बुद्धको अस्थिधातु समाधिस्थल लिजमा दिने निर्णयमाथि लेखा समितिद्वारा छानबिन सुरू
![](https://assets-cdn.ekantipur.com/uploads/source/ads/900-100-0252024112350.gif)
![](https://assets-cdn.ekantipur.com/uploads/source/ads/mastercreativegif900x100-0952024115624.gif)
काठमाडौँ — बुद्धको अस्थिधातु समाधिस्थल पश्चिम नवलपरासीको रामग्राम क्षेत्र लिजमा दिने सम्झौतामा संसद्को सार्वजनिक लेखा समितिले छानबिन थालेको छ । रामग्रामको जमिन ९९ वर्षका लागि निजी कम्पनीलाई दिने गरी लुम्बिनी विकास कोषले अघि बढाएको सम्झौतामा लेखा समितिले मंगलबारदेखि छानबिन थालेको हो ।
![](https://assets-cdn.ekantipur.com/uploads/source/ads/reward-900x100-pxl-2462024072414.gif)
![बुद्धको अस्थिधातु समाधिस्थल लिजमा दिने निर्णयमाथि लेखा समितिद्वारा छानबिन सुरू](https://assets-cdn-api.ekantipur.com/thumb.php?src=https://assets-cdn.ekantipur.com/uploads/source/news/kantipur/2024/miscellaneous/public-account-comittee-3012024072110-1000x0.jpg&w=1001&h=0)
![](https://assets-cdn.ekantipur.com/uploads/source/ads/sathi-deposit-900-100-1262024124333.gif)
रामग्राम क्षेत्रमा अस्थिधातु उत्खनन, स्तूप एवं बौद्ध विहारलगायत संरचना निर्माणसहित बृहत्तर विकास गर्ने नाममा बिनाप्रतिस्पर्धा कोषले निकेश अधिकारी अध्यक्ष रहेको ‘द प्रमिस्ड ल्यान्ड’ सँग सम्झौता गरेको हो । कम्पनीलाई १ सय २० बिघाभन्दा बढी जमिन दिने सम्झौता गरिएको छ । विवादास्पद पृष्ठभूमिका ल्हारक्याल लामालाई प्रधानमन्त्री पुष्पकमल दाहालले गत साउनमा कोषको उपाध्यक्षमा नियुक्त गरेका थिए । नियुक्तिपछि लामाले प्रधानमन्त्री दाहालका घरबेटीसमेत रहेका विवादास्पद निर्माण व्यवसायी शारदाप्रसाद अधिकारीका छोरा निकेश अध्यक्ष रहेको प्रमिस्डलाई जग्गा दिने प्रस्ताव रफ्तारमा अघि बढाएका थिए ।
बुद्धको अस्थिधातु समाधिस्थल बिनाप्रतिस्पर्धा ९९ वर्षलाई लिजमा
सर्वसाधारणको करिब १ सय १६ बिघा अधिग्रहण गरेर ल्याउनेसहित पुरातत्त्व विभागको १० कठ्ठा र कोषको ७५ कठ्ठालाई एकीकृत गरेर सम्पदा क्षेत्र प्रमिस्डलाई दिने कोषको निर्णयमा अर्थ मन्त्रालय, पर्यटन मन्त्रालय र पुरातत्त्व विभागको लिखित असहमति थियो । तर, मन्त्रालय र विभागको असहमतिलाई उपेक्षा गरेर कोष र प्रमिस्ड ल्यान्डले गुपचुप गरेको सहमतिअनुसार काम हुने गरी गत मंसिर २६ मा प्रधानमन्त्री दाहालमार्फत नै बृहत् रामग्राम परियोजना उद्घाटन गराइएको थियो ।
संघीय सरकार र नियमनकारी निकायको स्वीकृतिबेगर पुरातात्त्विक सम्पदा उत्खनन एवं संरचना निर्माण गर्न प्रतिस्पर्धाबिनै निजी कम्पनीलाई गुपचुप सुम्पिएको विषय कान्तिपुरले सोमबार खुलासा गरेको थियो । त्यसपछि सार्वजनिक लेखा समितिले पर्यटन मन्त्रालय र कोषलाई पत्र लेखी रामग्राम क्षेत्रको ऐतिहासिक स्थल लिजमा दिनेसम्बन्धी भएका सबै कागजात ७ दिनभित्र उपलब्ध गराउन मंगलबार निर्देशन दिएको हो ।
समितिले लिजमा सम्पदा क्षेत्र निजी कम्पनीलाई सुम्पिएकामा मुख्य ५ प्रश्न उठाएको छ । सरकारले राष्ट्रिय महत्त्वको पुरातात्त्विक तथा धार्मिक क्षेत्रका रूपमा रहेको संवेदनशील ऐतिहासिक सम्पदा लिजमा दिन लागेको हो वा होइन ? र, यस्ता सम्पदा संरक्षण गर्नुपर्ने दायित्व सरकारको हो कि होइन भनेर प्रश्न उठाएको छ । त्यस्तै अर्थ मन्त्रालय, पर्यटन मन्त्रालय र पुरातत्त्व विभागको लिखित असहमति हुँदाहुँदै लिजमा दिनुपर्ने बाध्यता किन आएको भनेर पनि जवाफ मागेको छ ।
