कान्तिपुर वेबसाईट
AdvertisementAdvertisement
२५.१२°C काठमाडौं
काठमाडौंमा वायुको गुणस्तर: ११४

एमालेबाट तनहुँमा खनाल र चितवनमा न्यौपाने उम्मेदवार

बाराबारे अनिर्णित

काठमाडौँ — नेकपा (एमाले)ले तीन निर्वाचन क्षेत्रमा हुने उपनिर्वाचनमध्ये दुई क्षेत्रका उम्मेदवार टुंगो लगाएको छ । एमालेको शनिबार बसेको सचिवालय बैठकले तनहुँ निर्वाचन क्षेत्र नम्बर १ र चितवन क्षेत्र नम्बर २ को उपनिर्वाचनका उम्मेदवारको नाम टुंगो लगाए पनि बारा क्षेत्र नम्बर २ को उम्मेदवार भने टुंगो लगाउन सकेन । 

एमालेबाट तनहुँमा खनाल र चितवनमा न्यौपाने उम्मेदवार

एमाले उपमहासचिव पृथ्वीसुब्बा गुरुङले सचिवालय बैठकपछि दिएको जानकारीअनुसार तनहुँ निर्वाचन क्षेत्र नम्बर १ बाट नेपाल प्रहरीका पूर्वमहानिरीक्षकसमेत रहेका नेता सर्वेन्द्र खनाललाई उम्मेदवार बनाउने निर्णय गरेको छ । चितवन निर्वाचन क्षेत्र नम्बर २ बाट रामप्रसाद न्यौपानेलाई उम्मेदवार बनाउने निर्णय गरिएको पनि गुरुङले जानकारी दिए ।

दुवै निर्वाचनलाई सम्बन्धित क्षेत्रीय, जिल्ला र प्रदेश कमिटीले सिफारिस गरेको गुरुङको भनाइ थियो ।

बारा निर्वाचन क्षेत्र नम्बर २ मा भने कसलाई उम्मेदवार बनाउने भन्ने निर्णय भइनसकेको गुरुङले बताए । 'बारा निर्वाचन क्षेत्र नम्बर २ मा थप छलफल गर्नुपर्ने आवश्यकता महसुस गरिएको छ । सिफारिस प्राप्त भए पनि थप छलफल गर्नुपर्ने आवश्यकता ठानेको हुनाले कसलाई उम्मेदवार बनाउने भन्ने निर्णय गर्ने अधिकार केन्द्रीय हेडक्वार्टरलाई दिएको छ,' उनले भने ।

बारा निर्वाचन क्षेत्र नम्बर २ को उपनिर्वाचन उम्मेदवारबारे अध्यक्ष केपी शर्मा ओलीले पार्टी वरिष्ठ उपाध्यक्ष, महासचिव, जिल्लाका नेताहरूसँग छलफल गरेर उम्मेदवार टुंगो लगाउने निर्णय भएको गुरुङले बताए । उनले उपनिर्वाचन हुने तीनवटै क्षेत्रमा एमालेले उम्मेदवार बनाउने पनि बताए ।

तीनवटै निर्वाचन क्षेत्रमा २०८० वैशाख १० गते उपनिर्वाचन हुँदैछ ।

प्रकाशित : चैत्र १८, २०७९ १६:१२
प्रतिक्रिया
पठाउनुहोस्
जनताको राय

चार दर्जनबढी पालिकाले असार १० भित्रै बजेट ल्याउन नसक्नुको मुख्य कारण के होला ?

x