११ वर्षमा 'ध्रुवे' हात्तीको गलामा तेस्रो रेडियो कलर
![](https://assets-cdn.ekantipur.com/uploads/source/ads/900-100-0252024112350.gif)
![](https://assets-cdn.ekantipur.com/uploads/source/ads/mastercreativegif900x100-0952024115624.gif)
चितवन — जंगली भाले हात्ती 'ध्रुवे' गाउँ छिरेर मान्छेका घर भत्काउन थालेपछि उसका गतिविधिलाई टाढैबाट सुरक्षित र भरपर्दो तरिकाले निगरानी गर्न सोमबार चितवन राष्ट्रिय निकुञ्जको टोलीले स्याटलाइट कलर जडान गरेको छ । 'ध्रुवे'को गलामा यस्तो कलर राखिएको यो तेस्रो पटक हो ।
![](https://assets-cdn.ekantipur.com/uploads/source/ads/900x100-1172024092759.gif)
![११ वर्षमा 'ध्रुवे' हात्तीको गलामा तेस्रो रेडियो कलर](https://assets-cdn-api.ekantipur.com/thumb.php?src=https://assets-cdn.ekantipur.com/uploads/source/news/kantipur/2023/third-party/dhrube-11122023013339-1000x0.jpg&w=1001&h=0)
![](https://assets-cdn.ekantipur.com/uploads/source/ads/comp-900x100-1672024010950.gif)
सोमबार दिउँसो तीन बजे तिर निकुञ्जको पश्चिम क्षेत्र सेखीभार पोष्ट नजिक डार्ट गरेर लठ्याएपछि 'ध्रुवे'को घाँटीमा स्याटलाइट कलर राखिएको चितवन निकुञ्जका सूचना अधिकारी रहेका संरक्षण अधिकृत गणेशप्रसाद तिवारीले जानकारी दिए । स्याटलाइट कलर राखेपछि ध्रुवे कता छ, कहाँ जाँदैछ भन्ने संकेत निकुञ्जले कम्युटरमा नै पाउने छ । यसरी संकेत आउँदा हात्ती बस्ती तिर जान लाागे बेलैमा भगाउन टोली परिचालित गर्न सजिलो हुने तिवारीले बताए ।
ध्रुवे जस्ता जंगली भाले हात्ती घरपालुवा पोथी हात्ती खोज्दै बस्ती नजिक आउँछन् । धान लगायतका खाने कुरा खोज्दै घरै भत्काउने र मान्छेमाथि आक्रमण पनि गर्छन् । ध्रुवे हात्तीले यो पटक तिहार लगत्तै बस्ती पसेर घर भत्काउन सुरु गरेको थियो । सुरूमा माडी र त्यसपछि निकुञ्ज मुख्यालय कसरा नजिकको जगतपुरका घरहरू ध्रुवे हात्तीले भत्काएर दुःख दिँदै आएको छ । हात्तीले १५ वटा जति घर भत्काएको तिवारीले बताए । साँझ परे लगत्तै हात्ती गाउँ छिर्ने गरेका कारण यसलाई नियन्त्रणमा लिन स्थानीयले माग गर्दै आएका थिए । स्याटलाइट कलर राख्नुका साथै हात्तीको लामो भएको दाह्रा पनि काटिएको तिवारीले बताए । जसका कारण उसको आक्रमक स्वभाव कम हुने तिवारीको भनाइ छ ।
महिना दिन नहुँदै माडीमा चारजनाको ज्यान लिएपछि ६९ सालको हिउँदमा ध्रुवे हात्ती राष्ट्रिय रूपमा नै चर्चामा आएको थियो । त्यो वर्ष मंसिर ६ गते ध्रुवेको गलामा पहिलो पटक रेडियो कलर राखिएको थियो । त्यो बेला ध्रुवे हात्तीलाई मार्ने निर्णय भए पनि अचानक हराएर जोगिएको थियो । ७४ सालको हिउँदमा फेरि देखा परेको ध्रुवे पहिला शान्त थियो । तर आक्रमक गतिविधि गरेपछि निकुञ्जले ०७७ सालको वैशाखमा दोस्रो पटक कलर राखिएको थियो ।
![](https://assets-cdn.ekantipur.com/uploads/source/ads/900-x-100-0172024023126.gif)