सर्वसाधारणको जग्गा अधिग्रहणको प्रक्रिया/अवस्था, बिनाप्रतिस्पर्धा निजी कम्पनीसँग समझदारी भए/नभएको, प्रमिस्ड ल्यान्ड र मोक्ष फाउन्डेसनसँग भएका पत्राचार, फाउन्डेसन र प्रमिस्डका प्रस्ताव अनि समझदारी पत्र पनि उपलब्ध गराउन समितिले निर्देशन दिएको छ । समितिले मोक्ष फाउन्डेसनले आफ्नो वेबसाइटमा लुम्बिनी र रामग्रामसँग सम्बन्धित सूचनाहरू राख्न कोषसँग सहमति लिए/नलिएको र लिएको भए त्यससँग सम्बन्धित कागजातहरू पनि उपलब्ध गराउन निर्देशन दिएको छ ।
समिति सभापति ऋषिकेश पोखरेलले ऐतिहासिक सम्पदाको उत्खनन, स्तूप निर्माणलगायत आवरणमा निजी कम्पनीलाई बिनाप्रतिस्पर्धा ९९ वर्षका लागि लिजमा सुम्पिन गुपचुप निर्णय भएका विषय बाहिरिएपछि यसको छानबिन अघि बढाइएको बताए । ‘सम्पदाको संरक्षण गर्ने दायित्व सरकारको हो । तर, सम्बन्धित मन्त्रालय र विभागकै लिखित असहमति हुँदाहुँदै बिनाप्रतिस्पर्धा कोषले शंकास्पद रूपमा निजी कम्पनीलाई सुम्पिन भित्रभित्र गरेको निर्णय डरलाग्दो देखिन्छ, यसमा लेखा समितिले विस्तृत अध्ययन र छानबिन गर्छ,’ पोखरेलले कान्तिपुरसँग भने ।
कोषले व्यवस्थापन जिम्मा प्रमिस्ड ल्यान्डको रहने गरी जग्गा अस्थिधातु उत्खनन, स्तूप निर्माण, अधिग्रहण एवं मुआब्जा रकम व्यवस्थापन सिंगापुरमा कार्यालय रहेको भनिएको मोक्ष फाउन्डेसनलाई दिएर एमओयू गरेको थियो । कोष र प्रमिस्डबीच भएको एमओयू अझै गोप्य राखिएको छ । यी कागजात आएपछि समितिले उचित कदम चाल्ने सभापति पोखरेलको भनाइ छ । उता निर्माण र व्यवस्थापन तथा सम्झौता चरणबाटै आफ्नो उपस्थिति हुनुपर्ने सर्त राखेर पुरातत्त्व विभागले कोषको प्रस्ताव फर्काइदिएको थियो । त्यसपछि पर्यटन मन्त्रालयले प्रमिस्डलाई दिने गरी आएको प्रस्तावमा आफ्नो असहमति रहेको भन्दै प्रतिकूल राय दिएको थियो । यी सबै राय र सुझावविपरीत प्रधानमन्त्री दाहाललाई नै उपस्थित गराएर कोष र प्रमिस्डले गत मंसिर २६ मा परियोजना शिलान्यास गरेका थिए ।
रामग्राम स्तूप निजी कम्पनीलाई लिजमा दिने लुम्बिनी विकास कोष र सरकारको कदम तत्काल रोक्न पश्चिम नवलपरासीका सरोकारवालाले आग्रह गरेका छन् । स्थानीयको संस्कृति र धार्मिक आस्थासँग जोडिएको महत्त्वपूर्ण स्थल बिनाप्रतिस्पर्धा निजी कम्पनीलाई जिम्मा दिँदा यसको अस्तित्व खतरामा पर्ने स्थानीयको चिन्ता छ ।
लामो समयसम्म रामग्राम स्तूपको विकासमा केन्द्र र लुम्बिनी विकास कोषले आवश्यकताअनुसार ध्यान नदिएपछि स्थानीयले रामग्राम स्तूप संरक्षण तथा पर्यटन विकास संस्था गठन गरेर सरोकारवालालाई झकझकाउने काम गरिरहेका छन् । संरक्षणमा राज्य आफैं जिम्मेवार हुनुपर्नेमा निजी कम्पनीलाई जिम्मा दिनु दुःखद भएको संस्थाका अध्यक्ष शम्भु उपाध्यायले बताए । ‘गुरुयोजना पास भएको छैन ।लाखौं मानिसको आस्थाको केन्द्र रहेको महत्त्वपूर्ण संस्थाको विकास र प्रवर्द्धनमा निजी कम्पनीलाई जिम्मा दिन तत्कालै आवश्यक थिएन,’ उनले भने, ‘स्थानीयको अपनत्व हुने गरेर काम हुनुपर्छ । सरकार र लुम्बिनी विकास कोष नै भुलभुलैयामा परेर यो समझदारी गरेको हामीलाई महसुस भएको छ ।’ संस्थाले मंगलबार विज्ञप्ति जारी गर्दै सम्झौता तत्काल बदर गर्न माग पनि गरेको छ ।
![](https://assets-cdn.ekantipur.com/uploads/source/ads/900-x-100-0172024023126.gif)