भनाइ छ । मनाङमा नेपाल वायु सेवा निगमको ट्वीनअटर जहाजले मात्रै उडान भर्दै आएको थियो । नागरिक उड्डयन प्राधिकरणका प्रवन्धक एटीसी (एयर ट्राफिक कन्ट्रोलर) सूर्यबहादुर खत्रीका अनुसार हिमपात र पानी परेको समय मनाङको आकासमा उडान भर्न सकिँदैन । ‘अहिले पनि मौसम सफा नहुँदा उडान भर्न गाह्रो छ । निकै सतर्कमा रहेर उडान गर्नुपर्ने हुन्छ’ उनले भने ।

पोखरा-मनाङ वा मनाङ-पोखरा हुँदा करीब २५ मिनेट लाग्छ । ३ हजार ३ सय ३० मीटर (११ हजार १ सय ४५ फिट) उचाइको हुम्डे विमानस्थलमा २०३९ साल असोजबाट उडान सुरु गरिएको थियो ।मुख्यमन्त्री पृथ्वी सुब्बा गुरुङले मनाङको पर्यटन प्रवर्द्धनका लागि प्रदेश सरकारले प्राथमिकतामा राखेको बताए । आन्तरिक पर्यटक, कर्मचारी र जनप्रतिनिधिमात्रै आए पनि जहाज उडान नियमित हुने उनको भनाइ थियो । ‘बाहिरका पर्यटकसँगमात्र भर पर्नु भएन,’ उनले भने, ‘जिल्लाका सबै स्थानीय तह सहकार्य गर्नुस् । सरकार सहयोग गर्न तयार छ ।’ उडान नियमित गराउन सुरुका दिनमा प्रदेश सरकारले अनुदानसमेत दिन तयार रहेको उनले बताए ।